(ສພຊ) ວັນທີ 7 ສິງຫາ 2018 ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງຫົວພັນ ໄດ້ຕ້ອນຮັບການຢ້ຽມຢາມຂອງທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ແຂວງຫົວພັນ ຢ່າງເປັນທາງການ ໃນລະຫວ່າງວັນທີ  6-8 ສິງຫາ 2018 ໂດຍການຕ້ອນຮັບຂອງທ່ານ ຄຳວອນ ບຸນທະວົງ ຮອງເລຂາພັກແຂວງ, ປະທານສະພາປະຊາຊົນແຂວງ ມີບັນດາຄະນະປະຈໍາ, ຄະນະເລຂາທິການ ຕະຫລອດຮອດພະນັກງານວິຊາການເຂົ້າຮ່ວມ.

ການເດີນທາງມາຢ້ຽມຢາມໃນຄັ້ງນີ້, ປະທານສະພາແຫ່ງຊາດ ພ້ອມດ້ວຍຄະນະ ໄດ້ຮັບຟັງລາຍງານສະພາບພົ້ນເດັ່ນໃນການຈັດຕັ້ງການເຄື່ອນໄຫວວຽກງານສະພາປະຊາຊົນແຂວງໃນໄລຍະເຄິ່ງສະໄໝ ຈາກທ່ານ ນາງ ອຳໄພວອນ ລ້ອມບຸນແພງ ກຳມະການພັກແຂວງ ຮອງປະທານສະພາປະຊາຊົນແຂວງ ເຊິ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກໃນໄລຍະຜ່ານມາ; ຫລັງຈາກນັ້ນ, ກໍໄດ້ມີການແລກປ່ຽນບົດຮຽນນຳກັນ ໂດຍສະເພາະລະຫວ່າງສະພາແຫ່ງຊາດ ແລະ ສະພາປະຊາຊຂັ້ນແຂວງ ເປັນຕົ້ນ ການປະຕິບັດພາລະບົດບາດຂອງສະພາປະຊາຊົນແຂວງ ໃນການພິຈາລະນາ ແລະ ຮັບຮອງເອົາບັນດານິກຳຕະຫລອດຮອດກົດລະບຽບຕ່າງໆຂອງແຂວງ

ໃນຕອນທ້າຍ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດໃນໄລຍະຜ່ານມາ ພ້ອມທັງຮຽກຮ້ອງໃຫ້ບັນດາທ່ານຄະນະປະຈຳສະພາປະຊາຊົນແຂວງ ເອົາໃຈໃສ່ຊີ້ນຳ-ນຳພາກົງຈັກຂອງຕົນເອງ ໃນການຈັດຕັ້ງປະຕິບັດພາລະບົດບາດໃຫ້ມີຄວາມເຂັ້ມແຂງ ສ້າງນິຕິກໍາຂອງຕົນເອງເພື່ອເປັນບ່ອນອີງ ໃນການຈັດຕັ້ງປະຕິບັດ ແລະ ປັບປຸງແບບແຜນວິທີເຮັດວຽກ ແລະ ກົນໄກການປະສານງານກັບອົງການປົກຄອງແຂວງ ໃຫ້ມີປະສິດທິຜົນສູງຂຶ້ນກວ່າເກົ່າ.

(ທ ທັດ ແກ້ວຄຳຈັນ)