ຕອນເຊົ້າຂອງວັນທີ 14 ກໍລະກົດ 2022 ນີ້ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຫລວງນໍ້າທາ ຮ່ວມກັບພະແນກຊັບພະກອນທຳມະຊາດ ແລະ ສິ່ງແວດລ້ອມແຂວງຫລວງນໍ້າທາ ໄດ້ເປີດກອງປະຊຸມປຶກສາຫາລືກ່ຽວກັບຮ່າງຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງສິ່ງເສດເຫລືອຂຶ້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານຂອງ ທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3 ແຂວງຫລວງນໍ້າທາ ປະທານຄະນະກຳມະການຍຸຕິທຳ ແລະ ປກຊ-ປກສ ເຂົ້າຮ່ວມມີບັນດາທ່ານຜູ້ຮັບຜິດຊອບການສ້າງຮ່າງຂໍ້ຕົກລົງຂອງເຈົ້າແຂວງຈາກພະແນກຊັບພະຍາກອນທຳມະຊາດ ແລະ ສິ່ງແວດລ້ອມ   , ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານລັດຖະກອນທີ່ກ່ຽວຂ້ອງເຂົ້າຮ່ວມທັງໝົດ 13 ທ່ານ.

ຂໍ້ຕົກລົງວ່າດ້ວຍການຄຸ້ມຄອງສິ່ງເສດເຫລືອແມ່ນໄດ້ກຳນົດຫລັກການ, ລະບຽບ ມາດຕະການໃນການຄຸ້ມຄອງສິ່ງເສດເຫລືອ ພາຍໃນແຂວງ ເພື່ອເປັນການປົກປັກຮັກສາ, ຟື້ນຟູ ບູລະນະສິ່ງແວດລ້ອມໃຫ້ມີຄວາມສວຍສົດງົດງາມ, ຕົວເມືອງສະອາດງາມຕາ, ມີອາກາດບໍລິສຸດ ແລະ ປາສະຈາກການຖີ້ມສິ່ງເສດເຫລືອຊະຊາຍ, ເພື່ອຫລຸດຜ່ອນຜົນກະທົບຕໍ່ຊີວິດ, ສຸຂະພາບຄົນ, ສັດ, ພືດ ແລະ ລະບົບນິເວດ ເຊິ່ງຮ່າງຂໍ້ຕົກລົງສະບັບດັ່ງກ່າວມີທັງໝົດ 7 ໝວດ, 28 ມາດຕາ.

ໃນກອງປະຊຸມໄດ້ພ້ອມກັນປະກອບຄຳເຫັນແລກປ່ຽນທາງດ້ານເນື້ອໃນ, ຂັ້ນຕອນ ໃນແຕ່ລະມາດຕາ ເພື່ອເຮັດໃຫ້ຮ່າງຂໍ້ຕົກລົງສະບັບດັ່ງກ່າວມີເນື້ອໃນຄົບຖ້ວນສົມບູນ, ມີປະສິດທິພາບ ແລະ ປະສິດທິຜົນ, ນຳເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄຫມສາມັນເທື່ອທີ 3 ຂອງສະພາປະຊາຊົນແຂວງທີ່ຈະໄຂຂຶ້ນໃນຕໍ່ໜ້ານີ້.