ລະຫວ່າງວັນທີ 9-10 ມີນາ 2023 ນີ້ ທ່ານ ຈັນທະສຸລິນ ໝັ້ນປະດິດ ສະມະຊິກສະພາແຫ່ງຊາດປະຈໍາເຂດເລືອກຕັ້ງທີ່ 3 ປະທານຄະນະກຳມະການຍຸຕິທຳ ປກຊ-ປກສ ຂອງສະພາປະຊາຊົນແຂວງຫລວງນ້ຳທາ ພ້ອມດ້ວຍ ທ່ານ ມີໄຊ ມີວິໄລ ສະມາຊິກສະພາປະຊາຊົນແຂວງ ເລຂາທິການສະພາປະຊາຊົນແຂວງ ພ້ອມດ້ວຍຄະນະ ໄດ້ພົບປະຢ້ຽມຢາມ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ່ 4 ຂອງສະພາແຫງຊາຊຸດທີ່ IX ແລະ ກອງປະຊູມສະໄໝສາມັນເທື່ອທີ່ 4 ສະພາປະຊາຊົນແຂວງຊຸດທີ່ II ຢູເມືອງວຽງພູຄາ ແຂວງຫຼວງນໍ້າທາ, ລວມທັງໝົດ 2 ຈຸດຄື: ບ້ານນ້ຳຕະແລງ ແລະ ບ້ານ ຕະສຸມ ເມືອງວຽງພູຄາ, ມີກໍາມະການພັກເມືອງ, ປກສ ກຸ່ມບ້ານ, ຄະນະພັກຮາກຖານກຸ່ມບ້ານ, ນາຍບ້ານ ພ້ອມດ້ວຍພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.
ໃນພິທີໄດ້ຮັບຟັງການເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທືອທີ 4 ຂອງສະພາແຫ່ງຊາດຊຸດທີ IX ເຊິ່ງກອງປະຊຸມໄດ້ ພິຈາລະນາ, ຮັບຮອງເອົາບັນຫາສຳຄັນຂອງຊາດຄື: ພິຈາລະນາຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດປະຈຳປີ 2022; ບົດລາຍງານ ຂອງລັດຖະບານ ກ່ຽວກັບການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021, ຄາດຄະເນການຈັດຕັ້ງປະຕິບັດ ແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2022; ບົດສະຫຼຸບການເຄື່ອນໄຫວວຽກງານ ປະຈຳປີ 2022, ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022; ບົດລາຍງານ ຂອງອົງການໄອຍະການປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022; ບົດລາຍງານ ຂອງສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022; ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານຂອງສະພາແຫ່ງຊາດ ປະຈຳປີ 2022 ແລະ ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 12 ສະບັບ. ພ້ອມນັ້ນ ໄດ້ຮັບຟັງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ສະພາປະຊາຊົນແຂວງຊຸດທີ II ເຊິ່ງກອງປະຊຸມໄດ້ພິຈາລະນາ, ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2022; ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານ ປະຈໍາປີ 2022; ບົດລາຍງານການເຄື່ອນໄຫວວຽກງານອົງການກວດສອບ ປະຈໍາພາກເໜືອ ປີ 2022 ແລະ ທິດທາງແຜນການ ປີ 2023, ບົດລາຍງານການເຄື່ອນໄຫວວຽກງານປະຈໍາປີ 2022 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ຂອງສະພາປະຊາຊົນແຂວງ ຊຸດທີ II ແລະ ພິຈາລະນາ, ພິຈາລະນາ ຮັບຮອງເອົາຂໍ້ຕົກລົງຂອງທ່ານເຈົ້າແຂວງ ຈໍານວນ 3 ສະບັບຄື ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແຂວງຫຼວງນ້າທາ; ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການພັດທະນາເຂດອຸດສາຫະກໍາ ແລະ ນິຄົມອຸດສາຫະກໍາ;ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງວຽກງານໄປສະນີ ພາຍໃນແຂວງຫຼວງນໍ້າທາ ນອກນັ້ນ ສະມາຊິກສະພາປະຊາຊົນແຂວງ ຍັງໄດ້ເນັ້ນໜັກໃຫ້ພໍ່ແມ່ປະຊາຊົນເອົາໃຈໃສ່ຈັດຕັ້ງປະຕິບັດສອງວາລະແຫ່ງຊາດ ເພື່ອເຮັດໃຫ້ບ້ານເມືອງມີຄວາມສະຫງົບ ແລະ ພ້ອມກັນ ສ້າງສາພັດທະນາບ້ານ, ພັດທະນາຄອບຄົວໃຫ້ຮັ່ງມີຂື້ນເປັນກ້າວໆ.