ພິທິເປີດຂະບວນການແຂ່ງຂັນຮັກຊາດ ແລະ ພັດທະນາ ຂອງສະພາປະຊາຊົນແຂວງ ອັດຕະປື ໄດ້ຈັດຂຶ້ນໃນຕອນບ່າຍຂອງວັນທີ 9 ມັງກອນ 2024 ນີ້ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ, ມີຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ໃນພິທີ ທ່ານ ນາງ ແສງອາລຸນ ວົງສາທິການ ເລຂາທິການສະພາປະຊາຊົນແຂວງ ໄດ້ຜ່ານແຜນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາໄລຍະ 5 ປີ (2021-2025) ຂອງສະພາປະຊາຊົນແຂວງ ເຊິ່ງສະແດງໃຫ້ເຖິງແຜນວຽກ,ແຜນງານ ເພື່ອປະຕິບັດພາລະບົດບາດ,ສິດ ແລະໜ້າທີ່ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ເປັນອົງການອໍານາດລັດຂັ້ນທ້ອງຖີ່ນ, ປະຕິບັດພາລະບົດບາດ ພິຈາລະນາ ແລະ ຮັບຮອງເອົານິຕິກໍາທີ່ສໍາຄັນຂອງທ້ອງຖີ່ນ, ຕົກລົງບັນຫາສໍາຄັນພື້ນຖານຂອງທ້ອງຖີ່ນ ແລະ ຕິດຕາມກວດກາການເຄົາລົບປະຕິບັດລັດຖະທໍາມະນູນ ແລະ ກົດໝາຍ, ສືບຕໍ່ຜັນຂະຫຍາຍ ແລະ  ຈັດຕັ້ງປະຕິບັດເຜີຍແຜ່, ເຊື່ອມຊຶມບັນດານິຕິກໍາຂອງສະພາປະຊາຊົນແຂວງ, ກົດໝາຍສະພາແຫ່ງຊາດ, ກົດໝາຍສະພາປະຊາຊົນຂັ້ນແຂວງ,ມະຕິ,ຄໍາສັງ ແລະ ນິຕິກໍາອື່ນທີ່ກ່ຽວຂ້ອງ ໃຫ້ບັນດາສະມາຊິກພັກ,ພະນັກງານ-ລັດຖະກອນ ຮັບຮູ້ເຂົ້າໃຈຢ່າງກວ້າງຂວາງເລິກເຊິ່ງ ແລະ ເປັນລະບົບຕໍ່ເນື່ອງ, ຜັນຂະຫຍາຍແນວທາງແຜນການເຄື່ອນໄຫວຂອງຄະນະປະຈໍາສະພາປະຊາຊົນແຂວງ,ຄະນະກໍາມະການ ແລະ ຄະນະເລຂາທິການ ເປັນແຜນງານ, ໂຄງການ, ກິດຈະກໍາອັນລະອຽດ, ຖືກຕ້ອງຕາມລະບຽບການ ແລະ ສະພາບເງື່ອນໄຂຕົວຈິງ, ນໍາເອົາຜົນສໍາເລັດກອງປະຊຸມສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແຕ່ລະຄັ້ງຜົນຂະຫຍາຍພົບປະຜູ້ມີສິດເລືອກຕັ້ງ ໃຫ້ກວ້າງຂວາງທົ່ວເຖິງແທດກັບເປົ້າໝາຍຕົວຈິງໃຫ້ຫຼາຍຂຶ້ນ ດັ່ງຄໍາຂວັນທີ່ວ່າ:ສ້າງສະພາປະຊາຊົນແຂວງ ໃຫ້ສົມເປັນ ອົງການຕົວແທນແຫ່ງສິດຜົນປະໂຫຍດອັນຊອບທໍາ ຂອງປະຊາຊົນລາວບັນດາເຜົ່າຊາວແຂວງອັດຕະປື, ຮັບປະກົນໃຫ້ສະມາຊິກສະພາປະຊາຊົນແຂວງປະຕິບັດໜ້າທີ່ຄົບຖ້ວນ ຕາມສິດ,ໜ້າທີ່ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ, ຍົກສູງຄຸນນະພາບ ໃນການຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍໃຫ້ມີຄວາມສັກສິດ ເຮັດໃຫ້ແຂວງມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ,ສາມັກຄີປ່ອງດອງຍຸຕິທໍາ ບົນພື້ນຖານສະເໝີພາບໃຕ້ກົດໝາຍ.

ຕອນທ້າຍ ທ່ານ ນາງ ມີນາພອນ ໄຊສົມພູ  ໄດ້ມີຄໍາເຫັນໃຫ້ທິດຊີ້ນໍາ ສືບຕໍ່ຍູ້ແຮງການຈັດຕັ້ງປະຕິບັດຂະບວນການແຂ່ງຂັນຮັກຊາດ-ຍ້ອງຍໍ ແລະ ພັດທະນາ ໃຫ້ເປັນຂະບວນການຟົດຟື້ນ ກວ້າງຂວາງ ແລະ ຕໍ່ເນື່ອງ, ພ້ອມກັນສຸມໃສ່ພັດທະນາຕົນເອງ ແລະ ພັດທະນາວີຊາສະເພາະ ໃຫ້ມີຄວາມເຂັ້ມແຂງ, ເພີ່ມທະວີໃນການຊີ້ນໍາ-ນໍາພາ ຈັດຕັ້ງປະຕິບັດ ແນວທາງນະໂຍບາຍຂອງພັກ ລະບຽບກົດໝາຍຂອງລັດ ສ້າງໃຫ້ໄດ້ການຫັນປ່ຽນຢ່າງຕັ້ງໜ້າ, ສືບຕໍ່ຮັບປະກັນໂຄງປະກອບກົງຈັກການຈັດຕັ້ງ ຂອງສະພາປະຊາຊົນແຂວງ ໃຫ້ມີສະຖຽນລະພາບທາງດ້ານການເມືອງ ມີຄວາມເປັນລະບຽບຮຽບຮ້ອຍ, ເພີ່ມທະວີການຄຸ້ມຄອງລັດ ຄຸ້ມຄອງສັງຄົມຕາມລະບຽບກົດໝາຍ ເສີຍຂະຫຍາຍ ບົດບາດສະພາປະຊາຊົນແຂວງ ໃຫ້ສູງຂື້ນເທື່ອລະກ້າວ.

(ວິນັດ)