ເພື່ອປະຕິບັດຕາມ ໜັງສືແຈ້ງການ ສະບັບເລກທີ 1349/ຄຊປປລ-ຊບ, ລົງວັນທີ 09 ພະຈິກ 2022 ແລະ ເພື່ອເປັນການປະຕິບັດຕາມສິດ, ພາລະບົດບາດ ຂອງວຽກງານ 03 ອົງການຈັດມະຫາຊົນ;

ໃນຕອນແລງ ບ່າຍໂມງ ຂອງວັນທີ 10 ພະຈິກ 2022 ນີ້, ພະນັກງານ-ລັດຖະກອນ ແຕ່ລະພາສ່ວນ ເຊິ່ງນັ້ນກໍຄື: ບັນດາພະແນກການ, ອົງການ, ກົມກອງ ຕະຫຼອດຮອດ ບໍລິສັດ-ລັດວິສາຫະກິດຕ່າງໆ ທົ່ວແຂວງໄຊສົມບູນ ແລະ ໜຶ່ງໃນນັ້ນ ໄດ້ມີ ສະພາປະຊາຊົນແຂວງຂອງພວກເຮົາ ກໍໄດ້ເຂົ້າຮ່ວມຂະບວນການອອກແຮງງານ ເຊິ່ງໄດ້ນໍາພາໂດຍ ສະຫາຍ ລີຈັ້ງ ເກຍເປົາ ສສຂ, ຮອງປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າ ແລະ ສະຫາຍ ນາງ ຄໍາຫຼ້າ ທອງສີວອນ ສສຂ ປະຈໍາເຂດເລືອກຕັ້ງ ເມືອງລ້ອງຊານ, ຮອງປະທານຄະນະກໍາມະການເສດຖະກິດ, ແຜນການ ແລະການເງິນ, ພ້ອມດ້ວຍບັນດາ  ຄະນະເລຂາຊາວໜຸ່ມໜ່ວຍ, ຄະນະປະທານກໍາມະບານໜ່ວຍ ແລະຄະນະປະທານແມ່ຍິງໜ່ວຍ ຕະຫຼອດຮອດສະມາຊິກ 03 ອົງການຈັດຕັ້ງມະຫາຊົນຂອງ ສະພາປະຊາຊົນແຂວງໄຊສົມບູນ ທຸກສະຫາຍ ເຂົ້າຮ່ວມຢ່າງພ້ອມພຽງ.

ຈຸດປະສົງ ເຂົ້າຮ່ວມຂະບວນການອອກແຮງງານ ໃນຄັ້ງນີ້ແມ່ນ ຂະບວນການດັ່ງກ່າວ ໄດ້ອະນາໄມ, ຕັດຫຍ້າຖາງປ່າ ຢູ່ເສັ້ນທາງ ແລະ ຝາກຕ້ານເຈື່ອນ ລຽບແຄມແມ່ນໍ້າຈັ້ງ ເຊິ່ງເລີ່ມແຕ່ຂົວເບຕົ່ງ I ໃນເທດສະບານ ບ້ານພູຫົວຊ້າງ ຫາ ຖໍ້າເຈົ້າອະນຸວົງ ເຊິ່ງນີ້ກໍເພື່ອ ເປັນການເຂົ້າຮ່ວມຂະບວນການ ອອກແຮງງານ ໃຫ້ຄຶກຄື້ນ ໃນການຂໍ່ານັບຮັບຕ້ອນ ພິທີສົມໂພດຫໍຫຼັກເມືອງ ແລະຮູບປັ່ນຫຼໍ່ ເຈົ້າອະນຸວົງ ທີ່ຕິດພັນກັບ ກິດຈະກໍາສົ່ງເສີມການທ່ອງທ່ຽວ ຢູ່ແຂວງໄຊສົມບູນ ໃຫ້ມີຄວາມເປັນລະບຽບຮຽບຮ້ອຍ, ສະອາດງາມຕາ ແລະ 03 ອົງການຈັດຕັ້ງມະຫາຊົນຂອງ ສະພາປະຊາຊົນແຂວງໄຊສົມບູນ ໄດ້ມີຄວາມຮັບຜິດຊອບສູງ ປະຕິບັດຈັດຕັ້ງ ອະນາໄມ, ຕັດຫຍ້າລຽບນໍ້າຈັ້ງ ຕາມຂອບເຂດທີ່ຂັ້ນເທິງ ມອບໝາຍໄວ້ໃຫ້ຈົນສໍາເລັດຕາມໜ້າທີ່.

(ນາງ ອໍາໄພພອນ ແກ້ວວິໄລ)