ໃນວັນທີ 21 ກັນຍາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດຕັ້ງເຊື່ອມຊືມເອກະສານສໍາຄັນຂອງພັກ-ຂອງຊາດ ໂດຍການເປັນປະທານ ຂອງທ່ານ ບຸນໂຮມ ເທດທານີ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະພັກສະພາປະຊາຊົນແຂວງ, ປະທານ-ຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ.

ໃນພິທີບັນດາທ່ານຄະນະປະຈໍາສະພາປະຊາຊົນແຂວງ ໄດ້ຜັດປ່ຽນກັນຂຶ້ນບັນລະຍາຍບັນດາເອກະສານທີ່ສໍາຄັນຂອງພັກ-ຂອງຊາດ ເຊິ່ງເນື້ອໃນເອກະສານທີ່ນໍາມາຈັດຕັ້ງເຊື່ອມຊືມໃຫ້ພະນັກງານສະພາປະຊາຊົນແຂວງໄດ້ຮັບຮູ້ ແລະ ເຂົ້າໃຈມີຄື: ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 4 ສະໄໝທີ XI, ບົດສະຫລຸບການຕີລາຄາການປະຕິບັດວຽກງານພົ້ນເດັ່ນໄລຍະ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2022 ຂອງລັດຖະບານ, ມະຕິວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດມະຕິຂອງສະພາແຫ່ງຊາດສະບັບເລກທີ 55/ສພຊ, 58/ສພຊ, 62/ສພຊ, ລົງວັນທີ 8 ກໍລະກົດ 2022, ມະຕິກອງປະຊຸມຄະນະບໍລິຫານງານພັກແຂວງຊຽງຂວາງ ເປີດກ້ວາງຄັ້ງທີ 5 ສະໄໝທີ VIII, ມະຕິກອງປະຊຸມເປີດກ້ວາງອົງການປົກຄອງແຂວງຂຽງຂວາງ

ເພື່ອໃຫ້ພະນັກງານສະພາປະຊາຊົນແຂວງ ໄດ້ຮັບຮູ້, ເຊື່ອມຊືມ ແລະ ກຳແໜ້ນເນື້ອໃນມະຕິກອງປະຊຸມຄົບຄະນະບໍລະຫານງານສູນກາງພັກຄັ້ງທີ 4 ສະໄໝທີ XI, ເພື່ອຍົກສູງຄວາມຮັບຜິດຊອບທາງດ້ານການເມືອງໃນການຈັດຕັ້ງປະຕິບັດມະຕິໃຫ້ປະກົດຜົນເປັນຈິງ ແລະ ທັນຕາມກຳນົດເວລາທີ່ໄດ້ກຳນົດໄວ້ ແລະ ເພື່ອເປັນບ່ອນອີງໃຫ້ເລຂາໜ່ວຍພັກຂອງສະພາປະຊາຊົນແຂວງໃນການຜັນຂະຫຍາຍມະຕິດັ່ງກ່າວໃຫ້ເປັນແຜນງານ, ໂຄງການລະອຽດ ໂດຍຕິດພັນກັບວຽກງານຕົວຈິງຂອງສະພາປະຊາຊົນແຂວງ ບົນຈິດໃຈຍູ້ແຮງເສີມຂະຫຍາຍໃນການຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິ່ງໃຫ້ຟົດຟື້ນ, ສ້າງການຫັນປ່ຽນທາງດ້ານຄວາມຮັບຮູ້, ທັກສະ, ແນວຄິດ ແລະ ການກະທໍາຂອງພະນັກງານສະພາປະຊາຊົນແຂວງ, ສ້າງຄວາມເຊື່ອໝັ້ນຂອງສະມາຊິກພັກ-ພະນັກງານຕໍ່ການຊີ້ນໍາ-ນໍາພາຂອງພັກ ແລະ ການບໍລິຫານຄຸ້ມຄອງຂອງລັດ.

ໃນພິທີ ທ່ານ ບຸນໂຮມ ເທດທານີ ໄດ້ມີຄໍາເຫັນໂອ້ລົມຕໍ່ພີທີກໍຄືສະມາຊິກພັກ-ພະນັກງານສະພາປະຊາຊົນແຂວງ ຈົ່ງນໍາເອົາເນື້ອໃນເອກະສານທີ່ໄດ້ເຊື່ອມຊືມນັ້ນໄປຈັດຕັ້ງຜັນຂະຫຍາຍໃຫ້ເປັນແຜນວຽກງານອັນລະອຽດ, ສືບຕໍ່ເນັ້ນໃຫ້ພະນັກງານສະພາປະຊາຊົນແຂວງ ​ໃຫ້ມີຄຸນທາດການເມືອງໜັກແໜ້ນ, ໃຫ້ມີສະຕິຕໍ່ການຈັດຕັ້ງ, ປັບປຸງ​ແບບ​ແຜນ​ວິທີ​ເຮັດ​ວຽກໃຫ້ດີຂຶ້ນກວ່າເກົ່າ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ