(ສພຊ) ວັນທີ 4 ພຶດສະພາຜ່ານມາ, ທີ່ແຂວງຄໍາມ່ວນ ໄດ້ຈັດກອງປະຊຸມປະເມີນການຈັດຕັ້ງປະຕິບັດກົດໝາຍ ຈໍານວນ 4 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ ທີ່ຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ເຂົ້າຮ່ວມມີທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ບັນດາຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ຫົວໜ້າພະແນກການ ແລະ ເຈົ້າເມືອງ 10 ຕົວເມືອງ.

              ກອງປະຊຸມໄດ້ຮັບຟັງການລາຍງານຂອງທ່ານ ວັນໄຊ ພອງສະຫວັນ ວ່າ: ສຳລັບແຂວງຄຳມ່ວນ ກໍເປັນ ແຂວງໜຶ່ງທີ່ສະພາປະຊາຊົນແຂວງ ໄດ້ເອົາໃຈໃສ່ໃນການຊຸກຍູ້ຕິດຕາມການຈັດຕັ້ງປະຕິບັດບັນດາກົດໝາຍຂອງບັນດາພະແນກການ, ອົງການທຽບເທົ່າ ກໍຄືອົງການປົກຄອງຢ່າງເປັນປົກກະຕິ ຢ່າງສົມຄວນ ແລະ ພະແນກການອົງການກ່ຽວຂ້ອງ ກໍໄດ້ອີງໃສ່ກົດໝາຍຕ່າງໆ ເປັນເຄື່ອງມືໃນການຈັດຕັ້ງປະຕິບັດການດັດປັບສາຍພົວພັນໃນສັງ ຄົມ ເພື່ອຍົກສູງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍທີ່ສັກສິດ, ຜ່ານການຈັດຕັ້ງປະຕິບັດກໍເຫັນໄດ້ ທາງດ້ານດີ-ຜົນໄດ້ຮັບ, ດ້ານອ່ອນ-ຂໍ້ຄົງຄ້າງ, ຜົນເສຍຫາຍ, ສາເຫດ, ບົດຮຽນທີ່ຖອດຖອນໄດ້, ຂໍ້ສະເໜີເພື່ອເປັນທິດທາງ ແລະ ວິທີຈັດຕັ້ງປະຕິບັດໃນຕໍ່ໜ້າ. ຈາກນັ້ນ, ກອງປະຊຸມ ຍັງໄດ້ຮັບຟັງລາຍງານການປະເມີນການຈັດຕັ້ງປະຕິບັດກົດໝາຍ 4 ສະບັບດັ່ງກ່າວ ສະເໜີໂດຍພະແນກການກ່ຽວຂ້ອງ; ພ້ອມນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດຄຳເຫັນ ແລະ ຕອບຄໍາຊັກຖາມຕ່າງໆ ໃຫ້ມີຄວາມກະຈ່າງແຈ້ງ ເພື່ອນຳໄປພິຈາລະນາປັບປຸງໃນຕໍ່ໜ້າໃຫ້ແທດເໝາະ ແລະ ເປັນບ່ອນອີງໃຫ້ຂະແໜງການ, ທ້ອງຖິ່ນ ນຳໄປຈັດຕັ້ງປະຕິບັດໃຫ້ປາກົດຜົນເປັນຈິງຍິ່ງຂຶ້ນ.

             ໂອກາດດຽວກັນ, ທ່ານຮອງປະທານສະພາແຫ່ງຊາດ ກໍໄດ້ມີຄຳເຫັນ ແລະ ໃຫ້ທິດຊີ້ນໍາຕໍ່ກອງປະຊຸມ ເພື່ອຮັບປະກັນການປະເມີນຈັດຕັ້ງປະຕິບັດກົດໝາຍ 4 ສະບັບໃຫ້ມີປະສິດທິພາບ, ເອົາໃຈໃສ່ຕິດຕາມກວດກາ ແລະ ຊຸກຍູ້ບັນດາພະແນກການກ່ຽວຂ້ອງ ປະຕິບັດໜ້າທີ່ວຽກງານຂອງຕົນຕາມກົດໝາຍ, ນິຕິກໍາໃຕ້ກົດໝາຍຢ່າງເຂັ້ມງວດ. ສະເໜີໃຫ້ຂະແໜງການທີ່ກ່ຽວຂ້ອງ ເພີ່ມທະວີການຄົ້ນຄວ້າສ້າງນິຕິກຳໃຕ້ກົດໝາຍໃຫ້ມີຄວາມສອດຄ່ອງກັບສະພາບເງື່ອນໄຂຕົວຈິງ, ວ່ອງໄວ ແລະ ສອດຄ່ອງກັບກົດໝາຍ ຕິດພັນກັບການສ້າງນິຕິກໍາປະສານງານເຊິ່ງກັນ ແລະກັນ ເພື່ອເຮັດໃຫ້ການປະຕິບັດໜ້າທີ່ວຽກງານຂອງແຕ່ລະພາກສ່ວນ, ໃຫ້ມີຄຸນນະພາບ, ສອດຄ່ອງຕາມພາລະບົດບາດ, ສິດ ແລະ ໜ້າທີ່ ຕາມກົດໝາຍກໍານົດໄວ້, ເອົາໃຈໃສ່ເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍໃຫ້ໄດ້ຢ່າງກວ້າງຂວາງທົ່ວເຖິງ.

             ນອກນັ້ນ, ທ່ານຮອງປະທານສະພາແຫ່ງຊາດ ຍັງໄດ້ເຄື່ອນໄຫວເຮັດວຽກຕິດຕາມກວດກາ ແລະ ເກັບກຳຂໍ້ມູນທີ່ບໍລິສັດ ລາວພັດທະນາແຮ່ທາດບໍ່ແໜ່ງ-ບ້ານຊາວ ແລະ ບໍລິສັດ ເພັດໄລພອນ ແຮ່ທາດເຫລັກ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)