ເພື່ອເປັນການພົບປະແລກປ່ຽນ ບົດຮຽນໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ; ແລກປ່ຽນບົດຮຽນເຊິ່ງກັນ ແລະ ກັນ ສ້າງຄວາມເຂັ້ມແຂງໃຫ້ແກ່ສະພາປະຊາຊົນແຂວງໃນການປະຕິບັດ 3 ພາລະບົດບາດຂອງສະພາປະຊາຊົນ ແລະ ຮັດແໜ້ນຄວາມສາມັກຄີ, ລະຫວ່າງ ສະພາປະຊາຊົນແຂວງຫຼວງນໍ້າທາ ກັບສະພາປະຊາຊົນແຂວງສາລະວັນ.
ສະພາປະຊາຊົນແຂວງຫລວງນໍ້າທາກັບສະພາປະຊາຊົນແຂວງສາລະວັນ ໄດ້ຈັດກອງປະຊຸມພົບປະແລກປຽ່ນບົດຮຽນເຊີ່ງກັນ ແລະ ກັນ ໃນຕອນເຊົ້າຂອງວັນທີ 1 ເມສາ 2024 ຢູ່ທີ່ຫ້ອງປະຊຸມຂອງສະພາປະຊາຊົນແຂວງຫຼວງນໍ້າທາ ໂດຍການເປັນປະທານຮ່ວມຂອງທ່ານ ຄໍາຟອງ ອິນມານີ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ່3 ປະທານສະພາປະຊາຊົນແຂວງຫຼວງນໍ້າທາ ແລະ ທ່ານ ສີເຮັງ ຫອມສົມບັດ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ປະທານສະພາປະຊາຊົນແຂວງສາລະວັນ, ມີບັນດາ ທ່ານຄະນະປະຈຳສະພາປະຊາຊົນແຂວງຫລວງນ້ຳທາ ແລະ ແຂວງສາລະວັນ, ຄະນະເລຂາທິການ, ສະມາຊິກສະພາປະຊາຊົນແຂວງ, ປະທານ, ຮອງປະທານຄະນະກຳມະການ, ຫົວໜ້າ, ຮອງຫົວຫນ້າຂະແໜງ ພ້ອມດ້ວຍວິຊາການທັງສອງແຂວງເຂົ້າຮ່ວມທັງໝົດ 40 ກວ່າທ່ານ.
ໃນກອງປະຊຸມໄດ້ຮັບຟັງບົດລາຍງານຫຍໍ້ການເຄື່ອນໄຫວວຽກງານຂອງສະພາປະຊາຊົນແຂວງຫລວງນ້ໍາທາ ແລະ ສະພາປະຊາຊົນແຂວງສາລະວັນ; ພ້ອມນັ້ນທັງສອງແຂວງຍັງໄດ້ແລກປ່ຽນບົດຮຽນໃນຫົວຂໍ້ຕ່າງໆເປັນຕົ້ນແມ່ນ ການຈັດຕັ້ງປະຕິບັດ 3 ພາລະບົດບາດ ຂອງສະພາປະຊາຊົນແຂວງ ຄື: ດ້ານນິຕິກໍາ, ດ້ານການຕົກລົງບັນຫາສໍາຄັນພື້ນຖານຂອງແຂວງ ແລະ ດ້ານການຕິດຕາມກວດກາ, ປະສານງານກັບອົງການປົກຄອງແຂວງ ແລະ ພາກສ່ວນກ່ຽວຂ້ອງ, ການດໍາເນີນກອງປະຊຸມສະພາປະຊາຊົນແຂວງ; ການຄຸ້ມຄອງວຽກງານຈັດຕັ້ງ-ພະນັກງານ ເຊັ່ນ: ການກໍານົດຕໍາແໜ່ງງານ, ການປັບປຸງການຈັດຕັ້ງ ແລະ ສ້າງ ຕັ້ງກົງຈັກຊ່ວຍວຽກຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງບັນດາເມືອງ ແລະ ການຈັດຕັ້ງປະຕິບັດໜ້າທີ່ຂອງບັນດາຄະນະກໍາມະການ, ຄະນະເລຂາທິການ ແລະ ບັນດາຂະແໜງຊ່ວຍວຽກ ພ້ອມດຽວກັນ ຍັງໄດ້ເຊັນບົດບັນທຶກຮ່ວມລະຫວ່າງສະພາປະຊາຊົນແຂວງຫລວງນໍ້າທາກັບສະພາປະຊາຊົນແຂວງສາລະວັນ ໃນການແລກປ່ຽນບົດຮຽນຄັ້ງນີ້.
ໃນໂອກາດພົບປະແລກປ່ຽນບົດຮຽນຮ່ວມກັບສະພາປະຊາຊົນແຂວງຫວງນໍ້າທາຄັ້ງນີ້ ຄະນະຜູ້ແທນສະພາປະຊາແຂວງສາລະວັນ, ໄດ້ໄປທັດສະນະຢ້ຽມຢາມ ແລະ ທຽ່ວຊົມການຜະລິດກະສິກໍາ, ສະຖານທີ່ທ່ອງທ່ຽວຂອງແຂວງ ເຊັ່ນ: ວັດສາມັກຄີໄຊ, ພະທາດຫຼວງນໍ້າທາ, ນໍ້າຕົກຕາດນໍ້າດີ. 
