(ສປນວ) ໃນລະຫວ່າງ ວັນທີ 28–29 ພະຈິກ 2023, ສະພາປະຊາຊົນ ນະຄອນຫຼວງ ໄດ້ຈັດກອງປະຊຸມສໍາມະນາ ເພື່ອຮັບຟັງຄຳຄິດ-ຄຳເຫັນບາງບັນຫາສຳຄັນຈຳນວນໜຶ່ງ ຂອງນະຄອນຫຼວງວຽງຈັນ ໂດຍການພັດປ່ຽນກັນເປັນປະທານຂອງ ຮອງປະທານ ສະພາປະຊາຊົນ ນະຄອນຫຼວງວຽງຈັນ, ໂດຍການເຂົ້າຮ່ວມຂອງ ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ຮອງເຈົ້າຄອງ ນະຄອນຫຼວງ, ສະມາຊິກສະພາປະຊາຊົນ ນະຄອນຫຼວງ, ບັນດາທ່ານພະແນກການ, ອົງການປົກຄອງເມືອງ ພ້ອມດ້ວຍແຂກທີ່ຖືກເຊີນ ໄດ້ໃຫ້ການເຂົ້າຮ່ວມ.

ກອງປະຊຸມສຳມະນາຄັ້ງນີ້ ຈຸດປະສົງເພື່ອສຳມະນາແລກປ່ຽນຄຳຄິດ-ຄຳເຫັນ ຈາກບັນດາທ່ານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກສະພາປະຊາຊົນ ນະຄອນຫຼວງ ແລະ ບັນດາພະແນກການ, ອົງການທຽບເທົ່າພະແນກອ້ອມຂ້າງ ນະຄອນຫຼວງ ຕໍ່ແນວຄວາມຄິດການລິເລີ່ມກະກຽມດຳເນີນເອກະສານ ເພື່ອສະເໜີສ້າງຕັ້ງເມືອງໃໝ່ ເມືອງທີ 10 ຂອງນະຄອນຫຼວງ ແລະ ຮ່າງນິຕິກຳ 02 ສະບັບ ຄື: (1) ການສະເໜີຮ່າງຂໍ້ຕົກລົງວ່າດ້ວຍ ກອງທຶນພັດທະນາກິລາ-ກາຍະກຳ ນະຄອນຫຼວງ; (2) ການສະເໜີຮ່າງຂໍ້ຕົກລົງວ່າດ້ວຍ ການກຳນົດລາຄາຫົວໜ່ວຍທົດແທນຄ່າເສຍຫາຍຂອງໂຄງການກໍ່ ສ້າງຕາຝັ່ງ ແລະ ພັດທະນາແຄມຂອງ ໄລຍະທີ II ເພື່ອເປັນການຮັບຟັງຄໍາຄິດ-ຄໍາເຫັນ ໃນຫຼາກຫຼາຍ ແລະ ກວ້າງຂວາງ ເພື່ອໃຫ້ພາກສ່ວນກ່ຽວຂ້ອງໄດ້ພິຈາລະນານຳໄປຄົ້ນຄວ້າພິຈາລະນາໃນຕໍ່ໜ້າ.