ໃນວັນທີ 2 ມິຖຸນາ 2023 ທີ່ສະພາປະຊາຊົນແຂວງ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ໂດຍມີຄະນະນໍາຂອງສະພາປະຊາຊົນແຂວງ, ພະນັກງານ-ລັດຖະກອນ ພ້ອມດ້ວຍລູກຫຼານຂອງພະນັກງານພາຍໃນສະພາປະຊາຊົນແຂວງເຂົ້າຮ່ວມເປັນຈໍານວນຫຼາຍ.
ເພື່ອເປັນການປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ແລະ ອານຸຊົນ, ພໍ່ແມ່ຜູ້ປົກຄອງ ກໍຄືອຳນາດການປົກຄອງ, ການຈັດຕັ້ງທຸກຂັ້ນ ເຫັນໄດ້ຄວາມສຳຄັນຂອງວັນເດັກນ້ອຍສາກົນ ວັນທີ 1 ມິຖຸນາ ເຊິ່ງຫຼາຍປະເທດໃນໂລກ ກໍໄດ້ຈັດຕັ້ງສະເຫຼີມສະຫຼອງດ້ວຍຫຼາຍກິດຈະກຳຢ່າງຄຶກຄື້ນ; ເພື່ອເສີມຂະຫຍາຍສາຍພົວພັນຄອບຄົວ, ພໍ່ແມ່-ລູກ ກໍຄືນະໂຍບາຍຂອງພັກ ແລະ ລັດເຮົາ ໃນການສຶກສາອົບຮົມ, ປູກຈິດສຳນຶກ ແນວຄິດຮັກຊາດ, ຮັກບ້ານເກີດເມືອງນອນ ທັງເປັນການປົກປ້ອງສົ່ງເສີມສິດຜົນປະໂຫຍດຂອງເດັກນ້ອຍຢູ່ ສປປລາວ ຕາມລະບຽບກົດໝາຍທີ່ກໍານົດໄວ້.

ໃນພິທີຄັ້ງນີ້ ທ່ານ ນາງ ພອນມະນີ ຂຽນໄຊຍະວົງ ຮອງປະທານສະພາປະຊາຊົນແຂວງ ໄດ້ມີຄໍາເຫັນວ່າ: ວັນເດັກສາກົນ ທີ່ຕິດພັນກັບວັນປູກຕົ້ນໄມ້ແຫ່ງຊາດ ແຕ່ລະປີ ແມ່ນເຫດການພິເສດໜຶ່ງທີ່ມີຄວາມໝາຍຕໍ່ເດັກ ຈຸດປະສົງແນໃສ່ຊຸກຍູ້ສົ່ງເສີມ, ພັດທະນາ ແລະ ປົກປ້ອງເດັກ ໃນທົ່ວໂລກ; ຍ້ອນເຫັນໄດ້ຄວາມສຳຄັນຂອງເດັກ ທີ່ເປັນອະນາຄົດຂອງຊາດ, ເປັນເມັດພືດ, ເປັນໜໍ່ແໜງທຶນຮອນແຫ່ງຊີວິດໃນມື້ນີ້ ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ໜ້າ, ທົ່ວໂລກ ຈຶ່ງໄດ້ສະເຫຼີມສະຫຼອງວັນເດັກສາກົນ ຕາມເງື່ອນໄຂ. ພ້ອມກັນນີ້ກໍຍັງຖືສໍາຄັນ ແລະ​ ເອົາໃຈໃສ່ໃນການປູກຕົ້ນໄມ້ ເພື່ອມີສະຕິ ຮັກ-ຫວງແຫນປ່າໄມ້ ແລະ ຊັບພະຍາກອນປ່າໄມ້ໃນການຄຸ້ມຄອງປົກປັກຮັກສາ ແລະ ພັດທະນາປ່າໄມ້ ເຮັດໃຫ້ປ່າໄມ້ມີຄວາມອຸດົມສົມບູນ, ເປັນເຫງົ້າພະລັງໃນການປົກປັກຮັກສາລະບົບນິເວດທໍາມະຊາດ,ຊີວະນາໆພັນ, ແຫຼ່ງນໍ້າໃຫ້ຍືນຍົງຕະຫຼອດໄປ.
(ພາບ-ຂ່າວ:ສພຂ​ ອັດຕະປື)