ໃນຕອນບ່າຍຂອງວັນທີ 29 ມີນາ 2022 ນີ້ ເວລາ 13:30 ນາທີ ຢູ່ທີ່ຫ້ອງປະຊຸມຂອງສະພາປະຊາຊົນແຂວງບໍ່ແກ້ວ ໄດ້ຈັດພິທີຮັບສະມາຊິກພັກສໍາຮອງ ໂດຍການເປັນປະທານຂອງສະຫາຍ ພັອ ຫຸມແພງ ອິນທະຈັກ ຮອງເລຂາໜ່ວຍພັກ, ຮອງປະທານ,ຄະນະປະຈໍາສະພາປະຊາຊົນແຂວງ.

ມີສະມາຊິກພັກສົມບູນ,ສຳຮອງ ເຂົ້າຮ່ວມທັງໝົດ18 ສະຫາຍ,ຍິງ 8 ສະຫາຍ ໂດຍພິທີຄັ້ງນີ້ໄດ້ຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງຈໍານວນ 05 ສະຫາຍ,ຍິງ 03 ສະຫາຍ. ໃນພິທີຄັ້ງນີ້ສະຫາຍ ບຸນພັດ ສີສົມບັດ ຄະນະໜ່ວຍພັກ, ເລຂາທິການສະພາປະຊາຊົນແຂວງ ໄດ້ຜ່ານມະຕິຕົກລົງວ່າດ້ວຍການອະນຸມັດຮັບເອົາມະຫາຊົນເຂົ້າເປັນສະມາຊິກພັກ ປະຊາຊົນປະຕິວັດລາວ ແລະ ທ່ານ ຮອງເລຂາໜ່ວຍພັກໄດ້ຂຶ້ນກ່າວຮັບເອົາສະມາຊິກພັກສໍາຮອງ ພ້ອມທັງໂອ້ລົມກ່າວຄໍາຕັກເຕືອນ.

ທ່ານໄດ້ຊີ້ແຈງໃຫ້ເຫັນຄວາມເປັນມາ ແລະ ຄວາມສໍາຄັນຂອງພັກປະຊາຊົນປະຕິວັດລາວ ພ້ອມທັງຮຽກຮ້ອງໃຫ້ສະມາຊິກພັກທຸກສະຫາຍ ຈົ່ງຕັ້ງໜ້າເຝິກຝົນຫຼໍ່ຫຼອມ ຕົນເອງໃຫ້ກ່າຍເປັນພະນັກງານລັດ ແລະສະມາຊິກພັກທີ່ມີຄວາມຮູ້ ຄວາມສະຫຼາດ ມີຄຸນທາດການເມືອງທີ່ໜັກແໜ້ນ ແລະຕັ້ງໜ້າຈັດຕັ້ງປະຕິບັດຕາມພາລະບົດບາດ ແລະ ໜ້າທີ່ ທີ່ພັກ-ລັດ ມອບໃຫ້ ໃຫ້ມີໝາກຜົນ. ໃນທ້າຍພິທີ ສະມາຊິກພັກສໍາຮອງໄດ້ຂຶ້ນຮັບຄໍາໂອ້ວາດຕັກເຕືອນ ແລະ ກ່າວຄໍາປະຕິຍານຕົນຕໍ່ພັກ.