ເພື່ອປະຕິບັດຕາມພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ໃນການລົງຕິດຕາມກວດກາ  ລະຫວ່າງວັນທີ 19 – 22 ສິງຫາ 2024 ນີ້ ສະພາປະຊາຊົນແຂວງຫຼວງນໍ້າທາ ນໍາໂດຍ ທ່ານ ຄໍາພອນ ເຕິນຈະເລີນ ສະມາຊິກສະພາປະຊາຊົນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ ພ້ອມດວ້ຍຄະນະ ໄດ້ລົງຊຸກຍູ້ຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ  ກ່ຽວກັບໂຄງການລົງທຶນຂອງລັດ ແລະ ເອກະຊົນຢູ່ເມືອງສິງ ແລະ ເມືອງລອງ; ໄດ້ຈັດກອງປະຊຸມຮ່ວມຢູ່ທີຫ້ອງວ່າການເມືອງສິງ, ເມືອງລອງ ພາຍໃຕ້ການເປັນປະທານຂອງ ທ່ານ ຄຳພອນ ເຕິນຈະເລີນ ສະມາຊິກສະພາປະຊາຊົນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ, ມີກໍາມະການພັກເມືອງ, ຮອງເຈົ້າເມືອງ, ພະແນກການກ່ຽວຂ້ອງຂອງແຂວງ, ບັນດາຫ້ອງການທີ່ກ່ຽວຂ້ອງພາຍໃນເມືອງເຂົ້າຮ່ວມຢ່າງພ້ອມພຽງ.

ໃນກອງປະຊຸມໄດ້ຮັບຟັງລາຍງານໂດຍຫຍໍ້ສະພາບລວມການຈັດຕັ້ງປະຕິບັດບັນດາໂຄງການ ແລະ ຜົນໄດ້ຮັບຈາກໂຄງການໃນໄລຍະຜ່ານມາ ຂອງເມືອງສິງ, ເມືອງລອງ ແຂວງຫລວງນ້ຳທາ; ຮັບຟັງການຈັດຕັ້ງປະຕິບັດໂຄງການລົງທຶນຂອງລັດ, ເອກະຊົນ ແລະການນໍາໃຊ້ເງິນເກີນແຜນຢູ່ພາຍໃນເມືອງ ປະຈໍາປີ 2023 ແລະ ຮັບຟັງສະພາບການຈັດຕັ້ງປະຕິບັດໂຄງການກອງທຶນທາງຂອງບັນດາເມືອງ ໃນໄລຍະຜ່ານມາ ແລະ ຮັບຟັງຕາມຄໍາຖາມເຈາະຈິ້ມຂອງຄະນະກຳມການເປັນຕົ້ນ: ສະພາບເງິນເຟີ້ມີຜົນກະທົບຕໍ່ໂຄງການລົງທຶນຂອງລັດ, ວິທີແກ້ໄຂແນວໃດໃນໄລຍະຜ່ານມາ  ແລະ ຜົນກະທົບໂຄງການຕໍ່ສິ່ງແວດລ້ອມແນວໃດ ນອກນັ້ນ ຍັງໄດ້ຮັບຟັງບັນດາຫ້ອງການທີ່ກ່ຽວຂ້ອງຂອງເມືອງ ທີ່ຮັບຜິດຊອບໂຄງການລົງທຶນຂອງລັດ ໃນການຈັດຕັ້ງປະຕິບັດໂຄງການມີຂໍ້ສະດວກ, ຂໍ້ຫຍຸ້ງຍາກ ແລະ ຄວາມຄືບໜ້າຂອງໂຄງການແນວໃດ; ພ້ອມດຽວກັນ ຜູ້ແທນກອງປະຊຸມຢູ່ບັນດາເມືອງຍັງໄດ້ສະເໜີບັນຫາທີ່ພົບຄວາມຫຍຸ້ງຍາກໃນການຈັດຕັ້ງປະຕິບັດໃນໄລຍະຜ່ານມາ ແລະ ໄດ້ເເລກປ່ຽນຄຳຄິດເຫັນຢ່າງກົງໄປກົງມາ ທັງນີ້ ເພື່ອເຮັດໃຫ້ການຈັດຕັ້ງປະຕິບັດບັນດາໂຄງການລົງທຶນຂອງລັດ, ເອກະຊົນພາຍໃນເມືອງ ໃຫ້ມີຄວາມສະດວກ, ມີຄວາມຄືບໜ້າ ສາມາດຈັດຕັ້ງປະຕິບັດໃຫ້ມີຄຸນນະພາບ ແລະ ສໍາເລັດຕາມລະດັບຄາດໝາຍ; ຈາກນັ້ນ ຍັງໄດ້ລົງຕິດຕາມກວດກາລົງພື້ນທີ່ຕົວຈິງຂອງບັນດາໂຄງການລົງທຶນຂອງລັດ ແລະ ເອກະຊົນຢູ່ບັນດາເມືອງ.

ກອງປະຊຸມຄັ້ງນີ້ ແມ່ນໄດ້ຮັບການສະໜັບສະໜູນຈາກ ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ພາບແລະຂ່າວ: ວັນນີ ແຝງບົວວັນ