ວັນທີ 4 ພະຈິກ 2022 ທີ່ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມປະເມີນຜົນການປະຕິບັດວຽກງານ ຂອງພະນັກງານ-ລັດຖະກອນ ປະຈໍາປີ 2022 ໂດຍການເປັນປະທານຂອງທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ເປັນກຽດເຂົ້າຮ່ວມໂດຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍບັນດາ ທ່ານຄະນະປະຈໍາສະພາປະຊາຊົນແຂວງ, ຄະນະກໍາການສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ ແລະ ຄະນະຮັບຜິດຊອບປະເມີນຜົນຂັ້ນແຂວງ, ມີຫົວໜ້າ-ຮອງຫົວໜ້າຂະແໜງ ຕະຫຼອດເຖິງພະນັກງານວິຊາການເຂົ້າຮ່ວມ ທັງໝົດ 45 ທ່ານ, ຍິງ 22 ທ່ານ.

ພາຍຫຼັງ ປະທານ ກ່າວເປີດກອງປະຊຸມ ຄະນະຮັບຜິດຊອບປະເມີນຜົນຂັ້ນແຂວງ ໄດ້ຂຶ້ນຜ່ານດໍາລັດວ່າດ້ວຍການປະເມີນຜົນການປະຕິບັດວຽກງານ ຂອງພະນັກງານ-ລັດຖະກອນ ສະບັບເລກທີ 300/ລບ, ລົງວັນທີ 13 ກັນຍາ 2017;  ດໍາລັດ ວ່າດ້ວຍຈັນຍາບັນຂອງພະນັກງານ-ລັດຖະກອນ ສະບັບເລກທີ 184/ລບ, ລົງວັນທີ 26 ມິຖຸນາ 2019. ຈາກນັ້ນຍັງໄດ້ຮັບຟັງການແນະນຳກ່ຽວກັບຂັ້ນຕອນ ແລະ ວິທີການໃຫ້ຄະແນນຕົນເອງ ແລະ ໝູ່ຄະນະຈາກຄະນະປະເມີນຂັ້ນແຂວງ, ເພື່ອໃຫ້ບັນດາພະນັກງານ-ລັດຖະກອນ ໄດ້ຮັບຮູ້ເຊື່ອມຊຶມ ແລະ ເຂົ້າໃຈຢ່າງຖືກຕ້ອງແນໃສ່ຮັບປະກັນການຈັດຕັ້ງປະຕິບັດປະເມີນຜົນພະນັກງານ-ລັດຖະກອນ ໄດ້ດຳເນີນໄປຢ່າງເປັນລະບົບ ຖືກຕ້ອງສອດຄ່ອງກັບນິຕິກຳຂອງຂັ້ນເທິງວາງອອກ ແລະ ຮັບປະກັນຄວາມເປັນເອກະພາບ, ໂປ່ງໃສ ແລະ ຖືກຕ້ອງກັບຄວາມເປັນຈິງ.

ໃນຕອນທ້າຍຍັງໄດ້ຮັບຟັງການໂອ້ລົມຂອງ ປະທານ ກອງປະຊຸມ ເຊິ່ງໄດ້ເນັ້ນໜັກມາຍັງຄະນະຮັບຜິດຊອບ ພ້ອມດ້ວຍພະນັກງານ-ລັດຖະກອນ ຈົ່ງກໍາແໜ້ນໄດ້ເນື້ອໃນ ດໍາລັດວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ແລະ ດໍາລັດວ່າດ້ວຍຈັນຍາບັນ ຂອງພະນັກງານ-ລັດຖະກອນ ແລະ ມອບໃຫ້ຄະນະພັກ, ຄະນະນຳສືບຕໍ່ສຶກສາອົບຮົມດ້ານການເມືອງແນວຄິດ ໃຫ້ສະມາຊິກພັກ-ພະນັກງານຢ່າງເປັນປົກກະຕິ; ສະມາຊິກພັກ-ພະນັກງານ ສືບຕໍ່ຄົ້ນຄວ້ານິຕິກຳຕ່າງໆທີ່ເປັນບ່ອນອິງໃນການຈັດຕັ້ງປະຕິບັດວຽກງານ; ສະມາຊິກພັກ-ພະນັກງານ ທຸກສະຫາຍຈົ່ງພ້ອມກັນເປັນເຈົ້າການໃນການຈັດຕັ້ງປະຕິບັດ ກົດລະບຽບພັກ, ລະບຽບລັດຖະກອນ, ມີຄວາມສາມັກຄີ, ເປັນເອກະພາບ, ມີຈັນຍາບັນ, ຕໍ່ໜ້າທີ່ວຽກງານທີ່ໄດ້ຮັບການມອບໝາຍມີແບບແຜນວິທີເຮັດວຽກ ຍອມເສຍສະຫຼະ ສຸມທຸກເຫື່ອແຮງຕໍ່ການປະຕິວັດ ເພື່ອສ້າງການຈັດຕັ້ງມີຄວາມເຂັ້ມແຂງ ເປັນພະນັກງານດີເດັ່ນ ໄດ້ຮັບການຍ້ອງຍໍຈາກອົງການ ແລະ ສັງຄົມ.

ໂດຍ: ເອື້ອ ມະໂນສິງ ( ອາລີ )