ໃນຕອນເຊົ້າຂອງວັນທີ 6 ພະຈິກ 2024 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມທາບທາມບຸກຄະລາກອນຕໍາແໜ່ງບໍລິຫານ ປະເພດ 3, ປະເພດ 5 ແລະ ປະເພດ 6 ສະພາປະຊາຊົນແຂວງຄໍາມ່ວນ ໂດຍການເປັນປະທານ ຂອງທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີ ທ່ານ ສະເຫຼີມສັກ ແກ້ວຈັນທະລາ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງຄໍາມ່ວນ ມີຄະນະປະຈຳສະພາປະຊາຊົນຂັ້ນແຂວງ, ຄະນະກຳມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ຕະຫຼອດຮອດພະນັກງານພາຍໃນສະພາປະຊາຊົນແຂວງເຂົ້າຮ່ວມ.

ຈຸດປະສົງ: ຈັດກອງປະຊຸມການທາບທາມ ຄັ້ງນີ້ແມ່ນເພື່ອ ກຳນົດເປົ້າໝາຍພະນັກງານ ທີ່ ກໍ່ສ້າງ, ບັນຈຸ ຈັດວາງເຂົ້າໃນຕຳແໜ່ງງານຕ່າງໆ ເປັນຕົ້ນ ແມ່ນຕຳແໜ່ງນຳພາ ແລະ ຄຸ້ມຄອງແຕ່ລະຂັ້ນ ມີລັກສະນະສືບທອດ-ຕໍ່ເນື່ອງ, ທັງຮັບປະກັນໃຫ້ໄດ້ພະນັກງານທີ່ມີຄວາມໜັກແໜ້ນທາງດ້ານຄຸນທາດການເມືອງ, ມີຄວາມຮູ້ຄວາມສາມາດໃນລະດັບອັນແນ່ນອນເປັນການກະກຽມເປົ້າໝາຍບຸກຄະລາກອນທີ່ມີລັກສະນະເປີດກວ້າງ ເພື່ອເປັນບ່ອນອີງພື້ນຖານທີ່ສຳຄັນໃຫ້ແກ່ການ ວາງແຜນລະອຽດໃນຖັນແຖວພະນັກງານ-ລັດຖະກອນ ຂະແໜງການຂອງສະພາປະຊາຊົນແຂວງຄໍາມ່ວນ.

ກອງປະຊຸມໄດ້ຮັບຟັງ ດຳລັດວ່າດ້ວຍມາດຕະຖານຕໍາແໜ່ງບໍລິຫານຂອງພະນັກງານ-ລັດຖະກອນ ສ ປປ ລາວ ເປັນຕົ້ນກ່ຽວກັບ ທັດສະນະຫຼັກໝັ້ນການເມືອງໜັກແໜ້ນ, ຊີວະປະຫວັດຈະແຈ້ງ, ບໍລິສຸດຕໍ່ພັກ, ຕໍ່ປະເທດຊາດ ແລະ ອຸດົມການປະຕິວັດ, ຮູ້ຈັກຈຳແນກມິດ-ສັດຕູຢ່າງຈະແຈ້ງ, ມີຄວາມເປັນແບບຢ່າງໃນການຝຶກຝົນຫຼໍ່ຫຼອມຕົນເອງ, ສາມາດເຕົ້າໂຮມຄວາມສາມັກຄີ, ຜ່ານຜ່າອຸປະສັກ ແລະ ບໍ່ຫວັ່ນໄຫວຄອນແຄນຕໍ່ສະພາບທີ່ຜັນແປຢູ່ພາຍໃນ ແລະ ສາກົນ, ມີຄຸນສົມບັດ ສິນທຳປະຕິວັດ, ແບບແຜນດຳລົງຊີວິດ, ມີມາດຕະຖານຄວາມຮູ້ຄວາມສາມາດທີ່ແນ່ນອນ, ຮູ້ພາສາຕ່າງປະເທດໃດໜຶ່ງທີ່ຈໍາເປັນໃນລະດັບກາງຂຶ້ນໄປ,  ມີແບບແຜນວິທີເຮັດວຽກຢ່າງລະອຽດ, ມີສຸຂະພາບແຂງແຮງດີ,  ສາມາດຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ຈາກນັ້ນກອງເລຂາກໍ່ໄດ້ຢາຍບັດທາບທາມເປົ້າໝາຍພະນັກງານຮອບ I ແລະ ຮອບ II, ເພື່ອເລືອກເຟັ້ນເອົາຜູ້ທີ່ມີມາດຖານເງື່ອນໄຂຄົບຖ້ວນທີ່ຈະກໍ່ສ້າງ ເປັນພະນັກງານນຳພາ ແລະ ຄຸ້ມຄອງ ຂອງສະພາປະຊາຊົນແຂວງຄໍາມ່ວນ.

ໂດຍ: ເອື້ອ ມະໂນສິງ