ອີງຕາມແຜນການຂອງຄະນະປະຈໍາສະພາແຫ່ງຊາດ ກ່ຽວກັບການປັບປຸງກົດໝາຍ 4 ສະບັບ ໃນຂົງເຂດສະພາແຫ່ງຊາດ ສະບັບເລກທີ 06/ຄປຈ, ລົງວັນທີ 27 ມີນາ 2023 ແລະ ໂດຍປະຕິບັດຕາມແຈ້ງການຂອງຄະນະເລຂາທິການສະພາແຫ່ງຊາດ ສະບັບເລກທີ 195/ຄລສ, ລົງວັນທີ 17 ພຶດສະພາ 2023 ກ່ຽວກັບແຈ້ງການເປີດກອງປະຊຸມດໍາເນີນປະເມີນ ແລະ ຄົ້ນຄວ້າທາບທາມ ໃສ່ເນື້ອໃນກົດໝາຍວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງເພື່ອປັບປຸງ, ສະນັ້ນ ໃນຕອນເຊົ້າຂອງວັນທີ 26 ພຶດສະພາ 2023 ທີ່ສະພາປະຊາຊົນແຂວງຄໍາມ່ວນ ໂດຍການເປັນປະທານ ຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນຂັ້ນແຂວງ ແລະ ຫົວໜ້າ-ຮອງຫົວໜ້າຂະແໜງເຂົ້າຮ່ວມ.

ວາລະດໍາເນີນກອງປະຊຸມ ທ່ານ ບຸນມີ ພິມມະສອນ ໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມທາບທາມຄໍາເຫັນໃສ່ເນື້ອໃນກົດໝາຍວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ແມ່ນເພື່ອແນ່ໃສ່ຕາມແຜນທີ່ໄດ້ກຳນົດການສ້າງ ແລະ ປັບປຸງກົດໝາຍ ປະຈໍາປີ 2023, ທີຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ IX ທີ່ຈະມາເຖິງນີ້, ເພື່ອເຮັດໃຫ້ການຄົ້ນຄວ້າ, ປັບປຸງກົດໝາຍສະບັບດັ່ງກ່າວມີເນື້ອໃນເລິກເຊິ່ງ, ແທດເໝາະກັບສະພາບຄວາມເປັນຈິງ. ທ່ານ ຮຽກຮ້ອງມາຍັງຜູ້ແທນເຂົ້າຮ່ວມກອງປະຊຸມຈົ່ງສຸມໃສ່ ຄົ້ນຄວ້າປະກອບຄໍາຄິດຄໍາເຫັນຢ່າງກົງໄປກົງມາດ້ວຍເຫດຜົນ ແລະ ປະສົບການທີ່ໄດ້ຈັດຕັ້ງປະຕິບັດຜ່ານມາໃນວຽກງານຕົວຈິງ ມາແລກປ່ຽນປະກອບຄໍາເຫັນອັນເປັນປະໂຫຍດມາປັບປຸງເຂົ້າໃນກົດໝາຍ ສະບັບນີ້ ໃຫ້ມີເນື້ອໃນຮັດກຸມ,ສອດຄ່ອງ ກັບສະພາບຄວາມເປັນຈິງ, ໃຫ້ມີເນື້ອໃນຖືກຕ້ອງຕາມລັດຖະທຳມະນູນ ແລະ ແນວທາງຂອງພັກ.

ຊຶ່ງເນື້ອໃນກົດໝາຍວ່າດ້ວຍ ການຕິດຕາມກວດກາ ຂອງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບປຸງ ໄດ້ປະກາດນຳໃຊ້ ວັນທີ 15 ພະຈິກ 2016 ປະກອບມີ VIII ພາກ, 5 ໝວດ ແລະ 104 ມາດຕາ, ສ່ວນເນື້ອໃນທີ່ຄວນໄດ້ມີການຄົ້ນຄວ້າລົງເລີກປັບປຸງຄັ້ງນີ້ເບື້ອງຕົ້ນແມ່ນມາດຕາ 2,7,8,9,10,19,23 ແລະ ມາດຕາອຶ່ນໆ; ພາຍຫລັງສັງລວມຄໍາຄິດ-ຄໍາເຫັນຂອງບັນທ່ານຜູ້ແທນຈະໄດ້ເຮັດບົດລາຍງານນຳສົ່ງຕໍ່ຄະນະຮັບຜິດຊອບປັບປຸງກົດໝາຍ ສະພາແຫ່ງຊາດ.

ໂດຍ: ເອື້ອ ມະໂນສິງ ( ອາລີ )