ໃນຕອນເຊົ້າວັນທີ 29 ພຶດສະພາ 2024  ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີປາຖະກາຖາ ວັນຜ່າວົງປິດລ້ອມ ຂອງກອງພັນທີ 02  ວິລະຊົນທີ່ທົ່ງໄຫຫີນ ຊຽງຂວາງ ຄົບຮອບ 65 ປີ, ວັນວິລະກໍາໂຕນຄຸກ ຢ່າງມະຫັດສະຈັນ ຂອງບັນດາຜູ້ນໍາ ຂອງພັກ ແລະ ແນວລາວຮັກຊາດ ຄົບຮອບ 64 ປີ, ໄຊຊະນະຂອງສະຫະພາບໂຊວຽດເໝືອຟາດຊິດ ເຢຍລະມັນ ໃນສົງຄາມໂລກຄັ້ງທີ II ຄົບຮອບ 79 ປີ, ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ, ຄວາມເປັນມາ ການສະເຫຼີມສະຫຼອງວັນເດັກ ແລະ ສານຂອງພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດວັນເດັກສາກົນ 1 ມີຖຸນາ 2004

ພິທີດັ່ງກ່າວໃຫ້ກຽດປາຖະກາຖາໂດຍ ທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງ ໂດຍທ່ານໄດ້ຍົກໃຫ້ເຫັນ ເຖິງສະພາບການຖືກປິດລ້ອມຂອງກອງພັນທີ 02, ການຜ່າວົງປິດລ້ອມໃນວັນທີ 18/5/1959, ຄວາມໝາຍສໍາຄັນ ແລະ ປັດໃຈພື້ນຖານທີ່ເຮັດໃຫ້ການຜ່າວົງປິດລ້ອມຢ່າງມີໄຊ ຍ້ອນມີການນໍາພາອັນຖືກຕ້ອງສະຫຼາດສ່ອງໃສຂອງພັກປະຊາຊົນປະຕິວັດລາວ, ຍ້ອນພະນັກງານ, ສາມະຊິກພັກ ແລະ ນັກຮົບກອງພັນທີ 2 ໄດ້ຮັບການສຶກສາອົບຮົມການເມືອງແນວຄິດເປັນຢ່າງດີ, ອັນເຮັດໃຫ້ທຸກຄົນມີຄວາມຈົ່ງຮັກພັກດີຕໍ່ພັກຕໍ່ປະເທດຊາດ, ຕໍ່ປະຊາຊົນ, ບໍ່ຫວັນໄຫວຄອນແຄນຕໍ່ອຸປະສັກຫຍຸ້ງຍາກ, ສິ່ງທົດສອບທ້າທາຍຫຼາຍປະການ, ພາຍໃນມີຄວາມສາມັກຄີເປັນເອກະພາບ ມີນໍ້າໃຈສູ້ຮົບເດັດດ່ຽວອາດຫານ, ປະຕິບັດກົດລະບຽບວິໃນ ແລະ ຄໍາສັ່ງເຂັ້ມງວດ, ຮັກສາຄວາມລັບຢ່າງເດັດຂາດ, ຍາມໃດກໍ່ໄດ້ເອົາໃຈໃສ່ເຮັດວຽກງານລົງກໍ່ສ້າງຮາກຖານການເມືອງ, ປຸກລະດົມຂົນຂວາຍປະຊາຊົນ ກໍ່ຄືຂົນຂວາຍກໍາລັງຂອງຝ່າຍກົງກັນຂ້າມ, ມີການຈັດຕັ້ງນໍາພາ-ບັນຊາທີ່ໜັກແໜ້ນ, ເດັດດ່ຽວເດັດຂາດ, ເສີມຂະຫຍາຍຫົວຄິດປະດິດສ້າງຂອງໝົດທຸກຄົນ, ຍ້ອນໄດ້ຮັບການສະໜັບສະໜູນຊ່ວຍເຫຼືອຢ່າງໝົດຈິດໝົດໃຈຈາກກອງທັບ ແລະ ປະຊາຊົນຫວຽດນາມອ້າຍນ້ອງ ເຮັດໃຫ້ການຜ່າວົງປິດລ້ອມໄດ້ຮັບໄຊຊະນະ, ຕໍ່ຈາກນັ້ນທ່ານຍັງໄດ້ຮວນຄືນວິລະກໍາໂຕນຄຸກຢ່າງມະຫັດສະຈັນ ຂອງບັນດາທ່ານຜູ້ນໍາຂອງພັກ ແລະ ແນວລາວຮັກຊາດ ໂດຍທ່ານໄດ້ຍົກໃຫ້ເຫັນເຖິງແຜນການໂຕນອອກຈາກຄຸກ ໂດຍໄດ້ມີການປຶກສາຫາລືຄົ້ນຄວ້າອອກເປັນຫຼາຍແຜນ, ຫຼາຍແງ່ມູມ, ແຕ່ສຸດທ້າຍປະທານ ໄກສອນ ພົມວິຫານ ໄດ້ເລືືອກເອົາວິທີການປຸກລະດົມຂົນຂວາຍ ສຶກສາອົບຮົມສາລະວັດທີ່ຍາມຄຸກໃຫ້ມີຄວາມຮັກຊາດ ແລະ ຕື່ນຕົວການເມືືອງ, ໃນໄລຍະຜ່ານໄປເກືອບ 300 ວັນທີ່ຜູ້ນໍາເຮົາຢູ່ໃນຄຸກໄດ້ຂົນຂວາຍພວກສາລະວັດທະຫານທີ່ເຂົ້າເວນຍາມຄຸກໄດ້ຮັບໝາກຜົນເປັນຢ່າງດີ, ທ່ານຍັງໄດ້ຍົກໃຫ້ເຫັນສາເຫດການໂຕນຄຸກຢ່າງມະຫັດສະຈັນ ຂອງບັນດາຜູ້ນໍາໄປສູ່ເຂດທີ່່ໝັ້ນປະຕິວັດຢ່າງປອດໄພ ກໍ່ຍ້ອນການນໍາອັນສະຫຼາດສ່ອງໃສ ແລະ ປີຊາສາມາດຂອງປະທານ ໄກສອນພົມວິຫານ ແລະ ສູນກາງພັກ, ຍ້ອນນໍ້າໃຈຮັກຊາດ ອັນແຮງກ້າຂອງບັນດາຜູ້ນໍາເຮົາທີ່ມີຄວາມກ້າຫານ, ຍ້ອນສາລະວັດທະຫານມີນໍ້າໃຈຮັກຊາດອັນດູດດື່ມ, ເບື່ອໜ່າຍຕໍ່ອໍານາດປົກຄອງຫຸ່ນປະຕິການ, ຍ້ອນຄວາມຕື່ນຕົວຮັກຊາດຂອງປະຊາຊົນທຸກຊັ້ນຄົນ, ຍ້ອນກໍາລັງຝ່າຍປະເທດລາວ, ກອງພັນທີ 2 ແລະ ທະຫານຖ້ອງທິ່ນປ້ອງກັນຜູ້ນໍາ ແລະ ກຽມພ້ອມທັບມ້າງທຸກການໄລ່ລ່າຂອງສັດຕູ, ຍ້ອນການສະໜັບສະໜູນຂອງພັກ, ລັດ ແລະ ປະຊາຊົນຫວຽດນາມ ແລະ ປະເທດສັງຄົມນິຍົມອ້າຍນ້ອງ, ຍ້ອນຄອບຄົວພີ່ນ້ອງລູກຫຼານ ຂອງຜູ້ນໍາໂດຍສະເພາະ ປ້າຄໍາແພງ ບຸຜາ ໄດ້ເຄື່ອນໄຫວປຸກລະດົມປະຊາຊົນດໍາເນີນການຕໍ່ສູ້ຢ່າງແຂງແຮງ ແລະ ການເຄື່ອນໄຫວຂອງຜູ້ຊົງຄຸນວຸດທິ, ຜູ້ຮັກຫອມສັນຕິພາບເປັນກາງທີ່ໄດ້ສະໜັບສະໜູນຕໍ່ຝ່າຍແນວລາວຮັກຊາດ, ພາຍຫຼັງທີ່ສໍາເລັດການຫວນຄືນວິລະກໍາໂຕນຄຸກ ທ່ານກໍ່ໄດ້ເລົ່າຄວາມເປັນມາ ການສະເຫຼີມສະຫຼອງວັນເດັກ ແລະ ສານຂອງພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດວັນເດັກສາກົນ 1 ມີຖຸນາ 2004,ເອກະສານ ສຸດທ້າຍແມ່ນ ທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ຂຶ້ນປະຖະກະຖາ ວັນໄຊຊະນະຂອງສະຫະພາບໂຊວຽດເໝືອຟາດຊິດ ເຢຍລະມັນ ໃນສົງຄາມໂລກຄັ້ງທີ II ຄົບຮອບ 79 ປີ ແລະ ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ.