ໃນຕອນບ່າຍຂອງວັນທີ 14 ທັນວາ 2023 ທ່ານ ນາງ ຟອງສະໜຸດ ພົງວິຈິດ ກໍາມະການພັກແຂວງ, ເລຂາທິການສະພາປະຊາຊົນແຂວງ ໄດ້ຕາງໜ້າຄະນະປະຈຳສະພາປະຊາຊົນແຂວງຖະແຫຼງຂ່າວຕໍ່ສື່ມວນຊົນ ກ່ຽວກັບການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງບໍລິຄໍາໄຊ ຊຸດທີ II ເຊີ່ງຈະໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ວັນທີ 27 ຫາ 29 ທັນວາ 2023 ທີ່ຫ້ອງປະຊຸມສະພາປະຊາຊົນແຂວງບໍລິຄໍາໄຊ.
ກອງປະຊຸມໃນຄັ້ງນີ້, ຈະໄດ້ດຳເນີນເປັນເວລາ 3 ວັນເຕັມ ເພື່ອຮັບຟັງການລາຍງານ, ພິຈາລະນາ, ຮັບຮອງເອົາບັນຫາສໍາຄັນທີ່ເປັນພື້ນຖານຂອງແຂວງ, ດັ່ງນີ້:
- ຮັບຟັງການລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນເປັນຈຸດສຸມບູລິມະສິດຂອງແຂວງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2023 ແລະ ທິດທາງແຜນການ ປະຈຳປີ 2024.
- ພິຈາລະນາ ຮັບຮອງເອົາບົດລາຍງານຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນການລົງທຶນຂອງລັດ ປະຈຳປີ 2023 ແລະ ທິດທາງແຜນການ ປະຈໍາ 2024.
- ພິຈາລະນາ ຮັບຮອງເອົາບົດລາຍງານຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານ ປະຈຳປີ 2023 ແລະ ທິດທາງແຜນການ ປະຈຳປີ 2024.
- ພິຈາລະນາຮັບຮອງເອົາບົດລາຍງານການເຄື່ອນໄຫວ ປະຈໍາປີ 2023 ແລະ ທິດທາງແຜນການ ປະຈໍາປີ 2024, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານ ປະຈໍາປີ 2022 ຂອງອົງການກວດສອບພາກກາງ ແລະ ບົດລາຍງານການການ ຈັດຕັ້ງປະຕິບັດວຽກງານ ປະຈໍາປີ 2023 ແລະ ທິດທາງແຜນ ການ ປະຈໍາປີ 2024 ແລະ ການແກ້ໄຂຜົນການກວດສອບໃນປີຜ່ານມາ ຂອງອົງການກວດກາລັດແຂວງ
- ພິຈາລະນາ ຮັບຮອງເອົາ ບົດລາຍງານການເຄື່ອນໄຫວປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງອົງການໄອຍະການປະຊາຊົນແຂວງ ແລະ ຂອງສານປະຊາຊົນແຂວງ.
- ຮັບຟັງການລາຍງານຂອງພະແນກກະສິກໍາ ແລະ ປ່າໄມ້ແຂວງ ກ່ຽວກັບ ການສົ່ງເສີມການຜະລິດ ເພື່ອທົດແທນການນຳເຂົ້າ.
- ຮັບຟັງການລາຍງານ ຂອງພະແນກອຸດສາຫະກຳ ແລະ ການຄ້າ ກ່ຽວກັບ ການສົ່ງເສີມການຜະລິດ ຕິດພັນກັບຕະຫຼາດ, ການຄຸ້ມຄອງການນໍາເຂົ້າ ແລະ ສົ່ງອອກ.
- ຮັບຟັງການ ລາຍງານຂອງພະແນກສຶກສາທິການ ແລະ ກິລາ ກ່ຽວກັບ ການຜັນຂະຫຍາຍຈັດຕັ້ງປະຕິບັດມະຕິ 09/ລບ ລົງວັນທີ 17 ກໍລະກົດ 2023 ກ່ຽວກັບນະໂບາຍ ແລະ ມາດຕະການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບ.
- ຮັບຟັງການລາຍງານຂອງທະນາຄານແຫ່ງ ສປປ ລາວ ປະຈໍາພາກກາງ ກ່ຽວກັບ ການປະຕິບັດນະໂຍບາຍ ແລະ ມາດຕະການ ການຄຸ້ມຄອງອັດຕາແລກປ່ຽນ ແລະ ການບໍລິການຂອງທະນາຄານ.
- ພິຈາລະນາ ຮັບຮອງເອົາ ບົດລາຍງານການຈັດຕັ້ງປະຕິບັດວຽກງານປະຈໍາປີ 2023 ທິດທາງແຜນການ ປີ 2024 ຂອງສະພາປະຊາຊົນແຂວງບໍລິຄໍາໄຊ
- ຮັບຟັງການປະກອບຄຳເຫັນ ຂອງອົງການແນວລາວສ້າງຊາດແຂວງ ຕໍ່ກັບບົດລາຍງານການ ເຄື່ອນໄຫວປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງສະພາປະຊາຊົນແຂວງ.
- ພິຈາລະນາ ຮັບຮອງເອົານິຕິກໍາຂອງແຂວງ ຈໍານວນ 1 ສະບັບຄື: ຮ່າງຂໍ້ຕົກລົງ ຂອງທ່ານເຈົ້າແຂວງ ວ່າດວ້ຍການປັບປຸງລາຄານໍ້າປະປາໃຫມ່ ປະຈໍາປີ 2023-2025.
ພ້ອມນີ້, ຍັງຈະໄດ້ຮັບຟັງການອະທິບາຍ, ຊີ້ແຈງ ຈາກການນຳຂອງແຂວງ, ພະແນກການທີ່ກ່ຽວ ຂ້ອງຈຳນວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ; ບັນດາເນື້ອໃນທີ່ນຳມາຄົ້ນຄວ້າພິຈາລະນາ, ຮັບຮອງໃນກອງປະຊຸມຄັ້ງນີ້, ລ້ວນແລ້ວແຕ່ມີຄວາມໝາຍຄວາມສໍາຄັນຍິ່ງ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງແຂວງ; ສະນັ້ນ ຕາງໜ້າຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງ ຂໍຖືໂອກາດເຊີນຊວນມາຍັງພາກສ່ວນທີ່ກ່ຽວຂ້ອງ, ອົງການຈັດຕັ້ງສັງຄົມ, ປະຊາຊົນບັນດາເຜົ່າຊາວແຂວງບໍລິຄຳໄຊ ຈົ່ງໄດ້ພ້ອມກັນເຂົ້າຮ່ວມ ໃຫ້ການຕິດຕາມ, ສະໜັບສະໜູນ ເຮັດໃຫ້ກອງປະຊຸມຄັ້ງນີ້ ໄດ້ຮັບຜົນສຳເລັດຕາມຄາດໝາຍທີ່ວາງໄວ້;
ໃນເວລາດຳເນີນກອງປະຊຸມ ຍັງໄດ້ຖ່າຍທອດສົດ ບາງເນື້ອໃນທີ່ສໍາຄັນຈໍານວນໜຶ່ງ ຜ່ານສະຖານີວິທະຍຸແຂວງບໍລິຄຳໄຊ ແລະ ຍັງໄດ້ເປີດກວ້າງການປະກອບຄຳຄິດ-ຄຳເຫັນ, ຄໍາສະເໜີ ຈາກພໍ່ແມ່ປະຊາຊົນບັນດາເຜົ່າ ມາຍັງກອງປະຊຸມ ຜ່ານໂທລະສັບສາຍດ່ວນ ໝາຍເລກ 054 156 ໂດຍບໍ່ເສຍຄ່າບໍລິການ.