ໃນຕອນເຊົ້າຂອງວັນທີ 14 ມິຖຸນາ 2022 ເວລາ 8:30 ໂມງ ທີ່ຫ້ອງປະຊຸມສະພາປະຊາຊົນແຂວງວຽງຈັນ ໄດ້ເປີດກອງປະຊຸມກະກຽມເນື້ອໃນທີ່ຈະນໍາເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນເທື່ອທີ 3 ສະພາປະຊາຊົນແຂວງວຽງຈັນຊຸດທີ II ຂື້ນ ໂດຍການເປັນປະທານຂອງທ່ານ ນາງ ຈັນທະຄອນ ສີອໍາພອນ ກໍາມະການພັກແຂວງ, ຮອງປະທານສະພາປະຊາຊົນແຂວງວຽງຈັນ ເຂົ້າຮ່ວມມີ ບັນດາຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງເຂົ້າຮ່ວມຈໍານວນໜື່ງ.
ຈຸດປະສົງກອງປະຊຸມຄັ້ງນີ້ເພື່ອແນະນໍາໃຫ້ບັນດາພະແນກການ,ອົງການທີກ່ຽວຂ້ອງໄດ້ກະກຽມບັນດາເນື້ອໃນທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ພ້ອມທັງປຶກສາຫາລືແລກປ່ຽນ ປະກອບຄໍາຄິດ, ຄໍາເຫັນເພື່ອເອກະພາບດ້ານເນື້ອໃນລະອຽດດັ່ງນີ້:
- ພິຈາລະນາ,ຮັບຮອງເອົາບົດລາຍງານຂອງທ່ານເຈົ້າແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ ແລະ ແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດຂັ້ນແຂວງ 6 ເດືອນທ້າຍປີ 2022.
- ຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ແລະ ແຜນພັດທະນາເສດຖະກີດ 6 ເດືອນທ້າຍປີ 2022ຂອງພະແນກແຜນການ ແລະ ການລົງທືນ.
- ຮັບຟັງການລາຍງານ ການຈັດຕັ້ງປະຕິບັດແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ ແລະ ແຜນງົບປະມານແຫ່ງລັດຂັ້ນແຂວງ 6 ເດືອນທ້າຍປີ 2022 ຂອງພະແນກການເງິນແຂວງ.
- ຮັບຟັງການລາຍງານການເຄື່ອນໄຫວບັນຫາພົ້ນເດັ່ນຂອງອົງການໄອຍະການປະຊາຊົນແຂວງວຽງຈັນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022.
- ບົດລາຍງານການເຄື່ອນໄຫວບັນຫາພົ້ນເດັ່ນຂອງສານປະຊາຊົນແຂວງວຽງຈັນ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ພິຈາລະນາ,ຮັບຮອງ ບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງວຽງຈັນ ຊຸດທີ II
- ຮັບຟັງການລາຍງານການຈັດຕັ້ງປະຕິບັດ 2 ວາລາແຫ່ງຊາດຢູ່ແຂວງວຽງຈັນ:
– ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.
– ການແກ້ໄຂບັນຫາຢາເສບຕິດແຕ່ປີ 2021-2023..
- ຮັບຟັງການລາຍງານການຄຸ້ມຄອງສິນຄ້າຍຸດທະສາດ(ນໍ້າມັນເຊື້ອໄຟ ແລະ ອາຫານການກິນ).
- ພິຈາລະນາ,ຮັບຮອງເອົາບັນຫາສໍາຄັນພື້ນຖານຂອງແຂວງ ແລະ ວຽກງານອື່ນທີ່ສໍາຄັນ(ຖ້າມີ).