ວັນທີ 8 ພະຈິກ 2024 ນີ້ ທ່ານ ນາງ ອຸ່ນຫລ້າ ອ້ຽງລໍລາດ ກໍາມະການພັກແຂວງ ຮອງປະທານສະພາປະຊາຊົນແຂວງ ຕາງໜ້າສະພາປະຊາຊົນແຂວງ ຫລວງນ້ຳທາ ໄດ້ສືບຕໍ່ນໍາເອົາເຄື່ອງນຸ່ງຫົ່ມ, ເຄື່ອງໃຊ້ສອຍທີ່ຈໍາເປັນ ແລະ ຢາຈໍານວນຫນຶ່ງ ລົງມອບໃຫ້ ຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນາແລ ແຂວງຫລວງນ້ຳທາ ເພື່ອໃຫ້ລົງຊ່ວຍເຫລືອພໍ່ແມ່ປະຊາຊົນທີ່ຖຶກຜົນກະທົບຈາກໄພນ້ຳຖ້ວມ, ໂອກາດນີ້ທ່ານ ທຳມະວົງ ບຸນຖາວອນ ຫົວໜ້າສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນາແລ ຍັງສະແດງຄວາມຂອບໃຈມາຍັງສະພາປະຊາຊົນແຂວງທີ່ເປັນຫ່ວງເປັນໄຍໄດ້ນຳເອົາເຄື່ອງລົງຊ່ວຍເຫລືອໃນຄັ້ງນີ້;

ໂອກາດດຽວກັນ ສາມອົງການຈັດຕັ້ງມະຫາຊົນມີ ກໍາມະບານຮາກຖານ, ສະຫະພັນແມ່ຍິງຮາກຖານ ແລະ ໜ່ວຍຊາວໜຸ່ມ ສະພາປະຊາຊົນແຂວງຫລວງນ້ຳທາ ໄດ້ນໍາເອົາເຄື່ອງນຸ່ງຫົ່ມ, ເຂົ້າສານ, ອາຫານແຫ້ງ ແລະ ເຄື່ອງໃຊ້ສອຍຕ່າງໆ ເພື່ອບັນເທົາທຸກຊ່ວຍເຫລືອໃຫ້ນ້ອງນ້ອຍນັກຮຽນຢູ່ໂຮງຮຽນຊົນເຜົ່າກີນນອນ ເມືອງນາແລ ແລະ ໂຮງຮຽນ ມສ ເມືອງນາແລ ແຂວງຫລວງນ້ຳທາ ທີ່ຖຶກຜົນກະທົບຈາກໄພນ້ຳຖ້ວມ ຊຶ່ງເຄື່ອງທີ່ລົງຊ່ວຍເຫລືອໃນຄັ້ງນີ້ລວມມູນຄ່າທັງໝົດ 150,000,000 ກີບ, ໂດຍເປັນເຄື່ອງຊ່ວຍເຫລືອຂອງກອງທຶນຊ່ວຍເຫລືອສັງຄົມສະພາແຫ່ງຊາດ ແລະ ເຄື່ອງຊ່ວຍເຫລືອຈາກນັກທຸລະກິດໜຸ່ມເມືອງຈັນມະບູລີ ນະຄອນຫລວງວຽງຈັນ.

ຂ່າວ: ວັນນີ ແຝງບົວວັນ