ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງສະຫວັນນະເຂດ ຊຸດທີ II ໄດ້ອັດລົງດ້ວຍຜົນສຳເລັດຢ່າງສະຫງ່າຜ່າເຜີຍ ໃນຕອນບ່າຍວັນທີ 29 ກໍລະກົດ 2022 ທີ່ຫໍວັດທະນະທຳໄກສອນ ພົມວິຫານ ແຂວງສະຫວັນນະເຂດ ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ເຂົ້າຮ່ວມມີທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ພ້ອມບັນດາທ່ານ ສະມາຊິກສະພາແຫ່ງຊາດ,ສະມາຊິກສະພາປະຊາຊົນແຂວງ,ເຈົ້າເມືອງ,ເຈົ້ານະຄອນໄກສອນພົມວິຫານ, ຫົວໜ້າພະແນກການຕ່າງໆອ້ອມຂ້າງແຂວງເຂົ້າຮ່ວມນຳ.
ທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ໄດ້ກ່າວສູນທອນພົດອັດກອງປະຊຸມຢ່າງເປັນທາງການວ່າ: ຈາກການດຳເນີນກອງປະຊຸມຄັ້ງນີ້ ຕີລາຄາໄດ້ວ່າ: ຄະນະສະມາຊິກສະພາແຫ່ງຊາດ ກໍ່ຄືສະມາຊິກສະພາປະຊາຊົນແຂວງ ໄດ້ຈັດຕັ້ງປະຕິບັດຕາມກົດໝາຍ ແລະ ຕິດພັນກັບສະພາບຄວາມເປັນຈິງຂອງທ້ອງຖິ່ນ, ເຮັດໃຫ້ກອງປະຊຸມໄດ້ດຳເນີນໄປດ້ວຍບັນຍາກາດອັນຟົດຟື້ນ ເປັນການເສີມຂະຫຍາຍສິດປະຊາທິປະໄຕ ຂອງບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ໄດ້ສຸມຄວາມຮູ້ ຄວາມສາມາດ ເຂົ້າໃນການຄົ້ນຄວ້າ ແລະ ປະກອບຄໍາຄິດຄໍາເຫັນ ຢ່າງມີເຫດຜົນ, ມີເນື້ອໃນທີ່ເລິກເຊິ່ງ ສ່ອງແສງໃຫ້ເຫັນເຖີງຄວາມຮັບຜິດຊອບ ໃນການຈັດຕັ້ງປະຕິບັດພາລະບົດບາດ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າຊາວແຂວງສະຫວັນນະເຂດ.
ເຊິ່ງໃນກອງປະຊຸມ ແມ່ນໄດ້ຮັບຟັງການລາຍງານ, ການປະກອບຄໍາເຫັນຂອງຄະນະປະຈໍາສະພາປະຊາຊົນແຂວງ, ການຊັກຖາມກັບທີ່ຂອງຜູ້ແທນຢ່າງເລິກເຊິ່ງ, ຖີ່ຖ້ວນລວມໄປເຖິງການຊີ້ແຈງບັນຫາສໍາຄັນຕໍ່ຄໍາຊັກຖາມ ຂອງອົງການປົກຄອງແຂວງ, ຫົວໜ້າອົງການໄອຍະການປະຊາຊົນແຂວງ, ປະທານສານປະຊາຊົນແຂວງ, ບັນດາພະແນກການ ແລະ ກົມກອງທີ່ກ່ຽວຂ້ອງ ໃນການຈັດຕັ້ງປະຕິບັດໜ້າທີ່ວຽກງານຂອງຕົນ ໃນໄລຍະຜ່ານມາ. ພ້ອມນີ້ໃນກອງປະຊຸມກໍ່ຍັງໄດ້ພິຈາລະນາ, ຮັບຮອງເອົາການລາຍງານໂດຍສັງເຂບຂອງທ່ານເຈົ້າແຂວງສະຫວັນນະເຂດ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ພິຈາລະນາ, ຮັບຮອງເອົາການປະເມີນເຂດບ້ານຫ່າງໄກສອກຫຼີກ ແລະ ທຸລະກັນດານ ຂອງອົງການປົກຄອງແຂວງ ແລະ ພິຈາລະນາ, ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານຂອງສະພາປະຊາຊົນແຂວງ ແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II.
ສັງລວມແລ້ວ ຜົນສຳເລັດຂອງກອງປະຊຸມດັ່ງກ່າວນີ້ ແມ່ນໝາກຜົນແຫ່ງສະຕິປັນຍາໃນການຄົ້ນຄວ້າປະກອບຄຳຄິດຄຳເຫັນ ຢ່າງກວ້າງຂວາງ, ເລິກເຊິ່ງ, ມີຄວາມຮັບຜິດຊອບ ແລະ ເປັນເອກະພາບສູງ ຂອງບັນດາທ່ານ ສະມາຊິກສະພາປະຊາຊົນແຂວງ, ທັງເປັນການປະກອບສ່ວນອັນສຳຄັນ ແລະ ສົມກຽດ ຂອງສະພາປະຊາຊົນແຂວງ ໃນຖານະເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ເຂົ້າໃນການປັບປຸງບູລະນະ ລັດປະຊາທິປະໄຕ ປະຊາຊົນ ໃຫ້ມີຄວາມໜັກແໜ້ນ ແລະ ເຂັ້ມແຂງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃຫ້ບັນລຸໄດ້ຕາມແຜນການຢ່າງມີຜົນສໍາເລັດໃນຕໍ່ໜ້າ