ໃນວັນທີ 16 ສິງຫາ 2022, ຢູ່ທີ່ສະພາປະຊາຊົນແຂວງວຽງຈັນ, ທ່ານ ຄຳຫລ້າ ສີສຸວົງ ຄະນະປະຈຳ, ເລຂາທິການສະພາປະຊາຊົນແຂວງ ໄດ້ຖະແຫຼງຂ່າວກ່ຽວກັບຜົນສຳເລັດກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ເຊິ່ງທ່ານໄດ້ກ່າວວ່າ: ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ດຳເນີນເປັນ ເວລາ 3 ວັນ ໂດຍພາຍໃຕ້ການເປັນປະທານ ຂອງທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10, ປະທານສະພາປະຊາຊົນແຂວງວຽງຈັນ ແລະ ບັນດາທ່ານສະມາຊິກສະພາປະຊາຊົນແຂວງ ໄດ້ສຸມເຫື່ອແຮງສະຕິປັນຍາໃນການຄົ້ນຄວ້າ, ປະກອບຄຳຄິດຄຳເຫັນ ແລະ ໄດ້ຮັບການປະກອບສ່ວນຂອງອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ຕາມພາລະບົດບາດ ເຂົ້າໃນການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາ ຊົນແຂວງ ຊຸດທີ II, ກອງປະຊຸມສະໄໝສາມັນເທື່ອທີ 3 ເທື່ອນີ້ ໄດ້ພິຈາລະນາ ແລະ ຮັບຮອງເອົາບັນຫາສຳຄັນຂອງແຂວງ ຕາມສິດ ແລະ ໜ້າທີ່ຂອງສະພາປະຊາຊົນແຂວງ ທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ, ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
ຂ້າພະເຈົ້າໃນນາມຕາງໜ້າຄະນະປະຈຳສະພາປະຊາຊົນແຂວງ, ເລຂາທິການສະພາປະຊາຊົນແຂວງມີຄວາມຍິນດີ ແລະ ຖືເປັນກຽດຢ່າງສູງ ແຈ້ງມາຍັງບັນດາທ່ານການນໍາພັກ-ລັດ, ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ຜູ້ປະກອບການ, ພໍ່ແມ່ພີ່ນ້ອງປະຊາຊົນບັນດາເຜົ່າ, ຊາວຕ່າງດ້າວ, ທີ່ດໍາລົງຊີວິດຢູ່ພາຍໃນແຂວງວຽງຈັນ ຊາບເຖິງຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ມີດັ່ງນີ້:
I. ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ໄຂຂຶ້ນໃນຕອນເຊົ້າຂອງວັນທີ 10 ສິງຫາ 2022 ແລະ ໄດ້ດໍາເນີນເຖິງວັນທີ 12 ສິງຫາ 2022 ເປັນເວລາ 3 ວັນ, ກອງປະຊຸມຄັ້ງນີ້ ນອກຈາກສະມາຊິກສະພາປະຊາຊົນແຂວງເຂົ້າຮ່ວມແລ້ວ, ກອງປະຊຸມໄດ້ເປັນກຽດຢ່າງສູງຕ້ອນຮັບທ່ານ ຄຳພັນ ສິດທິດໍາພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ, ທ່ານ ສຈ. ປອ ຈະເລີນ ເຍຍປ່າວເຮີ ກຳ ມະການສູນກາງພັກ, ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ມີບັນດາທ່ານການນໍາ ພັກ-ລັດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10, ອາດີດການນໍາຂັ້ນສູງຂອງແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ພະນັກງານອາວຸໂສບໍານານ, ພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
II. ກອງປະຊຸມໄດ້ຮັບຟັງການລາຍງານຂອງອົງການປົກຄອງແຂວງ ທີ່ຕິດພັນກັບການປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ, ແຜນງົບປະມານແຫ່ງລັດຂອງແຂວງ, ການລາຍງານຄວາມຄືບໜ້າຂອງ 2 ວາລະແຫ່ງຊາດ, ການລາຍງານການຄຸ້ມຄອງສິນຄ້າຄວບຄຸມຂອງລັດ ( ນໍ້າມັນເຊື້ອໄຟ ແລະ ເຄື່ອງບໍລິໂພກ ), ການລາຍງານອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທໍາແຂວງ, ສະພາປະຊາຊົນແຂວງ ໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022.
III. ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ພິຈາລະນາຮັບຮອງ ເອົາບັນຫາສຳຄັນພື້ນຖານຂອງແຂວງ ໂດຍໄດ້ອອກເປັນມະຕິກອງປະຊຸມດັ່ງນີ້:
1) ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງ ເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022.
2) ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022.
3) ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ສະພາປະຊາຊົນແຂວງວຽງຈັນ ຊຸດທີ II.
ການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ສະເໜີໃຫ້ 8 ພາກສ່ວນ ຂຶ້ນຊີ້ແຈງຕໍ່ຄໍາຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ ເຊິ່ງສະມາຊິກສະພາປະຊາຊົນແຂວງ ໄດ້ຍົກຂຶ້ນຢູ່ໃນກອງປະຊຸມ ປະກອບ ມີ: ທ່ານຮອງເຈົ້າແຂວງ, ພະແນກແຜນການ ແລະ ການລົງທຶນ, ພະແນກການເງິນ, ພະແນກອຸດສາຫຳກໍາ ແລະ ການຄ້າ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທໍາແຂວງ ແລະ ກອງບັນຊາການປ້ອງກັນຄວາມສະຫງົບແຂວງ.
IV. ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິ່ງນີ້, ໃນໄລຍະດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ມີປະຊາຊົນບັນດາເຜົ່າ ສົ່ງຄຳຄິດຄຳເຫັນຜ່ານໂທລະສັບສາຍດ່ວນ 023 156 ຈໍານວນ 5 ສາຍ, 10 ເນື້ອໃນ, ເຊິ່ງພົວພັນເຖິງການຄຸ້ມຄອງ-ບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ວມ; ຕໍ່ກັບຄໍາຄິດເຫັນຂອງປະຊາຊົນທີ່ສົ່ງມາທາງໂທລະສັບສາຍດ່ວນດັ່ງກ່າວ ກອງເລຂາກອງປະຊຸມໄດ້ສັງລວມ ແລະ ຈະມອບໃຫ້ພາກສ່ວນທີ່ກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງສ່ອດຄ່ອງ ຕາມກົດໝາຍ ແລະ ລະບຽບການ, ທາງສະພາປະຊາ ຊົນແຂວງ ຈະໄດ້ເພີ່ມທະວີຄວາມເປັນເຈົ້າການໃນການເຮັດໜ້າທີ່ເປັນຜູ້ຕິດຕາມ-ກວດກາ ແລະ ຊຸກຍູ້ ຕາມພາລະບົດບາດຢ່າງເປັນເຈົ້າການ.
ອີກເທື່ອໜຶ່ງຕາງໜ້າຄະນະປະຈຳສະພາປະຊາຊົນແຂວງ, ຂ້າພະເຈົ້າ ຂໍຂອບໃຈ ມາຍັງທຸກພາກສ່ວນ ທີ່ໄດ້ມີຄວາມພະຍາຍາມເອົາໃຈໃສ່ຕິດຕາມ, ຮັບຟັງ ແລະ ໃຊ້ສິດປະຊາ ທິປະໄຕຂອງຕົນ ໃນການເຂົ້າມີຄໍາຄິດ-ຄໍາເຫັນຄືດັ່ງກ່າວ ເຊິ່ງມັນສະແດງເຖິງຄວາມຮັບຜິດຊອບທາງດ້ານໜ້າທີ່ການເມືອງຂອງຜູ້ມີສິດເລືອກຕັ້ງ ທີ່ໄດ້ໃຫ້ຄວາມເປັນຫ່ວງ-ເປັນໃຍຕໍ່ການພັດທະນາເສດຖະກິດ-ສັງຄົມ ແຂວງພວກເຮົາ.
ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງພາກສ່ວນສື່ມ່ວນຊົນ ຂອງແຂວງວຽງຈັນທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການ ກ່ຽວກັບການດຳເນີນກອງປະຊຸມ ໃນຄັ້ງນີ້ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ.
ຂໍອວຍພອນແດ່ທຸກໆທ່ານ ຈົ່ງມີສຸຂະພາບເຂັ້ມແຂງມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ປະສົບຜົນສໍາເລັດໃນໜ້າທີ່ການງານທຸກປະການ ແລະ ພ້ອມກັນພັດທະນາແຂວງວຽງຈັນຂອງພວກເຮົາໃຫ້ກາຍເປັນແຂວງ ມັ່ງຄັ່ງ, ເຂັ້ມແຂງ, ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ ເປັນກ້າວໆ.