ເພື່ອຕີລາຄາການຈັດຕັ້ງປະຕິບັດວຽກງານໃນໄລຍະ 1 ປີ ຜ່ານມາ ໃນຕອນເຊົ້າຂອງວັນທີ 5 ພະຈິກ 2024 ສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມ ປະເມີນຜົນການຈັດຕັ້ງປະຕິບັດວຽກງານ ພະນັກງານ-ລັດຖະກອນ ປະຈໍາປີ 2024 ໃນຂົງເຂດ 3 ຄະນະກໍາມະການ ພາຍໃນສະພາປະຊາຊົນແຂວງ ຂື້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານ ຂອງທ່ານ ຄຳພອນ ເຕີ່ນຈະເລີນ  ຄະນະປະຈຳສະພາປະຊາຊົນແຂວງ ປະທານຄະນະກຳມະການເສດຖະກິດ,ແຜນການ ແລະ ການເງິນ, ເຂົ້າຮ່ວມມີບັນດາທ່ານຫົວຫນ້າ-ຮອງຫົວຫນ້າຂະແໜງ ພ້ອມດ້ວຍວິຊາການພາຍໃນ 3 ຄະນະກໍາມະການຂອງສະພາປະຊາຊົນແຂວງເຂົ້າຮ່ວມທັງໝົດ 14 ທ່ານ, ຫລັງຈາກນັ້ນບັນດາທ່ານທີ່ເຂົ້າຮ່ວມການປະເມີນໄດ້ຜັດປ່ຽນກັນຂຶ້ນຜ່ານໃບເກັບກ່ຽວຜົນສຳເລັດໃນການຈັດຕັ້ງປະຕິບັດວຽກງານໃນໄລຍະ1ປີຜ່ານມາຂອງຕົນ ພ້ອມນັ້ນບັນດາທ່ານໄດ້ພ້ອມກັນມີຄຳເຫັນແລກປ່ຽນ ຕຳນິສົ່ງຂ່າວ ແລະ ຊອກຫາວິທີທາງແກ້ໄຂເຊິ່ງກັນແລະກັນ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດໜ້າທີ່ມີປະສິດທິພາບຂຶ້ນກວ່າເກົ່າ.

ແລະ ໃນຕອນບ່າຍຂອງວັນດຽວກັນໄດ້ມີການປະເມີນຄະນະນຳພາຍໃນສະພາປະຊາຊົນແຂວງ ໂດຍການເປັນປະທານຂອງທ່ານ ນາງ ອຸ່ນຫຼ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ເຊິ່ງມີຜູ້ເຂົ້າຮ່ວມປະເມີນຈຳນວນ 6 ທ່ານຄື ຄະນະເລຂາທິການ 3 ທ່ານ ແລະ ປະທານຄະນະກຳມະການ 3 ທ່ານ.

ໃນວັນທີ 7 ພະຈິກ 2024 ໄດ້ມີການປະເມີນພະນັກງານ-ລັດຖະກອນ ພາຍໃນຂົງເຂດຄະນະເລຂາທິການ ໂດຍການເປັນປະທານ ຂອງ ທ່ານ ຂັດ ໝັ້ນທະໄລ ຮອງເລຂາທິການສະພາປະຊາຊົນແຂວງ ເຂົ້າຮ່ວມມີ ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານ-ລັດຖະກອນ ພາຍໃນ  3ຂະແໜງໃນຄະນະເລຂາທິການເຂົ້າຮ່ວມທັງໝົດ 16 ທ່ານ ພ້ອມທັງຜັດປ່ຽນກັນຜ່ານໃບເກັບກ່ຽວຜົນສຳເລັດໃນການຈັດຕັ້ງປະຕິບັດວຽກງານໃນໄລຍະ1ປີຜ່ານມາຂອງຕົນ ພ້ອມທັງແລກປ່ຽນຄຳຄິດເຫັນ, ຕຳນິສົ່ງຂ່າວເຊິ່ງກັນ ແລະ ກັນ ເສີມຂະຫຍາຍດ້ານດີ ແລະ ປັບປຸງດ້ານຄົງຄ້າງ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີປະສິດທິພາບ ແລະ ປະສິດທິຜົນກວ່າເກົ່າ ພ້ອມທັງເປັນການຕີລາຄາດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ດ້ານຄວາມຮູ້ຄວາມສາມາດ ແລະ ປະສົບການ ແລະ ດ້ານຜົນສຳເລັດໃນການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ແລະ ຕີລາຄາດ້ານດີ ແລະ ຂໍ້ຄົງຄ້າງ, ວິທີປັບປຸງ ແລະ ແກ້ໄຂ ພ້ອມທັງໃຫ້ຄະແນນ, ຈັດປະເພດຕົນເອງ ແລະ ເພື່ອນຮ່ວມງານ.

ໂດຍ ນາງ ອຳພອນ ສີປະເສີດ