ວັນທີ 7 ມີນາ 2023 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໄດ້ຈັດພິທີເຜີຍແຜ່, ເຊື່ອມຊຶມເອກະສານສຳຄັນຕ່າງໆ ຂອງພັກ-ຂອງຊາດ ໂດຍການເປັນປະທານ ​ແລະ ​ເຜີຍ​ແຜ່ຂອງສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ມີບັນດາທ່ານ ຄະນະປະຈໍາສະພາປະຊາຊົນແຂວງຄໍາມ່ວນ, ຄະນະໜ່ວຍສະພາປະຊາຊົນແຂວງ, ສະມາຊິກພັກ ແລະ ຕະຫຼອດຮອດພະນັກງານພາຍໃນສະພາປະຊາຊົນແຂວງເຂົ້າຮ່ວມ.

ເນື້ອໃນເອກະສານທີ່ເຜີຍແຜ່, ເຊື່ອມຊຶມຄັ້ງນີ້ມີຄື: ຄຳສັ່ງ ສະບັບເລກທີ 268/ຄລສພ, ລົງວັນທີ 20ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ, ຄໍາແນະນໍາ ສະບັບເລກທີ 161/ຄຈຂ, ລົງວັນທີ 16 ກຸມພາ 2023 ກ່ຽວກັບການດໍາເນີນກອງປະຊຸມຄົບຄະນະກາງສະໄໝຂອງຄະນະພັກແຕ່ລະຂັ້ນ, ຄໍາແນະນໍາ ສະບັບເລກທີ 25/ຄຈສພ, ລົງວັນທີ 24 ມັງກອນ 2023 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ພ້ອມນັ້ນ ກອງປະຊຸມຍັງໄດ້ຮັບຟັງການເຜີຍແຜ່ປະຫັວດຄວາມເປັນມາຂອງວັນແມ່ຍິງສາກົນ ຄົບຮອບ 113 ປີ ( 8 ມີນາ 1910 – 8 ມີນາ 2023 ) ເຊິ່ງການເຜີຍແຜ່, ເຊື່ອມຊຶມໃນຄັ້ງນີ້ ເພື່ອເປັນການສ້າງໃຫ້ ສະມາຊິກພັກ-ພະນັກງານ ໄດ້ມີຄວາມຮັບຮູ້ເຂົ້າໃຈ ແລະ ມີຄວາມເປັນເອກະພາບກຳແໜ້ນເນື້ອໃນບັນດາມະຕິ, ຄຳສັ່ງ, ຄຳແນະນຳ ແລະ ປະຫວັດຄວາມເປັນມາຂອງວັນແມ່ຍິງສາກົນຢ່າງເລິກເຊິ່ງເພື່ອນຳເອົາບັນດາເນື້ອໃນຈິດໃຈດັ່ງກ່າວ  ມາເປັນບ່ອນອີງທີ່ຕິດພັນກັບວຽກງານຕົວຈິງໃນຂະແໜງການຂອງຕົນ ບົນຈິດໃຈຍູ້ແຮງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກ ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງຄໍາມ່ວນ ໃຫ້ເປັນຂະບວນການຟົດຟື້ນ, ກວ້າງຂວາງ ແລະ ມີຜົນສຳເລັດ.

ໂດຍ: ເອື້ອ ມະໂນສິງ