ວັນທີ 14 ພະຈິກ 2023 ນີ້, ທ່ານ ຮອງປະທານສະພາປະຊາຊົນແຂວງວຽງຈັນໄດ້ຕ້ອນຮັບ ທ່ານ Munkhbaatar LKHAGVA ຮອງປະທານສະພາຄູຣານໃຫຍ່ ພ້ອມດ້ວຍຄະນະ ທີ່ເດີນທາງຢ້ຽມຢາມເຂື່ອນໄຟຟ້ານໍ້າງຶ່ມ 1 ບ້ານແສງສະຫວ່າງ, ເມືອງແກ້ວອຸດົມ, ແຂວງວຽງຈັນ, ນໍາພາຄະນະຜູ້ແທນໂດຍ ທ່ານ ສິ່ງຄໍາ ວົງພະຈັນ ຮອງເລຂາທິການສະພາແຫ່ງຊາດ ໃຫ້ກຽດຕ້ອນຮັບໂດຍ ທ່ານ ນາງ ຈັນທະຄອນ ສີອໍາພອນ ກຳມະການພັກແຂວງ, ຮອງປະທານສະພາປະຊາຊົນແຂວງວຽງຈັນ, ທ່ານ ສົມໃຈ ສີຈັນທະລາດ ຜູ້ອຳນວຍການເຂື່ອນໄຟຟ້ານໍ້າງຶ່ມ 1 ພ້ອມດ້ວຍຄະນະໃຫ້ກຽດຕ້ອນຮັບ.

ທ່ານ ສົມໃຈ ສີຈັນທະລາດ ຜູ້ອຳນວຍການເຂື່ອນໄຟຟ້ານໍ້າງຶ່ມ 1 ໄດ້ກ່າວຕ້ອນຮັບ ຄະນະຜູ້ແທນ ແຫ່ງ ມົງໂກລີ ແລະ ໄດ້ເລົ່າປະຫວັດຄວາມເປັນມາ ຂອງການສ້າງເຂື່ອນໄຟຟ້ານໍ້າງຶ່ມ 1 ໃຫ້ຄະນະຜູ້ແທນ ມົງໂກລີ ໄດ້ຮັບຊາບ ພ້ອມທັງ ມອບຂອງຂວັນທີ່ລະນຶກ ແລະ ນໍາພາຢ້ຽມຊົມ ລະບົບການຜະລິດໄຟຟ້າ ແລະ ຕົວອາຄານຂອງເຂື່ອນ.

ຕ້ອນທ້າຍ, ທ່ານ Munkhbaatar LKHAGVA ຮອງປະທານສະພາຄູຣານໃຫຍ່ ພ້ອມດ້ວຍຄະນະ ໄດ້ກ່າວສະແດງຄວາມຂອບໃຈ ຮອງປະທານສະພາປະຊາຊົນແຂວງວຽງຈັນ ແລະ ຜູ້ອຳນວຍການເຂື່ອນນໍ້າງຶ່ມ 1 ພ້ອມດ້ວຍຄະນະ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ແລະ ນໍາພາຢ້ຽມຊົມສະຖານທີ່ການຜະລິດໄຟຟ້າ ເຊິ່ງໃນອານາຄົດຕໍ່ໜ້າທາງ ມົງໂກລີ ຫວັງວ່າຈະໄດ້ຮ່ວມມາສຶກສາວຽກງານການຜະລິດໄຟຟ້າ.

ພາບ-ຂ່າວ ໄຊຍະພອນ ແສງແກ້ວມີໄຊ