ໃນວັນທີ 9 ພຶດສະພາ 2023 ທີ່ຫ້ອງປະຊຸມສູນບໍລິການຢູນີເທວ (UNITEL) ເມືອງບຸນເໜືອ ແຂວງຜົ້ງສາລີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 02 ແຂວງຜົ້ງສາລີ, ບັນດາທ່ານສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງ ຂອງສະພາປະຊາຊົນແຂວງ ເຂົ້າຮ່ວມກອງປະຊຸມຮັບຟັງການຊີ້ແຈງ ແລະ ຜົນການທາບທາມຮ່າງກົດໝາຍ 11 ສະບັບ (ໃນຮູບແບບກອງປະຊຸມທາງໄກ) ໂດຍພາຍໃຕ້ການເປັນປະທານ ຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ມີບັນດາທ່ານຕາງໜ້າຄະນະຮັບຜິດຊອບສ້າງຮ່າງກົດໝາຍ, ບັນດາທ່ານສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ໃນຂອບເຂດທົ່ວປະເທດ ເຂົ້າຮ່ວມ
ທີ່ປະຊຸມໄດ້ຮັບຟັງຕາງໜ້າຄະນະຮັບຜິດຊອບສ້າງຮ່າງກົດໝາຍ ຂຶ້ນຊີ້ແຈງ ແລະ ຜົນການປັບປຸງຕາມການປະກອບຄໍາເຫັນຂອງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ຕໍ່ຮ່າງກົດໝາຍ ຈໍານວນ 11 ສະບັບ. ພ້ອມດຽວກັນນັ້ນ ໄດ້ຮັບຟັງການເຜີຍແຜ່ແຈ້ງການດໍາເນີນການປະເມີນ ແລະ ຄົ້ນຄວ້າທາບທາມ ເພື່ອປັບປຸງເນື້ອໃນຮ່າງກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ ຫຼັງຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດຄໍາເຫັນ ສົນທະນາແລກປ່ຽນ ເພື່ອຮັບປະກັນເຮັດໃຫ້ເນື້ອໃນຂອງຮ່າງກົດໝາຍດັ່ງກ່າວ ສາມາດນໍາເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ຕາມແຜນການທີ່ວາງໄວ້.
ພາບ-ຂ່າວ: ນັກຂ່າວສະພາປະຊາຊົນແຂວງ