ໃນວັນທີ 22 ທັນວາ 2022 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ຈັດພິທີປາຖະກະຖາວັນສໍາຄັນຂອງຊາດ-ຂອງພັກຄື: ວັນຊາດ ທີ 02 ທັນວາ ຄົບຮອບ 47 ປີ (2/12/1975-02/12/2022) ແລະ ວັນເກີດປະທານ ໄກສອນ ພົມວິຫານ ຄົບຮອບ 102 ປີ (13/12/1920-13/12/2022) ໂດຍໃຫ້ກຽດເຂົ້າຮ່ວມເປັນປະທານ ແລະ ເຜີຍແຜ່ເອກະສານປະຫວັດສາດວັນສໍາຄັນໃນຄັ້ງນີ້ໂດຍ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ແລະ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ປະທານຄະນະກຳມະການຍຸຕິທໍາ ແລະ ປກຊ-ປກສ, ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ ແລະ ຫົວໜ້າ-ຮອງຫົວໜ້າຂະແໜງ, ຕະຫຼອດຮອດພະນັກງານ-ລັດຖະກອນພາຍໃນສະພາປະຊາຊົນແຂວງເຂົ້າຮ່ວມຮັບຟັງ.
ໃນການປາຖະກະຖາລະນຶກວັນປະຫວັດສາດສໍາຄັນດັ່ງກ່າວ ແມ່ນໄດ້ຍົກໃຫ້ເຫັນເຖິງມູນເຊື້ອ ແລະ ຄວາມໝາຍສໍາຄັນຂອງວັນຊາດ 02 ທັນວາ ໂດຍສະເພາະແມ່ນ ຊາດລາວມີມູນເຊື້ອທີ່ສະຫງ່າ ອົງອາດ ແຫ່ງການຕໍ່ສູ້ຂອງປະຊາຊົນລາວບັນດາເຜົ່າພາຍໃຕ້ການນຳພາຂອງພັກ ປະຊາຊົນປະຕິວັດລາວ ໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່ ສາມາດປົດປ່ອຍປະເທດຊາດຢ່າງມີໄຊ, ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975, ເຊິ່ງ ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດຊາດລາວເຮົາແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ. ພ້ອມດຽວກັນຍັງໄດ້ຍົກໃຫ້ເຫັນຜົນງານແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຕະຫລອດໄລຍະ 47 ປີ ພາຍຫລັງປະເທດຊາດເຮົາໄດ້ຮັບການສະຖາປານາ ເປັນຕົ້ນແມ່ນໄລຍະ 10 ປີ ແຫ່ງການຟຶ້ນຟູເສດຖະກິດ – ວັດທະນະທໍາສັງຄົມ (1975-1985), ໄລຍະ 35 ປີ ແຫ່ງການຈັດຕັ້ງປະຕິບັດແນວທາງປ່ຽນແປງໃໝ່ (ແຕ່ປີ 1986 ຈົນເຖິງປະຈຸບັນ) ທີ່ໄດ້ສ່ອງແສງໃຫ້ເຫັນຜົນງານທີ່ພົນເດັ່ນໃນແຕ່ລະດ້ານເປັນອັນລະອຽດ.
ໂອກາດດຽວກັນນັ້ນທ່ານ ຄໍາສຸກ ວັນທະວົງສາ ກໍ່ໄດ້ຫວນຄືນໃຫ້ເຫັນປະຫວັດ ວັນເກີດ ຂອງທ່ານ ປະທານ ໄກສອນ ພົມວິຫານ ຄົບຮອບ 102 ປີ(13 ທັນວາ 1920-13 ທັນວາ 2022) ເປັນຕົ້ນແມ່ນ ຊີວິດ ແລະ ການເຄື່ອນໄຫວປະຕິວັດຂອງປະທານ ໄກສອນ ພົມວິຫານ, ຜົນງານ ແລະ ຄຸນງາມຄວາມດີຂອງທ່ານໃນການຊີ້ນໍາໆພາ ພາລະກິດການປະຕິວັດ, ການເສີມຂະຫຍາຍ ແລະ ສືບທອດມໍລະດົກອັນລໍາຄ່າຂອງປະທານ ໄກສອນ ພົມວິຫານ ທີ່ໄດ້ສ້າງໄວ້, ທ່ານແມ່ນນັກຮັກຊາດຜູ້ຍິ່ງໃຫຍ່, ແມ່ນລູກຜູ້ປະເສີດຂອງປະຊາຊົນລາວບັນດາເຜົ່າ, ແມ່ນນັກປະຕິວັດຜູ້ດີເລີດ, ເປັນຜູ້ນຳສູງສຸດຂອງການປະຕິວັດລາວ ທີ່ມີຄວາມປີຊາສາມາດ, ມີຄວາມສະຫລາດຫລັກແຫລມ, ມີໄຫວພິບອັນແຫລມຄົມ ແລະ ມີນໍ້າໃຈຕໍ່ສູ້ອັນເດັດດ່ຽວໜຽວແໜ້ນ ເປັນຜູ້ນຳທີ່ແສນເຄົາລົບຮັກຂອງປະຊາຊົນ ແລະ ເປັນວິລະບູລຸດຂອງຊາດລາວເຮົາ.
ໂດຍ: ເອື້ອ ມະໂນສິງ.