ພິທີປະດັບຫຼຽນໄຊ, ຫຼຽນກາແຮງງານ ແລະ ມອບໃບຍ້ອງຍໍບຸກຄົນທີ່ມີຜົນງານດີເດັ່ນ ໃນຂະບວນການແຂ່ງຂັນ ຮັກຊາດ ແລະ ພັດທະນາ 2016 – 2020 ໄດ້ຈັດຂື້ນ ໃນຕອນເຊົ້າວັນທີ 8 ພຶດສະພາ 2023. ທີ່ສຳນັກງານສະພາປະຊາຊົນແຂວງຄໍາມ່ວນ, ໂດຍການເປັນປະທານຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ມີບັນດາທ່ານຄະນະປະຈຳສະພາປະຊາຊົນແຂວງ, ອະດີດຄະນະປະຈໍາສະພາປະຊາຊົນແຂວງ ຊຸດທີ I, ຄະນະກຳມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ, ພະນັກງານ-ວີຊາການ ພາຍໃນສະພາປະຊາຊົນແຂວງ ແລະ ແຂກທີ່ຖືກເຊີນເຂົ້າຮ່ວມ.

ໃນພິທີໄດ້ຮັບຟັງການຜ່ານບົດສະຫຼຸບຜົນງານ 5 ປີ 2016-2020, ບົດສະຫຼຸບແຂ່ງຂັນຂັນຍ້ອງຍໍ ປະຈໍາປີ 2022, ດໍາລັດຂອງທ່ານ ປະທານປະເທດ ສະບັບເລກທີ 160/ປປທ, ລົງວັນທີ 14/09/2022; ຜ່ານດໍາລັດຂອງທ່ານ ນາຍົກລັດຖະມົນຕີ ສະບັບເລກທີ 369/ນຍ, ລົງວັນທີ 24/09/2022 ແລະ ຂໍ້ຕົກລົງຂອງທ່ານ ເຈົ້າແຂວງ ສະບັບເລກທີ 597/ຈຂ.ຄມ, ລົງວັນ 28 ພຶດສະພາ 2021.

ຈາກນັ້ນ, ຍັງໄດ້ມີ ພິທິມອບ ຫຼຽນໄຊ, ຫຼຽນກາ ແລະ ມອບໃບຍ້ອງຍໍຜົນງານ 5 ປີ (2016-2020), ໃນນັ້ນຫຼຽນໄຊແຮງງານຊັ້ນ I ມີ 3 ທ່ານ, ຫຼຽນໄຊແຮງງານຊັ້ນ II ມີ 1 ທ່ານ, ຫຼຽນໄຊແຮງງານຊັ້ນ III ມີ 8 ທ່ານ, ຍິງ 3 ທ່ານ, ຫຼຽນກາແຮງງານມີ 6 ທ່ານ, ຍິງ 3 ທ່ານ, ໃບຍ້ອງຍໍລັດຖະບານມີ 3 ຍິງທ່ານ ແລະ ໃບຍ້ອງຍໍທ່ານເຈົ້າແຂວງມີ 11 ທ່ານ, ຍິງ 7 ທ່ານ, ເຊິ່ງຜົນງານດັ່ງກ່າວເປັນການປະກອບສ່ວນອັນສໍາຄັນໃຫ້ແກ່ການພັດທະນາປະເທດຊາດກໍຄືແຂວງຄໍາມ່ວນ. ພ້ອມນັ້ນ, ໄດ້ສະຫຼຸບວຽກງານການຈັດຕັ້ງປະຕິບັດຂະບວນການແຂ່ງຂັນຍ້ອງຍໍພາຍໃຕ້ ຄໍາຂວັນຮັກຊາດ ແລະ ພັດທະນາປະຈໍາປີ 2022, ພ້ອມທັງເປີດຂະບວນການແຂ່ງຂັນຍ້ອງຍໍປະຈໍາປີ 2023 ບັນດາຂະແໜງການຊ່ວຍວຽກພາຍໃນສະພາປະຊາຊົນແຂວງໄດ້ຂຶ້ນຈັບມືື່ອຮັບຮອງເອົາຫົວຂໍ້ແຂ່ງຂັນຍ້ອງຍໍ ພາຍໃຕ້ຄໍາຂັວນ ຮັກຊາດ ແລະ ພັດທະນາ ປະຈໍາປີ 2023.

ໂອກາດດັ່ງກ່າວ, ທ່ານ ບຸນມີ ພິມະສອນ ປະທານສະພາປະຊາຊົນແຂວງຄໍາມ່ວນ ໄດ້ມີຄຳເຫັນໂອ້ລົມຍ້ອງຍໍຊົມເຊີຍຜົນງານ 5 ປີທີ່ຍາດມາໄດ້ ພ້ອມທັງຮຽກຮ້ອງ ຄະນະພັກ, ສະມາຊິກພັກ ແລະ ພະນັກງານ ຕ້ອງກໍາແໜ້ນຈຸດປະສົງ, ຄາດໝາຍ ແລະ ເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ ໃຫ້ເລິກເຊິ່ງ, ບັນດາເນື້ອໃນ ໃຫ້ລະອຽດຈະແຈ້ງ ແລະ ໃຫ້ບັນລຸຕາມ 4 ຄາດໝາຍ: ຕ້ອງຖືເອົາວຽກງານແຂ່ງຂັນຮັກຊາດ ແລະ ພັດທະນາ ເປັນວຽກຍຸດທະສາດໃນດ້ານການເມືອງ, ການປົກຄອງ, ການພັດທະນາເສດຖະກິດ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ; ຖືວຽກແຂ່ງຂັນຮັກຊາດ ແລະ ພັດທະນາເປັນທັງທິດທາງລວມ, ແລະ ທັງເປັນເນື້ອໃນວຽກງານຂອງຂົງເຂດ ຫຼື ຂະແໜງການຕົນຢ່າງຈະແຈ້ງ, ເປັນສະຕິ ກໍ່ຄື ເປັນຫຼັກການ ໃນການເຄື່ອນໄຫວ ຂອງ ການນຳພາ, ຄຸ້ມຄອງຖືເປັນມາດຕາການໜຶ່ງທີ່ສໍາຄັນ ໃນການຕີລາຄາຄວາມຮູ້, ຄວາມສາມາດ ແລະ ຄວາມຮັບຜິດຊອບການເມືອງ ໂດຍຖືເປັນບັນຫາທີ່ຕ້ອງຕິດພັນກັບເນື້ອໃນດໍາເນີນຊີວິດ, ການຕິຊົມຕົນເອງ ແລະ ຕິຊົມກັນຢູ່ພາຍໃນ ຢ່າງເລິກເຊິ່ງເຖິງຖ່ອງ ຈຶ່ງເຮັດໃຫ້ການປັບປຸງລະບົບການເມືອງ, ການພັດທະນາເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານຂອງສະພາປະຊາຊົນຂັ້ນແຂວງ ມີຄວາມໜັກແໜ້ນ, ເຂັ້ມແຂງປະກອບສ່ວນເຂົ້າໃນການພັດທະນາປະເທດຊາດກໍ່ຄືແຂວງຄໍາມ່ວນນັບມື້ກ້າວໜ້າຢ່າງບໍ່ຢຸດຢັ້ງ.

ໂດຍ: ເອື້ອ ມະໂນສິງ