ໃນລະຫວ່າງວັນ 12-13 ມິຖຸນາ 2024 ສະພາປະຊາຊົນແຂວງ ສະຫວັນນະເຂດ ໄດ້ຕ້ອນຮັບການມາຢ້ຽມຢາມ ຂອງຄະນະຜູ້ແທນ ສະພາປະຊາຊົນແຂວງ ຫູໜານ ສປຈີນ; ເຊິ່ງການມາຢ້ຽມຢາມ ແລະ ເຮັດວຽກໃນຄັ້ງນີ້ໄດ້ຈັດຂຶ້ນທີ່ຫ້ອງປະຊຸມ ສະພາປະຊາຊົນແຂວງ ສະຫວັນນະເຂດ ໂດຍໃຫ້ການຕ້ອນຮັບຂອງທ່ານ ຄໍາດີ ສຸວັນນະສານ ປະທານຄະນະກໍາມະການວັດທະນະທໍາ, ສັງຄົມ ແລະ ບັນດາເຜົ່າ ສະພາປະຊາຊົນແຂວງສະຫວັນນະເຂດ; ສໍາລັບຄະນະຜູ້ແທນສະພາປະຊາຊົນແຂວງຫູໝານ ນໍາໂດຍທ່ານ ເຫວິນຟູ້ເຫິງ ປະທານຄະນະກຳມະການວຽກງານຊົນເຜົ່າ, ຊາວຈີນຕ່າງດ້າວ ແລະ ການຕ່າງປະເທດ ສະພາປະຊາຊົນແຂວງ ຫູໝານ ພ້ອມຄະນະ, ເຂົ້າຮ່ວມມີບັນດາທ່ານ ຮອງຄະນະກໍາມະການ, ຄະນະເລຂາທິການ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ອຸທຸມພອນ ແລະ ນະຄອນໄກສອນ, ຫົວໜ້າ-ຮອງຫົວໜ້າຂະແໜງທີ່ກ່ຽວຂ້ອງ ພາຍໃນສະພາປະຊາຊົນແຂວງ ເຂົ້າຮ່ວມ.

ໃນໄລຍະດໍາເນີນກອງປະຊຸມ ຄະນະຜູ້ແທນທັງສອງຝ່າຍ ມີການລາຍງານ ການເຄື່ອນໄຫວວຽກງານຕາມ ສິດ ແລະ ພາລະບົດບາດ ຂອງຕົນໂດຍຫຍໍ້  ພ້ອມທັງໄດ້ມີຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະ ຂັ້ນຕອນການຈັດຕັ້ງປະຕິບັດວຽກງານການແກ້ໄຂຄໍາຮ້ອງຂໍຄວາມເປັນທໍາ ຂອງພໍ່ແມ່ປະຊາຊົນທີ່ໄດ້ຢືນເອກະສານມາຍັງສະພາປະຊາຊົນແຂວງ, ທ້າຍສຸດ ທັງສອງຜ່າຍ ກໍ່ໄດ້ເປັນເອກະພາບກັນ ສືບຕໍ່ເພີ່ມທະວີການພົວພັນຮ່ວມມື, ການແລກປ່ຽນຂໍ້ມູນຂ່າວສານ ແລະ ບົດຮຽນ ໃນການເຄື່ອນໄຫວວຽກງານຂອງສະພາປະຊາຊົນສອງແຂວງ ໃຫ້ນັບມື້ສະໜິດແໜ້ນ ແລະ ທັງສອງຝ່າຍກໍ່ໄດ້ມອບຂອງທີ່ລະລຶກ, ນອກນັ້ນ ຄະນະຜູ້ແທນ ກໍ່ໄດ້ຢ້ຽມຊົມ ພະທາດອິງຮັງ, ຫໍພິພິດຕະພັນໄດໂນເສົາ, ຕົວເມືອງເກົ່າ ແລະ ຮ້ານສິນຄ້າໂອດ໊ອບ ຂອງແຂວງອີກດ້ວຍ.