ໃນລະຫວ່າງ ວັນທີ 4-5 ກໍລະກົດ 2024 ຜ່ານມາ, ສະພາປະຊາຊົນແຂວງໄຊສົມບູນ ໄດ້ເປີດກອງປະຊຸມຂຶ້ນ ທີ່ຫ້ອງປະຊຸມຂອງຫ້ອງການສຶກສາທິການ ແລະກິລາເມືອງລ້ອງຊານ ໂດຍພາຍໃຕ້ການຊີ້ນໍາ ແລະເປັນປະທານຂອງ ທ່ານ ຄໍາພູທອນ ວົງພະຈັນ ສສຂ ປະຈໍາເຂດເລືອກຕັ້ງເມືອງອະນຸວົງ, ຮອງປະທານສະພາປະຊາຊົນແຂວງ ແລະໃຫ້ກຽດເຂົ້າຮ່ວມເປັນນັກວິທະຍາກອນໂດຍ ທ່ານ ຄຳສິງ ໄຊສົມແພງ ຮອງປະທານກຳມາທິການວຽກງານ ສສຊ ສະພາແຫ່ງຊາດ, ທ່ານ ສາຍອູ ພູມສາລີ ຮອງຫົວໜ້າສະຖາບັນຄົ້ນຄວ້ານິຕິກຳ ສະພາແຫ່ງຊາດ ແລະ ທ່ານ ໂພສີ ເຕັມເມລາດ ຫົວໜ້າກົມການເງິນ, ການທະນາຄານ ແລະ ກວດສອບ ແລະ ມີບັນດາທ່ານ ສສຂ ປະຈໍາເຂດເລືອກຕັ້ງ 5 ເມືອງ ແລະ ພະນັກງານຜູ້ຊ່ວຍວຽກພາຍໃນສະພາປະຊາຊົນແຂວງໄຊສົມບູນ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ ທ່ານ ຄໍາພູພອນ ວົງພະຈັນ ປະທານກອງປະຊຸມ ໄດ້ກ່າວຈຸດປະສົງ ແລະ ທ່ານໄດ້ໃຫ້ຮູ້ວ່າ: ການເປີດກອງປະຊຸມຝຶກອົບຮົມ ແລະການທີ່ເຊີນບັນດານັກວິທະຍາກອນ ແລະ ນັກສໍາມະນາກອນ ເຂົ້າຮ່ວມໃນຄັ້ງນີ້ແມ່ນເພື່ອ ຍົກສູງ ກ່ຽວກັບ ການລົງໃຊ້ສິດຕິດແທດກັບຜູ້ມີສິດເລືອກຕັ້ງ, ທັກສະໃນການຊັກຖາມ, ການເກັບກໍາ ແລະ ວິໄຈຂໍ້ມູນ ຮັບໃຊ້ການເຄື່ອນໄຫວຢູ່ສະພາແຫ່ງຊາດ, ທັກສະການສົນທະນາ ແລະ ການຕອບບັນຫາ ກ່ຽວກັບ ການສົນທະນາ ຢູ່ກອງປະຊຸມສະພາແຫ່ງຊາດ ໃຫ້ແກ່ ສສຊ-ສສຂ ປະຈໍາເຂດເລືອກຕັ້ງ ແລະ ພະນັກງານຂອງສະພາປະຊາຊົນແຂວງໄຊສົມບູນ ແລະ ພ້ອມທັງ ເປັນການຍົກລະດັບຄວາມຮັບຮູ້, ຄວາມເຂົ້າໃຈ ຕໍ່ໜ້າທີ່ວຽກງານຂອງ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ສະມາຊິກສະພາປະຊາຊົນແຂວງ

ໂດຍທີ່ປະຊຸມໄດ້ຮັບຟັງ ການຊັກຖາມຢູ່ສະພາແຫ່ງຊາດ ສສ ຫວຽດນາມ-ບາງບົດຮຽນ ທີ່ຖອດຖອນໄດ້ ຂອງສະມາຊິກສະພາແຫ່ງຊາດ ແລະເກັບກໍາ, ການວິໄຈຂໍ້ມູນຮັບໃຊ້ການເຄື່ອນໄຫວຢູ່ສະພາແຫ່ງຊາດ ແລະ ຮັບຟັງການຕອບບັນຫາ ກ່ຽວກັບ ການສົນທະນາຢູ່ສະພາແຫ່ງຊາດ, ທັກສະການສົນທະນາ ຢູ່ກອງປະຊຸມ ສະພາແຫ່ງຊາດ ແລະ ຮັບຟັງການສົນທະນາ ໃນກອງປະຊຸມສະພາແຫ່ງຊາດຄື: ທັກສະ ແລະພຶດຕິກໍາຕົວຈິງ  ເຊິ່ງນໍາສະເໜີໂດຍ ນັກວິທະຍາກອນຄື: ທ່ານ ຄໍາສິງ ໄຊສົມແພງ; ຮັບຟັງ ການລົງໃກ້ຊິດຕິດແທດຕິດແທດກັບຜູ້ມີສິດເລືອກຕັ້ງ ຢູ່ ສສ ຫວຽດນາມ-ແລກປ່ຽນປະສົບການຂອງຜູ້ແທນ ສະພາແຫ່ງຊາດ ນໍາສະເໜີໂດຍ ນັກວິທະນາກອນ: ທ່ານ ສາຍອູ ພູມສາລີ ແລະ ຮັບຟັງ ທັກສະການລົງງົບປະມານແຫ່ງລັດ ແລະ ຮັບຟັງ ກ່ຽວກັບ ທັກສະໃນການຕິດຕາມກວດກາງົບປະມານແຫ່ງລັດ ເຊິ່ງນໍາສະເໜີໂດຍ ນັກວິທະຍາກອນ: ທ່ານ ໂພສີ ເຕັມເມດລາ.

ພາຍຫຼັງ ທີ່ນັກສໍາມະນາກອນ ໄດ້ນໍາສະເໜີບົດຕ່າງໆທີ່ກ່າວມາຂ້າງເທິງ ສໍາເລັດແລ້ວນັ້ນ, ບັນດານັກສໍາມະນາກອນກໍຄື: ຜູ້ແທນກອງປະຊຸມ ໄດ້ຜັດປ່ຽນກັນແລກປ່ຽນບົດຮຽນ ລະຫວ່າງ ນັກວິທະຍາກອນ ແລະ ນັກສໍາມະນາກອນ ຕ່າງທ່ານ ຕ່າງກໍປະກອບຄໍາຄິດເຫັນຢ່າງຄຶກຄື້ນ ແບບກົງໄປກົງມາ ແບບເປັນກັນເອງ ຕໍ່ກັບປະສົບການຕົວຈິງ ທີ່ໄດ້ຜ່ານການປະຕິບັດ ຈັດຕັ້ງມາແລ້ວນັ້ນ ແລະ ຈະນໍາເອົາຄວາມຮູ້, ຄວາມເຂົ້າໃຈ,  ບົດຮຽນໃໝ່ໆ ທີ່ຕ້ອງໄດ້ສືບຕໍ່ປະຕິບັດຈັດຕັ້ງໃຫ້ປະກົດຜົນເປັນຈິງ ແລະ ເພີ່ມຄວາມສາມາດໃນການ ນໍາໃຊ້ຕົວແທນແຫ່ງສິດ, ພາລະບົດບາດ ແລະ ຜົນປະໂຫຍດອັນໃຫຍ່ຫຼວງ ໃຫ້ແກ່ປະຊາຊົນບັນດາເຜົ່າ ຜູ້ມີສິດເລືອກຕັ້ງທົ່ວແຂວງໄຊສົມບູນ ໂດຍສະເພາະແມ່ນ ຕ້ອງນໍາໃຊ້ໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງໄຊສົມບູນ ຊຸດທີ II ທີ່ໃກ້ຈັດຂຶ້ນໃນໄວໆນີ້.

ທັງນີ້ກໍເພື່ອ ໃຫ້ການຈັດຕັ້ງປະຕິບັດວຽກງານໃນຕໍ່ໜ້າ ມີຄວາມເປັນເອກະພາບ, ມີສະຖຽນລະພາ ຖືກຕ້ອງ ຕາມພາລະບົດບາດສາມາດຮັບປະກັນໃຫ້ວຽກງານມີຄຸນນະພາບ ແລະ ປະສິດທິຜົນສູງຂຶ້ນກວ່າເກົ່າ.

(ອໍາໄພພອນ ແກ້ວວິໄລ)