ຕອນບ່າຍຂອງວັນທີ 13 ມີຖຸນາ 2023 ທີ່ຫ້ອງປະຊຸມ ສະພາປະຊາຊົນແຂວງອຸດົມໄຊ ໄດ້ຈັດກອງປະຊຸມພົບປະ ລະຫວ່າງ ສະພາປະຊາຊົນແຂວງ(ສພຂ) ແລະ ອົງການກວດສອບພາກເໜືອ 2 ປະຈໍາແຂວງອຸດົມໄຊ, ໂດຍການເປັນປະທານຂອງ ທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ, ມີຄະນະປະຈໍາສະພາປະຊາຊົນແຂວງ, ຄະນະກໍາມະການເສດຖະກິດ, ແຜນການ ແລະ ການເງິນ, ອົງການກວດສອບພາກເໜືອ 2 ນໍາໂດຍ ທ່ານ ອິນທາ ລືນາມມະຈັກ ປະທານອົງການກວດສອບພາກເໜືອ 2 ພ້ອມດ້ວຍຄະນະເຂົ້າຮ່ວມ.
ກອງປະຊຸມໄດ້ຮັບຟັງການຜ່ານຂໍ້ຕົກລົງ ການແຕ່ງຕັ້ງຜູ້ຊີ້ນໍາ ແລະ ຄະນະກວດສອບແຫ່ງລັດດໍາເນີນການກວດສອບບົດສະຫຼຸບຂາດຕົວການຈັດຕັ້ງແຜນງົບປະມານແຫ່ງລັດປະຈໍາປີ 2022 ຂອງແຂວງອຸດົມໄຊ ແລະ ບົດທົບທວນຄືນ ການຈັດຕັ້ງປະຕິບັດຄໍາແນະນໍາຜົນການກວດສອບປີ 2021 ແລະ ແຜນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2022 ຂອງແຂວງອຸດົມໄຊ, ຄະນະກວດສອບຈະໄດ້ລົງເລິກດໍາເນີນການກວດສອບມີ 16 ຫົວໜ່ວຍ, ກວດຄືນຕາມມະຕິທີ່ສະພາໄດ້ຮັບຮອງ ແລະ ກວດຄືນຕາມຄໍາແນະນໍາກວດສອບປີຜ່ານມາ 2 ຫົວໜ່ວຍ ໄລຍະເວລາການກວດສອບແມ່ນ 30 ວັນ, ເປົ້າໝາຍກວດສອບຄືນ 2 ເປົ້າໝາຍ ແລະ ກວດສອບໃນປີ 2022 ມີ 16 ເປົ້າໝາຍ.
ພ້ອມດຽວກັນນັ້ນ, ສອງພາກສ່ວນຍັງໄດ້ມີຄໍາຄິດຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ.
ພາບ/ຂ່າວ: ນັກຂ່າວ ສພຂ.