ຕອນເຊົ້າຂອງວັນອັງຄານ, ວັນທີ 17 ພຶດສະພາ 2022 ຢູ່ທີ່ຫ້ອງປະຊຸມອົງການໄອຍະການປະຊາຊົນແຂວງ, ສະພາປະຊາຊົນແຂວງອຸດົມໄຊ ໄດ້ຈັດກອງປະຊຸມທາບທາມຮ່າງກົດໝາຍຈຳນວນ 2 ສະບັບຄື: ຮ່າງກົດໝາຍວ່າດ້ວຍການປັບປຸງບາງມາດຕາ ວ່າດ້ວຍສານປະຊາຊົນ ແລະ ຮ່າງກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ, ໂດຍການເປັນປະທານຂອງທ່ານ ຄໍາເຜີຍ ງອນວັນຄຳ ກຳມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 04 ອຸດົມໄຊ, ທ່ານ ຄໍາຜົງ ບັນເລືອງ ປະທານສານປະຊາຊົນແຂວງ ພ້ອມດ້ວຍຄະນະ, ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ, ຫົວໜ້າ-ຮອງຫົວໜ້າພະແນກ ພ້ອມດ້ວຍຄະນະ, ສະມາຊິກ ສພຂ, ຄະນະຮັບຜິດຊອບ ແລະ ວິຊາການຂະແໜງກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມທາບທາມຮ່າງກົດໝາຍ ຈຳນວນ 2 ສະບັບຄັ້ງນີ້ ແມ່ນປະຕິບັດຕາມແຈ້ງການຂອງຄະນະປະຈໍາ ສພຊ ວ່າດ້ວຍການຈັດຕັ້ງທາບທາມບັນດາກົດໝາຍ ທີ່ຈະນໍາເຂົ້າຄົ້ນຄວ້າພິຈາລະນາ ແລະ ຮັບຮອງເອົາ ໃນວາລະກອງປະຊຸມສະໄໝສາມັນເທື່ອທີ 3 ຂອງ ສພຊ ຊຸດທີ IX ແລະ ເພື່ອແນ່ໃສ່ເຮັດໃຫ້ບັນດາກົດໝາຍທີ່ນຳມາທາບທາມຄັ້ງນີ້ມີເນື້ອໃນຄົບຖ້ວນ, ສົມບູນ, ຮັດກຸມ ແລະ ສາມາດນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ.

ບາງເນື້ອໃນທີນໍາມາທາບທາມຕາມຄໍາຖາມເຈາະຈີ້ມມີຄື: ມາດຕາ 21 ສິດ ແລະ ໜ້າທີ່ຂອງສານປະຊາຊົນສູງສຸດ ໄດ້ປັບປຸງເນື້ອໃນໂດຍເພີ່ມບາງສິດເຂົ້າຕື່ມເປັນຕົ້ນຂໍ້: 6, 8, 9, 15 ແລະ ມາດຕາ 16 ນັ້ນ ບັນດາທ່ານເຫັນວ່າສອດຄ່ອງ ແລະ ເໝາະສົມແລ້ວບໍ່ ເນື່ອງຈາກວ່າການກຳນົດເຂົ້າໃໝ່ນີ້ ແມ່ນມີເນື້ອໃນບໍ່ທັນສອດຄ່ອງກັບກົດໝາຍ ແລະ ການຈັດຕັ້ງປະຕິບັດຕົວຈິງເທື່ອ. ມາດຕາ 37 ການເລືອກຕັ້ງ, ແຕ່ງຕັ້ງ, ຍົກຍ້າຍ, ສັບປ່ຽນ ຫຼື ປົດຕຳແໜ່ງ ໄດ້ປັບປຸງເນື້ອໃນວັກທີ 2, ໃຫ້ມີຄວາມຄົບຖ້ວນ ແລະ ຮັດກຸມຕື່ມ, ພ້ອມກັນນັ້ນ ກໍໄດ້ເພີ່ມວັກທີ 5 ເຂົ້າຕື່ມ ເພື່ອໃຫ້ສອດຄ່ອງກັບກຳນົດເຂົ້າໃໝ່ໃນມາດຕາ 21; ມາດຕາ 38 ສິດ ແລະ ໜ້າທີ່ຂອງປະທານສານປະຊາຊົນສູງສຸດ ໄດ້ປັບປຸງຂໍ້ 2, 4 ແລະ 12 ໃຫ້ມີຄວາມຄົບຖ້ວນ ແລະ ຮັດກຸມ, ພ້ອມກັນນັ້ນ ກໍເພີ່ມຂໍ້ 13 ເຂົ້າໃໝ່ ເພື່ອໃຫ້ສອດຄ່ອງກັບການກໍານົດໃນມາດຕາ 21 ແລະ 37 ຕໍ່ກັບການປັບປຸງເນື້ອໃນຂອງ 3 ມາດຕານີ້ ບັນດາທ່ານເຫັນວ່າມີຄວາມຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ແລ້ວບໍ່ ແລະ ບາງເນື້ອໃນບັນຫາທີ່ສໍາຄັນອີກຈໍານວນໜຶ່ງ.

ຈາກນັ້ນຜູ້ແທນກອງປະຊຸມໄດ້ປະກອບຄໍາຄິດຄໍາເຫັນຕາມຄໍາຖາມເຈາະຈີ້ມດັ່ງກ່າວຢ່າງກົງໄປກົງມາ, ກອງປະຊຸມຄັ້ງນີ້ແມ່ນຈະດໍາເນີນເປັນເວລາ 1 ວັນ.

(ພາບ-ຂ່າວ: ແສງພອນ ອິນນະລົງ).