ສະພາປະຊາຊົນແຂວງຄໍາມ່ວນ ໄດ້ຈັດພິທີປາຖະກະຖາເລົ່າຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 63 ປີ (ວັນທີ 5 ເມສາ 1961 – 5 ເມສາ 2024) ແລະ ວັນກຳມະກອນສາກົນ ຄົບຮອບ 138 ປີ ( 1ພຶດສະພາ 1886 – 1 ພຶດສະພາ 2024 ). ໃນວັນທີ 30 ເມສາ 2024 ຈັດຂື້ນຢູ່ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ທ່ານ ນາງ ບັງອອນ ໄຊຍະສິດ ກໍາມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມ ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກຳມະການສະພາປະຊາຊົນແຂວງ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ຕະຫຼອດຮອດສະມາຊິກພັກ-ພະນັກງານ ສະພາປະຊາຊົນແຂວງເຂົ້າຮ່ວມ.
ໂອກາດດັ່ງກ່າວ, ທ່ານ ນາງ ບັງອອນ ໄຊຍະສິດ ໄດ້ເລົ່າຄືນການກໍາເນີດເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບ ຕະຫຼອດໄລຍະ 63 ປີ ທີ່ຜ່ານມາ ເຊິ່ງເປັນວັນປະຫວັດສາດທີ່ສຳຄັນຢ່າງຍິ່ງຂອງຊາດ-ຂອງພັກ ເວົ້າລວມ-ເວົ້າສະເພາະ ກໍ່ແມ່ນວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ນັບແຕ່ໄດ້ຮັບການສ້າງຕັ້ງຂຶ້ນ, ກຳລັງປ້ອງກັນຄວາມສະຫງົບ ແມ່ນໄດ້ປະກອບສ່ວນຜົນງານຢ່າງໃຫຍ່ຫຼວງໃນພາລະກິດປົດປ່ອຍຊາດ, ເປັນກຳລັງປະຈັນບານປະເຊີນໜ້າໂດຍກົງ, ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງ ຕິດພັນ ແລະ ສະໜິດແໜ້ນກັບປະຊາຊົນ, ປ້ອງກັນຜູ້ນຳພັກ-ລັດ ຢ່າງເດັດດ່ຽວ ນາຍ ແລະ ພົນຕຳຫຼວດທຸກຮຸ້ນໃນແຕ່ລະໄລຍະໄດ້ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ປະຊາຊົນບັນດາເຜົ່າ, ເປັນກຳລັງທີ່ຢູ່ໃຕ້ການຊີ້ນຳ-ນໍາພາຢ່າງເດັດຂາດ, ໂດຍກົງ, ຮອບດ້ານຂອງພັກປະຊາຊົນ ປະຕິວັດລາວ ທີ່ມີກຽດສະຫງ່າງາມ, ໄດ້ອຸທິດເລືອດເນື້ອ, ເຫື່ອແຮງເພື່ອຄວາມສະຫງົບສຸກ ຂອງປະຊາຊົນລາວບັນດາເຜົ່າຕະຫຼອດມາ. ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງເປັນທາງການ ໃນວັນທີ 2 ທັນວາ 1975 ເປັນຕົ້ນມາ, ເຊິ່ງແມ່ນຢູ່ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່, ກຳລັງປ້ອງກັນຄວາມສະຫງົບ ກໍ່ໄດ້ປັບປຸງຢ່າງຮອບດ້ານຢູ່ຂັ້ນຮາກຖານໄດ້ຈັດຕັ້ງແນວຮົບປ້ອງກັນຊາດ-ປ້ອງກັນຄວາມສະຫງົບຢູ່ຂັ້ນທ້ອງຖິ່ນຢ່າງແໜ້ນໜາ, ປັບປຸງຍົກສູງຄຸນນະພາບຂອງບັນດາກຳລັງປະກອບອາວຸດປະຊາຊົນ, ເດັດດ່ຽວທັບມ້າງທຸກກົນອຸບາຍການເຄື່ອນໄຫວມ້າງເພທຳລາຍຂອງສັດຕູ ແລະ ປົກປັກຮັກສາປະເທດຊາດໄດ້ຢ່າງໝັ້ນຄົງພ້ອມທັງມີຜົນງານຫຼາຍດ້ານຈົນມາຮອດປະຈຸບັນ.
ພ້ອມກັນນັ້ນ ທ່ານ ບຸນສະຫວ່າງ ສີສຸກຂະລາດ ຮອງປະທານຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ ໄດ້ຂື້ນຜ່ານບົດມູນເຊື້ອວັນສ້າງຕັ້ງກຳມະກອນສາກົນ ຄົບຮອບ 138 ເພື່ອເປັນການຫວນຄືນມູນເຊື້ອປະຫວັດຄວາມເປັນມາຂອງວັນກຳມະກອນສາກົນ, ການເຕີບໃຫຍ່ຂະຫຍາຍຕົວຂອງຂະບວນການກຳມະກອນສາກົນ, ຕິດພັນກັບການເຕີບໃຫຍ່ຂະຫຍາຍຕົວຂອງຊົນຊັ້ນກຳມະກອນລາວ ຜົນງານການປະກອບສ່ວນ ປົກປັກຮັກສາ ແລະ ພັດທະນາປະເທດຊາດຂອງຊົນຊັ້ນກຳມະກອນລາວແນໃສ່ເພີ່ມທະວີການສຶກສາອົບຮົມໃຫ້ພະນັກງານ, ສະມາຊິກກຳມະບານ, ກຳມະກອນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງນໍ້າໃຈຮັກຊາດ, ນໍ້າໃຈຕໍ່ສູ້ອັນອົງອາດກ້າຫານຂອງຊົນຊັ້ນກໍາມະກອນ. ໃນປີ 1886 ຢູ່ຕົວເມືອງຊິກາໂກ ປະເທດສະຫະລັດອາເມລິກາ ໄດ້ມີຂະບວນການຕໍ່ສູ້ ຂອງກຳມະກອນຫຼາຍພັນຄົນ ຮຽກຮ້ອງໃຫ້ພວກນາຍທຶນ ຕ້ອງປະຕິບັດຕາມການສະເໜີຂອງກຳມະກອນວ່າ: ແຕ່ມື້ນີ້ຕໍ່ໄປບໍ່ໃຫ້ກຳມະກອນຜູ້ໃດເຮັດວຽກເກີນ 8 ຊົ່ວໂມງ ແມ່ນພັກຜ່ອນ ແລະ ອີກ 8 ຊົ່ວໂມງຮໍ່າຮຽນ; ຕໍ່ໜ້າສະພາບການຄືແນວນັ້ນ ວັນທີ 01 ພຶດສະພາ 1886 ກອງປະຊຸມພັກກອມມູນິດສາກົນ ຄັ້ງທີ 2 ໄດ້ໄຂຂຶ້ນຢູ່ນະຄອນຫຼວງປາຣິ ປະເທດຝຣັ່ງ ທີ່ປະຊຸມໄດ້ຜ່ານໂຄງການດຳເນີນງານສຳຄັນຄື: ຊົນຊັ້ນກຳມະກອນສາມັກຄີຕໍ່ສູ້ເພື່ອປະຕິບັດຄຳຂວັນ ມື້ໜຶ່ງເຮັດວຽກ 8 ຊົ່ວໂມງ, ນັບແຕ່ນັ້ນມາ ຈຶ່ງໄດ້ກຳນົດເອົາວັນທີ 01 ພຶດສະພາ ເປັນວັນກຳມະກອນສາກົນ ແລະ ໄດ້ກາຍເປັນວັນບຸນໃຫຍ່ຂອງຊົນຊັ້ນກຳມະກອນໃນທົ່ວໂລກ ຈາກເຫດການຂອງວັນທີ 1 ພຶດສະພາ 1886 ມັນໄດ້ສ້າງກະແສຟອງອັນໃຫຍ່ຫຼວງ ແລະ ແຂງແຮງເຖິງຂະບວນການກຳມະກອນຢູ່ທະວີບເອີຣົບ ແລະ ອາເມລິກາ ເປັນກຳລັງໃຈໃຫ້ຂະບວນການຕໍ່ສູ້ຂອງກຳມະກອນທັງເປັນບາດກ້າວແຫ່ງໄຊຊະນະ ເປັນວັນທີ່ມີຄວາມໝາຍສຳຄັນອັນໃຫຍ່ຫຼວງ ຂອງຊົນຊັ້ນກຳມະກອນໃນທົ່ວໂລກ ໃນຂະບວນຕໍ່ສູ້ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງຕົນ.
ໃນຕອນທ້າຍຂອງພິທີ ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄໍາມ່ວນ ກໍ່ໄດ້ມີຄໍາເຫັນໂອ້ລົມ ແລະໃຫ້ທິດ ທ່ານຍັງຮຽກຮ້ອງໃຫ້ສະມາຊິກພັກ, ພະນັກງານ-ລັດຖະກອນ ທີ່ເຂົ້າຮ່ວມໄດ້ເຊື່ອມຊຶມເຂົ້າໃຈເຖິງມູນເຊື້ອນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນລາວ, ແນໃສ່ສ້າງຄວາມສາມັກຄີເປັນປຶກແຜ່ນ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງສັດຕູ ເພື່ອເປັນເຈົ້າການເຂົ້າຮ່ວມໃນການປະຕິບັດແນວທາງປ້ອງກັນຊາດ – ປ້ອງກັນຄວາມສະຫງົບ ທັງເພື່ອນໍາເອົາແນວທາງ ແລະ ຮໍ່າຮຽນເອົາແບບຢ່າງຄຸນ ສົມບັດສິນທຳປະຕິວັດຄຸນງາມຄວາມດີ ບັນດາຜູ້ນຳຮຸ້ນກ່ອນມາໝູນໃຊ້ເຂົ້າໃນຊີວິດ, ໜ້າທີ່ວຽກງານຂອງຕົນ ໃຫ້ໄດ້ຮັບປະສິດທິພາບສູງ ແລະຈົ່ງສາມັກຄີກັນຢ່າງແໜ້ນແຟ້ນ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີລະບຽບວິໄນ ໃນການອອກແຮງງານ, ເສີມຂະຫຍາຍຄຸນລັກສະນະອັນດີເລີດ, ທາດແທ້ ແລະ ມູນເຊື້ອອັນດີງາມຂອງຊົນຊັ້ນກຳມະກອນລາວ ເອົາໃຈໃສ່ຍົກລະດັບຄວາມຮູ້, ຄວາມສາມາດໃຫ້ສູງຂຶ້ນເລື້ອຍໆ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມຂອງປະເທດເຮົາ ໃນປັດຈຸບັນ, ປະກອບສ່ວນຢ່າງຕັ້ງໜ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ນັບເຂັ້ມແຂງຂຶ້ນເລື່ອຍໆ.
ໂດຍ: ເອື້ອ ມະໂນສິງ