ໃນລະຫວ່າງວັນທີ 8-10 ສິງຫາ 2024 ນີ້ ຄະນະຜູ້ແທນສະພາປະຊາຊົນ ແຂວງດຽນບຽນ ສສ ຫວຽດນາມ ນຳໂດຍ ທ່ານ ລໍ ວັນເຟືອງ ປະທານສະພາປະຊາຊົນແຂວງດຽນບຽນ ພ້ອມດ້ວຍຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ ອອກຕ້ອນຮັບໂດຍ ທ່ານ ສິງຕັນ ໄຊລືຊົ່ງ ກຳມະການປະຈຳພັກແຂວງ, ຮອງປະທານສະພາປະຊາຊົນແຂວງພ້ອມດ້ວຍຄະນະ.
ໃນໂອກາດ ທີ່ຄະນະຜູ້ແທນສະພາປະຊາຊົນ ແຂວງດຽນບຽນ ມາຢ້ຽມຢາມ ຫຼວງພະບາງຄັ້ງນີ້ ກໍ່ໄດ້ເຂົ້າຮ່ວມພົບປະແລກປ່ຽນບົດຮຽນ ກັບສະພາປະຊາຊົນແຂວງຫຼວງພະບາງ ເຊິ່ງນໍາພາໂດຍທ່ານ ວົງສະຫວັນ ເທບພະຈັນ ຮອງເລຂາພັກແຂວງ, ປະທານສະພາປະຊາຊົນແຂວງ ໃນພິທີຄະນະຜູ້ແທນ ທັງສອງຝ່າຍ ໄດ້ພັດປ່ຽນກັນລາຍງານສະພາບການພັດທະນາເສດຖະກິດ-ສັງຄົມຂອງແຂວງ ຕິດພັນກັບພາລະບົດບາດ, ສິດ ແລະ ໜ້າ ທີ່ຂອງສະພາປະຊາຊົນແຂວງ ໃຫ້ກັນຮັບຊາບເປັນຕົ້ນແມ່ນ: ການຮັບຮອງເອົາມະຕິຕ່າງໆ ຕາມການສະເໜີຂອງອົງການປົກຄອງແຂວງ ການຕົກລົງຮັບຮອງເອົາບັນຫາສຳຄັນຕ່າງໆຂອງແຂວງ ເຊັ່ນ: ແຜນງົບປະມານລາຍຮັບ-ລາຍຈ່າຍ, ການລົງທຶນ, ການຕິດຕາມກວດກາບົດລາຍງານ ການປັບປຸງກົງຈັກການຈັດຕັ້ງ ແລະ ບຸກຄະລາກອນ ຂອງອົງການປົກຄອງແຂວງ, ການສ້າງຄວາມເຂັ້ມແຂງໃຫ້ສະມາຊິກສະພາ ແລະ ພະນັກງານສະພາປະຊົນແຂວງ, ການແກ້ໄຂຄຳຮ້ອງທຸກຂອງປະຊາຊົນ, ການທາບທາມຮ່າງກົດໝາຍ ແລະວຽກງານອື່ນໆ.
ພາຍຫຼັງສຳເລັດການພົບປະແລກປ່ຽນບົດຮຽນ ຄະນະນຳສະພາປະຊາຊົນແຂວງຫຼວງພະບາງ ໄດ້ນຳພາຄະນະຜູ້ແທນສະພາປະຊາຊົນແຂວງດຽນບຽນ ໄປທ່ຽວຊົມສະຖານທີ່ທ່ອງທ່ຽວທີ່ເປັັນເອກະລັກຂອງແຂວງຫຼວງພະບາງ ເຊັ່ນ: ຕະຫຼາດກາງຄືນ, ຮ້ານຫັດຖະກຳເຈ້ຍປໍສາບ້ານຊ່າງຄ້ອງ, ວັດຊຽງທອງ, ນໍ້າຕົກຕາດກວາງຊີ, ຫໍພິພິທະພັນແຫ່ງຊາດຫຼວງພະບາງ ໃນຕອນບາຍຂອງວັນທີ 10 ສິງຫາ 2024 ຄະນະຜູ້ແທນສະພາປະຊາຊົນແຂວງຫຼວງພະບາງ ໄດ້ອອກສົ່ງຄະນະຜູ້ແທນ ແຂວງດຽນບຽນ ເດີນທາງກັບດ້ວຍຄວາມສະຫວັດດີພາບ.
ຂ່າວ ແລະ ພາບ ນາງ ຄໍາຫຼ້າ ພອນພິລາ