ໃນລະຫວ່າງວັນທີ 24 ຫາ 25  ກັນຍາ 2024ນີ້,  ສະພາປະຊາຊົນແຂວງສະຫວັນນະເຂດ ສຳເລັດການລົງເຄື່ອນໄຫວເຜີຍແຜ່ກົດໝາຍວ່າດ້ວຍ ສະພາປະຊາຊົນຂັ້ນແຂວງ, ກົດໝາຍວ່າດ້ວຍ ການຕິດຕາມກວດກາສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການແກ້ໄຂຄຳຮ້ອງທຸກ ຢູ່ 02 ເມືອງ ຄື: ເມືອງນອງ ແລະ ເມືອງເຊໂປນ  ຊຶ່ງນໍາໂດຍທ່ານ ພັທ. ຄູນສະໄໝ ລິນສັນຍາ ຮອງປະທານຄະນະກໍາມະການຍຸຕິທໍາ ແລະ  ປກຊ-ປກສ ສະພາປະຊາຊົນແຂວງ ພ້ອມຄະນະ. ເຂົ້າຮ່ວມຮັບຟັງໃນຄັ້ງນີ້ມີເລຂາ-ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ,ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຫົວໜ້າຫ້ອງການອ້ອມຂ້າງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ພະນັກງານລັດຖະກອນ ຕະຫຼອດຮອດອຳນາດການປົກຄອງບ້ານທັງ 02 ເມືອງເຂົ້າຮ່ວມຮັບຟັງຈຳນວນ 193 ທ່ານ, ຍິງ 96ທ່ານ.

ໃນກອງປະຊຸມ ທ່ານ ຄຳໝື່ນ ຂັນທະວົງ ຮອງເລຂາທິການສະພາປະຊາຊົນແຂວງ ໄດ້ສະເໜີ ແລະ  ເຜີຍແຜ່ ກົດໝາຍວ່າດ້ວຍ ສະພາປະຊາຊົນຂັ້ນແຂວງ (ສະບັບປັບປຸງ), ຈາກນັ້ນ ທ່ານ ພັທ. ແສງກາ ສຸວັນນະຄົງ           ຮອງປະທານຄະນະກໍາມະການຍຸຕິທໍາ ແລະ  ປກຊ-ປກສ ກໍໄດ້ສະເໜີ ແລະ ເຜີຍແຜ່ ກົດໝາຍວ່າດ້ວຍການແກ້ໄຂຄຳຮ້ອງທຸກ. ນອກຈາກນີ້ ທ່ານ ພັທ. ຄູນສະໄໝ ລິນສັນຍາ ຮອງປະທານຄະນະກຳມະການຍຸຕິທຳ ແລະ  ປກຊ-ປກສ ຍັງໄດ້ສະເໜີ ແລະ ເຜີຍແຜ່ກົດໝາຍ ວ່າດ້ວຍການຕິດຕາມກວດກາສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພາຍຫຼັງສິ້ນສຸດການນໍາສະເໜີ ແລະ ເຜີຍແຜ່ແລ້ວ ຍັງໄດ້ເປີດໂອກາດໃຫ້ຜູ້ເຂົ້າຮ່ວມກອງປະຊຸມ ໄດ້ມີການແລກປ່ຽນຄໍາຄິດ-ຄໍາເຫັນ ຕໍ່ກັບກົດໝາຍທັງ 03 ສະບັບ ດ້ວຍບັນຍາກາດສ້າງສັນ ແລະ ມີເນື້ອໃນເລິກເຊິ່ງ ເຮັດໃຫ້ຜູ້ເຂົ້າຮ່ວມກອງປະຊຸມ ມີຄວາມເຂົ້າໃນ ຕໍ່ກັບກົດໝາຍທີ່ນຳມາເຜີຍແຜ່ໃນຄັ້ງນີ້ອີກດ້ວຍ.

ໃນວາລະສຸດທ້າຍຂອງກອງປະຊຸມ ທ່ານ ພັທ. ຄູນສະໄໝ ລິນສັນຍາ  ກໍຍັງໄດ້ຮຽກຮ້ອງໃຫ້ແຕ່ລະພາກສ່ວນຈົ່ງພ້ອມກັນ ສືບຕໍ່ຈັດຕັ້ງຜັນຂະຫຍາຍຜົນສຳເລັດຂອງກອງປະຊຸມໃນຄັ້ງນີ້ໃຫ້ກວ້າງຂວາງ, ເລິກເຊິ່ງຂຶ້ນດ້ວຍການສືບຕໍ່ລົງໂຄສະນາເຜີຍແຜ່ບັນດາເນື້ອໃນຈິດໃຈຂອງກົດໝາຍ ທັງ 03 ສະບັບ ໃຫ້ເຂົ້າສູ່ລົງເລິກໃນການຈັດຕັ້ງປະຕິບັດວຽກງານຕົວຈິງໃຫ້ຖືກຕ້ອງສອດຄ່ອງຕາມຂອບເຂດສິດ,ພາລະບົດບາດໜ້າທີ່ວຽກງານຂອງຕົນໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.                     ພາບ-ຂ່າວ: ນາງ ຄອນສະຫວັນ ເມກສະຫວັນ