ໃນລະຫວ່າງວັນທີ 29 ຫາ 30 ກໍລະກົດ 2024 ນີ້, ຢູ່ທີ່ຫ້ອງປະຊຸມເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມ ຝຶກອົບຮົມການສ້າງ ແລະ ປັບປຸງນິຕິກໍາໃຕ້ກົດໝາຍ ໂດຍການເປັນປະທານຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານສະພາປະຊາຊົນແຂວງ ໄຊຍະບູລີ ໃຫ້ກຽດເຂົ້າຮ່ວມ ມີບັນດາສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ7 ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 11 ເມືອງ ໃນທົ່ວແຂວງ, ມີຫົວໜ້າ -ຮອງຫົວໜ້າພະແນກການ, ອົງການພ້ອມດ້ວຍນັກວິທະຍາກອນທີ່ມາຈາກຫ້ອງວ່າແຂວງ ແລະ ພະແນກຍຸຕິທໍາແຂວງ ແລະ ພະນັກງານ-ວິຊາການພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ຈຸດປະສົງໃນການຈັດຝຶກອົບຮົມຄັ້ງນີ້ ກໍເພື່ອສ້າງຄວາມເຂັ້ມແຂງ ໃຫ້ແກ່ສະມາຊິກສະພາປະຊາຊົນແຂວງ ແລະ ເສນາທິການຊ່ວຍວຽກຂອງສະພາປະຊາຊົນແຂວງ ພ້ອມທັງເປັນການຍົກລະດັບຄວາມຮູ້, ຄວາມສາມາດ ໃນການຈັດຕັ້ງປະຕິບັດໜ້າທີ່ວຽກງານໃນສາມພະລະບົດ ບາດ ຕົ້ນຕໍຂອງສະພາປະຊາຊົນແຂວງ ທີ່ໄດ້ກໍານົດໄວ້ ຄືດ້ານນິຕິບັນຍັດແມ່ນສ້າງ ແລະ ປັບປຸງນິຕິກໍາໃຕ້ກົດໝາຍ, ດ້ານການຕົກລົງບັນຫາພື້ນຖານສໍາຄັນຂອງແຂວງ ເປັນຕົ້ນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ແລະ ດ້ານການຕິດຕາມກວດກາການຈັດຕັ້ງປະຕິບັດ ລັດຖະທໍາມະນູນ, ກົດໝາຍ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ພາຍໃນແຂວງ.
ຊຶ່ງໃນກອງປະຊຸມແມ່ນໄດ້ຮັບຟັງການນໍາສະເໜີ ແລະ ບັນຍາຍເນື້ອໃນເອກະສານຈາກນັກວິທະຍາກອນທີ່ມີຄວາມຮູ້, ຄວາມສາມາດ, ມີປະສົບການຕົວຈິງຈາກຂັ້ນແຂວງ ປະກອບມີ 2 ຫົວຂໍ້ ກວມເອົາ 6 ເນື້ອໃນຄື: ຄໍາແນະນໍາ ຂອງຄະນະປະຈໍາສະພາປະຊາຊົນແຂວງ ກ່ຽວກັບຂັ້ນຕອນການສ້າງ ແລະ ປັບປຸງນິຕິກໍາໃຕ້ກົດໝາຍ ສະບັບເລກທີ 102/ຄປຈ.ຊຍ, ລົງວັນທີ 25 ກໍລະກົດ 2023; ການສ້າງແຜນການສ້າງຂໍ້ຕົກລົງ, ການສ້າງຂໍ້ຕົກລົງ, ການພິຈາລະນາ ແລະ ຮັບຮອງເອົາ ຂໍ້ຕົກລົງ(ຂອງທ່ານເຈົ້າແຂວງ) ໂດຍສະພາປະຊາຊົນແຂວງ; ການປັບປຸງຂໍ້ຕົກລົງ ( ຂອງທ່ານເຈົ້າແຂວງ); ການກວດກາຄວາມສອດຄ່ອງ ຂອງຮ່າງຂໍ້ຕົກລົງ ໂດຍພະແນກຍຸຕິທໍາແຂວງ; ການພິຈາລະນາຮ່າງຂໍ້ຕົກລົງໂດຍອົງການປົກຄອງແຂວງ ແລະ ການລົງລາຍເຊັນປະກາດໃຊ້ໂດຍເຈົ້າແຂວງ ແລະ ການສ້າງຮ່າງມະຕິກອງປະຊຸມສະພາປະຊາຊົນແຂວງ ແລະ ຮ່າງມະຕິກອງປະຊຸມຂອງຄະນະປະຈໍາສະພາປະຊາຊົນແຂວງ.
ຈາກນັ້ນ, ນັກສໍາມະນາກອນທີ່ເຂົ້າຮ່ວມກອງປະຊຸມ ກໍໄດ້ຄົ້ນຄ້ວາແລກປ່ຽນບົດຮຽນ ພ້ອມທັງປະກອບຄໍາຄິດ-ຄໍາເຫັນຢ່າງກົງໄປກົງມາ ໃນແຕ່ລະຫົວຂໍ້ທີ່ນໍາມາສະເໜີ ເຮັດໃຫ້ມີເນື້ອໃນເລິກເຊິ່ງ ແລະສາມາດນໍາໄປໜູນໃຊ້ເຂົ້າໃນວຽກງານຕົວຈິງໃຫ້ເກິດດອກອອກຜົນ ເຮັດໃຫ້ແຜນການຈັດຝຶກອົບຮົມໃນຄັ້ງນີ້ໄດ້ຮັບຜົນສໍາເລັດຕາມຈຸດປະສົງ ແລະລະດັບຄາດໝາຍທີ່ວາງໄວ້.
ກອງປະຊຸມຝຶກອົບຮົມໃນຄັ້ງນີ້ ແມ່ນໄດ້ຮັບການສະໜັບ ສະໜູນໂດຍ: ການສ້າງຄວາມເຂັມແຂງດ້ານການສ້າງນິຕິກໍາ ແລະ ການສ້າງມະຕິຂອງສະພາປະຊາຊົນແຂວງ ໃຫ້ອົງການນິຕິບັນຍັດ ແລະ ອົງການປົກຄອງທ້ອງຖິ່ນ (STEPS).
ໂດຍ: ອິນທີ ຂຽວສີຟ້າ