ພິທີພົບປະແລກປຽນບົດຮຽນລະຫວ່າງສອງສະພາໃນວັນທີ 2 ພະຈິກ 2023 ທີ່ຫ້ອງປະຊຸມຊັ້ນສອງຫ້ອງວ່າການແຂວງວຽງຈັນ ຄະນະຜູ້ແທນສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ ນຳໂດຍ ທ່ານ ຄິມ ຈິນບູ ປະທານສະພາປະຊາຊົນແຂວງ ກິຢອງຊັງນໍາ-ໂດ ພ້ອມດ້ວຍຄະນະຢ້ຽມຢາມ ສະພາປະຊາຊົນແຂວງວຽງຈັນ, ໃຫ້ກຽດຕ້ອນຮັບໂດຍ ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ ພ້ອມດ້ວຍບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະກຳມະການ, ຄະນະເລຂາທິການ ຕະຫຼອດພະນັກງານພາຍໃນສະພາປະຊາຊົນແຂວງວຽງຈັນເຂົ້າຮ່ວມຕ້ອນຮັບ.

ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ ໄດ້ຕາງໜ້າຄະນະປະຈໍາສະພາປະຊາຊົນແຂວງວຽງຈັນ ກ່າວຕ້ອນຮັບຄະນະຜູ້ແທນສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ ທີ່ມາຢ້ຽມຢາມສະພາປະຊາຊົນແຂວງວຽງຈັນ, ພ້ອມນີ້ທ່ານຍັງໄດ້ລາຍງານສະພາບລວມຂອງແຂວງວຽງຈັນ ແລະ ການເຄື່ອນໄຫວວຽກງານຂອງສະພາປະຊາຊົນແຂວງໂດຍຫຍໍ້ ເຊິ່ງທ່ານໄດ້ຍົກໃຫ້ເຫັນສະພາບທີ່ຕັ້ງ ແລະ ພູມສັນຖານບັນດາທ່າແຮງດ້ານການຜະລິດສິ້ນຄ້າ ມີຄວາມອຸດົມສົມບູນທາງດ້ານທິວທັດທໍາມະຊາດ, ມີທາງດ່ວນຈາກນະຄອນຫລວງຫາວັງວຽງ ແລະ ມີເສັ້ນທາງລົດໄຟແລ່ນຜ່ານ ເຊິ່ງເປັນສິ່ງອໍານວຍຄວາມສະດວກດ້ານຄົມມະຄົມຂົນສົ່ງໂດຍສານ ແລະ ສິ້ນຄ້າ.ຈາກນັ້ນ ທ່ານ ຄິມ ຈິນບູ ປະທານສະພາປະຊາຊົນແຂວງ ກິຢອງຊັງນໍາ-ໂດ ກໍ່ໄດ້ກ່າວສະແດງຄວາມຂອບໃຈມາຍັງປະທານສະພາປະຊາຊົນແຂວງວຽງຈັນ ພ້ອມຄະນະທີ່ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ພ້ອມກ່າວລາຍງານຫຍໍ້ກ່ຽວກັບສະພາບລວມຂອງແຂວງກິຢອງຊັງນໍາໂດໃນລະຫວ່າງການພົບປະ, ຄະນະຜູ້ແທນທັງສອງຝາຍໄດ້ແລກປຽ່ນຄໍາເຫັນເຊິ່ງກັນ ແລະ ກັນ ກ່ອນທີ່ສອງຝາຍຈະໄດ້ຮ່ວມລົງລາຍເຊັນໃນບົດບັນທຶກຊ່ວຍຈໍາການຮ່ວມມືຂອງສອງສະພາ.

ຕອນທ້າຍຂອງກອງປະຊຸມທັງສອງຝ້າຍກໍ່ໄດ້ສະແດງຄວາມຂອບໃຈ ແລະ ອວຍພອນໃຫ້ການຢ້ຽມຢາມຄັ້ງນີ້ ຈົ່ງປະສົບຜົນສໍາເລັດຢ່າງຈົບງາມ ແລະ ຂໍອວຍພອນໃຫ້ຄະນະຈົງກັບຄືນປະເທດດ້ວຍຄວາມສະຫັວດດີພາບທຸກປະການ ແລະ ໃນຕອນບາຍຂອງວັນດຽດກັນນັ້ນ ຄະນະຜູ້ແທນສະພາປະຊາຊົນແຂວງ ກີຢອງຊັງນໍາ-ໂດ ສ. ເກົາຫຼີ ຍັງໄດ້ເຂົ້າຢ້ຽມຂ່ຳນັບທ່ານເຈົ້າແຂວງ ແຂວງວຽງຈັນອີກດ້ວຍ.

ພາບ-ຂ່າວ ບູລາຕີ ແສນທະວົງ