ຕອນເຊົ້າຂອງວັນທີ 31 ພຶດສະພາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມສະຫຼຸບການ ເຄື່ອນໄຫວວຽກງານຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ທິດທາງແຜນການປະຈໍາປີ 2024 ແລະ ຈັດພິທີມອບໃບຍ້ອງຍໍປະຈໍາປີ 2023 ໃຫ້ແກ່ພະນັກງານ-ລັດຖະກອນພາຍໃນສະພາປະຊາຊົນແຂວງຄໍາມ່ວນ ໂດຍການເປັນປະທານຂອງທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ມີບັນດາທ່ານຄະນະປະຈຳສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ, ພະນັກງານລັດຖະກອນພາຍໃນສະພາປະຊາຊົນແຂວງ ແລະ ແຂກທີ່ຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ທິດທາງແຜນການປະຈໍາປີ 2024,ຈາກນັ້ນ, ກອງປະຊຸມໄດ້ຈັດພິທີມອບໃບຍ້ອງຍໍໃຫ້ບຸກຄົນດີເດັ່ນເຊິ່ງ, ຜ່ານການປະເມີນຜົນຂະບວນການແຂ່ງຂັນປະກອບມີພະນັກງານມີປະເພດດີຫຼາຍ ແລະ ປະເພດດີ, ບຸກຄົນດີເດັ່ນທີ່ໄດ້ຮັບໃບຍ້ອງຍໍປະເພດດີຫຼາຍຈໍານວນ 45 ທ່ານ ຍິງ 22 ທ່ານ ແລະ ບຸນຄົນດີເດັ່ນທີ່ໄດ້ຮັບໃບຍ້ອງຍໍປະເພດດີຈໍານວນ 9 ທ່ານ, ຍິງ 3 ທ່ານ .
ໃບຍ້ອງຍໍຂອງທ່ານເຈົ້າແຂວງຄໍາມ່ວນ ແມ່ນມອບໂດຍທ່ານ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ແລະ ໃບຍ້ອງຍໍຂອງຄະນະເລຂາທິການສະພາປະຊາຊົນແຂວງຄໍາມ່ວນ ແມ່ນມອບໂດຍທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນຂັ້ນແຂວງ.
ໃນກອງປະຊຸມສະຫຼຸບຄັ້ງນີ້, ບັນດາຕາງໜ້າຄະນະຮັບຜິດຊອບຂະບວນການແຂ່ງຂັນຮັກຊາດ ແລະ ພັດທະນາ ໄດ້ຂຶ້ນຈັບມືແຂ່ງຂັນປະຈໍາປີ 2024 ໂດຍເປັນການສືບຕໍ່ການຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງ, ຄະນະກຳມະການ, ຄະນະເລຂາທິການ ແລະ ພະນັກງານເສນາທິການໃຫ້ແກ່ສະພາປະຊາຊົນຂັ້ນແຂວງດ້ວຍຄາດໝາຍຂອງການແຂ່ງຂັນ ໃຫ້ໄວ, ໃຫ້ດີ, ໃຫ້ຫຼາຍ, ໃຫ້ຖືກກົດໝາຍ ແລະ ເນື້ອໃນການແຂ່ງຂັນ ມີ 3 ຂໍ້ຄື: 1. ແຂ່ງຂັນການຈັດຕັ້ງປະຕິບັດວຽກງານທີ່ດີມີວິທະຍາສາດ; 2. ແຂ່ງຂັນປະຕິບັດລະບຽບກົດໝາຍຢ່າງເຂັ້ມງວດ ແລະ 3. ແຂ່ງຂັນປະຕິບັດວຽກງານດ້ານວິຊາສະເພາະ, ຍົກສູງຄວາມເປັນເຈົ້າການປັບປຸງກົງຈັກການຈັດຕັ້ງ ແລະ ແບບແຜນວິທີການເຮັດວຽກ ໃຫ້ມີປະສິດທິພາບ.
ໃນຕອນທ້າຍກອງປະຊຸມ, ທ່ານຮອງປະທານສະພາປະຊາຊົນແຂວງຄໍາມ່ວນ ໄດ້ໂອ້ລົມຕໍ່ກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດວຽກງານແຂ່ງຂັນຮັກຊາດ ແລະ ພັດ ທະນາ ເຊິ່ງບັນດາ, ຄະນະກຳມະການ, ຄະນະເລຂາທິການ ແລະ ພະນັກງານ-ລັດຖະກອນ ໄດ້ເປັນເຈົ້າການໃນການຈັດຕັ້ງປະຕິບັດວຽກງານ ຕາມພາລະບົດບາດ, ໜ້າທີ່ຄວາມຮັບຜິດຊອບຂອງຕົນດ້ວຍຄວາມຮັບຜິດຊອບສູງ ເຮັດໃຫ້ວຽກງານຂອງສະພາປະຊາຊົນແຂວງຄໍາມ່ວນສໍາເລັດຕາມແຜນການທີ່ວາງໄວ້ ໂດຍສະເພາະການປະຕິບັດ 3 ພາລະບົດບາດຂອງສະພາປະຊາຊົນຂັ້ນແຂວງຄື: ພິຈາລະນາ ແລະ ຮັບຮອງ ນິຕິກໍາໃຕ້ກົດໝາຍ, ຕົກລົງບັນຫາສໍາຄັນພື້ນຖານຂອງທ້ອງຖິ່ນ, ຕິດຕາມກວດການການເຄົາລົບ, ປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ຂອງບັນດາອົງການລັດຂັ້ນແຂວງ; ພ້ອມນັ້ນທ່ານຍັງໄດ້ເນັ້ນໜັກໃຫ້ບັນດາສະມາຊິກພັກ ແລະ ພະນັກງານລັດຖະກອນຈົ່ງສືບຕໍ່ຮັກສາມູນເຊື້ອຄວາມສາມັກຄີ ແລະ ເພີ່ມທະວີຄວາມສາມາດໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ເປັນເສນາທິການຮອບດ້ານໃຫ້ແກ່ສະພາປະຊາຊົນຂັ້ນແຂວງ, ຄະນະປະຈໍາສະພາປະຊາຊົນຂັ້ນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ12 ແລະ ຄະນະສະມາຊິກສະພາປະຊາຊົນຂັ້ນແຂວງ ເພື່ອເຮັດໃຫ້ການຈັດຕັ້ງປະຕິບັດວຽກງານມີຜົນສໍາເລັດ ແລະ ມີປະສິດທິພາບສູງ.
ໂດຍ: ເອື້ອ ມະໂນສິງ