ໃນຕອນເຊົ້າ ຂອງວັນທີ 7 ມີນາ 2023 ນີ້, ທ່ານ ສົມພອນ ສີອຸດົມພັນ ກຳມະການພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6 ພ້ອມດ້ວຍຄະນະ ໄດ້ອອກຕ້ອນຮັບ ຄະນະສະພາຊົນຊາດ ສະພາແຫ່ງຊາດ ແຫ່ງ ສສຫວຽດນາມ ເຊິ່ງນໍາໂດຍ ທ່ານ ອີ ແທັງ ຮາ ນຽກ ເກີ ດໍາ, ກໍາມະການສູນກາງພັກ, ກໍາມະການຄະນະປະຈໍາສະພາແຫ່ງຊາດ ຊຸດທີ XV, ປະທານສະພາຊົນຊາດ ສະພາແຫ່ງຊາດ ແຫ່ງ ສສຫວຽດນາມ, ມີຄະນະຕິດຕາມ

ຂອງສະພາແຫ່ງຊາດ ເຊິ່ງນໍາໂດຍທ່ານ ແກ້ວຈະເລີນ ເຊ່ຍຢິ້ງຢ່າງ, ຮອງປະທານກໍາມາທິການບັນດາເຜົ່າ ສະພາແຫ່ງຊາດ ຢູ່ສະຖານີລົດໄຟ ລາວ–ຈີນ ແຂວງຫຼວງພະບາງ ທີ່ໄດ້ມາຢ້ຽມຢາມ ແລະ ແລກປ່ຽນບົດຮຽນ ຢູ່ແຂວງຫຼວງພະບາງ; ໃນຕອນແລງ ຂອງວັນດຽວກັນ, ເວລາ14:00 ໂມງ, ທ່ານ ສົມພອນ ສີອຸດົມພັນ ພ້ອມດ້ວຍຄະນະ ກໍໄດ້ເຂົ້າຮ່ວມພິທີພົບປະ ລະຫວ່າງ ທ່ານ ອີ ແທັງ ຮາ ນຽກ ເກີ ດໍາແລະ ທ່ານ ຄໍາຂັນ ຈັນທະວີສຸກ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ–ແຂວງຫຼວງພະບາງຢູ່ຫ້ອງຮັບແຂກ ຂອງຫ້ອງວ່າການແຂວງ, ນອກຈາກນີ້ ຄະນະສະພາຊົນຊາດ ສະພາແຫ່ງຊາດ ແຫ່ງ ສສ ຫວຽດນາມ ກໍຍັງໄດ້ເດີນທາງຢ້ຽມຊົມ ສະຖານທີ່ທາງດ້ານວັດທະນະທຳ, ຮີດຄອງປະເພນີ ແລະ ການທ່ອງທ່ຽວ ຂອງຊາວຫຼວງພະບາງ ເຊັ່ນ: ຫໍພິພິທະພັນ, ວັດຊຽງທອງ, ຕາດກວາງຊີ ແລະ ຕະຫຼາດກາງຄືນ.

 ພາບ ແລະ ຂ່າວ ສຸດາກອນໂພສະຫວັດ