ຕອນເຊົ້າຂອງວັນອັງຄານ, ວັນທີ 6 ກັນຍາ 2022 ທີ່ຫ້ອງປະຊຸມສະພາປະຊາຊົນແຂວງ, ສະພາປະຊາຊົນແຂວງອຸດົມໄຊ ໄດ້ປຶກສາຫາລືວຽກງານການຊ່ວຍເຫຼືອໄພພິບັດນໍ້າຖ້ວມ ຂອງສະພາປະຊາຊົນແຂວງ, ໂດຍການເປັນປະທານຂອງທ່ານ ທອງໄຊ ທໍ່ຈົງເລ່ຍຈີ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການເສດຖະກິດ, ແຜນການ ແລະ ການເງີນ, ມີຮອງປະທານຄະນະກໍາມະການ, ຮອງເລຂາທິການ ແລະ ພະນັກງານສະພາປະຊາຊົນແຂວງເຂົ້າຮ່ວມ.

ກອງປະຊຸມໄດ້ຜ່ານມະຕິຕົກລົງຂອງຄະນະປະຈໍາສະພາປະຊາຊົນແຂວງ ວ່າດ້ວຍການແຕ່ງຕັ້ງ ຄະນະຮັບຜິດຊອບ ວຽກງານຜົນກະທົບໄພພິບັດນໍ້າຖ້ວມ ຂອງສະພາປະຊາຊົນແຂວງ ຈຸດປະສົງກໍ່ເພື່ອປຶກສາຫາລື, ແບ່ງຄວາມຮັບຜິດຊອບທີ່ຈໍາເປັນ ແລະ ວຽກງານທີ່ຮີບດ່ວນກໍ່ຄື: ການຈັດເຄື່ອງຊ່ວຍເຫຼືອທີ່ພາກສ່ວນຕ່າງໆມອບໃຫ້ສະພາປະຊາຊົນແຂວງ ເພື່ອນໍາໄປມອບໃຫ້ແກ່ປະຊາຊົນທີ່ຖືກຜົນກະທົບຈາກໄພພິບັດນໍ້າຖ້ວມ ຢູ່ບາງເມືອງໃນແຂວງອຸດົມໄຊ ໃຫ້ທັບກັບຄວາມຮຽກຮ້ອງຕ້ອງການ. ເຊິ່ງໄລຍະທີ່ຜ່ານມາທາງສະພາປະຊາຊົນແຂວງກໍ່ໄດ້ລະດົມທຶນຊ່ວຍເຫຼືອໃນເບື້ອງຕົ້ນເພື່ອບັນເທົາທຸກ ມາຮອດປັດຈຸບັນນີ້, ແມ່ນກໍາລັງຟື້ນຟູຜົນກະທົບຈາກໄພພິບັດດັ່ງກ່າວ.

ຫຼັງຈາກນັ້ນ, ກອງປະຊຸມໄດ້ປຶກສາຫາລືກັນຢ່າງກັນກົງໄປກົງມາ ເພື່ອຄວາມເປັນເອກະພາບໃນການຈັດຕັ້ງປະຕິບັດບັນດາໜ້າວຽກທີ່ຖືກແຕ່ງຕັ້ງ ໃຫ້ໄດ້ຮັບປະສິດທິພາບ, ປະສິດທິຜົນ ແລະ ທັນກັບສະພາບການ.ພາບ/ຂ່າວ: ແສງພອນ ອິນນະລົງ.