ໃນຕອນເຊົ້າຂອງວັນທີ 15 ມິຖຸນາ 2022 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມລະດົມແນວຄິດປະກອບຄໍາເຫັນໃສ່ຮ່າງນິຕິກຳໃຕ້ກົດໝາຍກ່ຽວກັບ ຮ່າງຂໍ້ຕົກລົງວ່າດ້ວຍການພົວພັນ ລະຫວ່າງ ຄະນະປະຈໍາສະພາປະຊາຊົນແຂວງຄໍາມ່ວນ ກັບ ຄະນະປະຈໍາຄະນະກຳມະການແນວລາວສ້າງຊາດແຂວງຄໍາມ່ວນ ໂດຍການເປັນປະທານຂອງ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ ແລະ ຫົວໜ້າ-ຮອງຫົວໜ້າຂະແໜງພາຍໃນສະພາປະຊາຊົນແຂວງເຂົ້າຮ່ວມ.

ຮ່າງນິຕິກຳໃຕ້ກົດໝາຍທີ່ນຳມາທາບທາມໃນຄັ້ງນີ້ແມ່ນຮ່າງຂໍ້ຕົກລົງວ່າດ້ວຍການພົວພັນລະຫວ່າງຄະນະປະຈໍາສະພາປະຊາຊົນແຂວງ ກັບ ຄະນະປະຈໍາຄະນະກຳມະການແນວລາວສ້າງຊາດແຂວງຄໍາມ່ວນ ເຊິ່ງປະກອບມີ 5 ໝວດ, 22 ມາດຕາ, ເຊິ່ງໃນກອງປະຊຸມບັນດາທ່ານຜູ້ແທນ ແລະ ທ່ານທີ່ເຂົ້າຮ່ວມກອງປະຊຸມກໍ່ໄດ້ພ້ອມກັນລະດົມແນວຄິດ, ຄົ້ນຄວ້າປຶກສາຫາລື ແລະ ແລກປ່ຽນຄໍາຄິດເຫັນຕໍ່ກັບຮ່າງຂໍ້ຕົກລົງດັ່ງກ່າວໃຫ້ມີຄວາມຄົບຖ້ວນສົມບູນ, ແທດເໝາະ, ສອດຄ່ອງຕາມພາລະບົດບາດ, ສິດ ແລະ ໜ້າທີ ຕາມກົດໝາຍກຳນົດໄວ້.

ໃນຕອນທ້າຍກອງປະຊຸມ ທ່ານ ບົວພັນ ແສງຈັນ ປະທານກອງປະຊຸມໄດ້ຮຽກຮ້ອງໃຫ້ບັນດາທ່ານທີເຂົ້າຮ່ວມກອງປະຊຸມຈົ່ງໄດ້ເຊີດຊູຄວາມຮັບຜິດຊອບ ແລະ ເປັນເຈົ້າການໃນການຄົ້ນຄວ້າປະກອບຄໍາຄິດເຫັນບັນດາເນື້ອໃນໃຫ້ຖືກຕ້ອງຕາມຂັ້ນຕອນລະບຽບກົດໝາຍກຳນົດເພື່ອຄວາມເປັນເອກກະພາບ ແລະ ເປັນບ່ອນອີງໃນການເຄື່ອນໄຫວຈັດຕັ້ງປະຕິບັດໜ້າທີວຽກງານໃນຕໍ່ໜ້າໃຫ້ໄດ້ຮັບຜົນສຳເລັດຕາມລະດັບຄາດໝາຍ.

ໂດຍ: ເອື້ອ ມະໂນສິງ