ປະຕິບັດຕາມກົດໝາຍສະພາປະຊາຊົນຂັ້ນແຂວງ ໃນການຕິດຕາມກວດກາ ໃນຕອນເຊົ້າວັນທີ 2 ສິງຫາ 2024 ສະພາປະຊາຊົນແຂວງຫລວງນໍ້າທາ ໄດ້ລົງເຄື່ອນໄຫວຕິດຕາມກວດກາ ຕາມມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາແຜນພັດທະນາເສດຖະກິດພິເສດບໍ່ເຕ່ນແດນງາມ ແລະ ໄດ້ເປີດກອງປະຊຸມຂື້ນທີ່ຫ້ອງປະຊຸມເຂດເສດຖະກິດບໍ່ເຕ່ນແດນງາມ ພາຍໃຕ້ການເປັນປະທານຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ເຂົ້າຮ່ວມມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການກ່ຽວຂ້ອງຂອງແຂວງ ແລະ ກຸ່ມບໍລິສັດພັດທະນາເຂດເສດຖະກິດພິເສດບໍ່ເຕ່ນແດນງາມລາວຈຳກັດ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 30 ກວ່າຄົນ.
ໃນກອງປະຊຸມໄດ້ຮັບຟັງຜູ້ຕາງໜ້າກຸ່ມບໍລິສັດພັດທະນາເຂດເສດຖະກິດພິເສດບໍ່ເຕ່ນແດນງາມລາວຈໍາກັດ ລາຍງານສະພາບລວມ ເຂດເສດຖະກິດພິເສດບໍ່ເຕ່ນແດນງາມ ແມ່ນໄດ້ຮັບການລົງທືນຈາກກຸ່ມບໍລິສັດຫຸ້ນສ່ວນຫາຍເຊີນ ແຂວງຢູໜານ ຈຳກັດ ໂຄງການນີ້ຕັ້ງຢູ່ແຂວງຫລວງນ້ຳທາ ໃກ້ກັບດ່ານບໍ່ຫານແຂວງຢູນໜານ ສປ ຈີນ, ເປັນພາກສ່ວນໜຶ່ງຂອງເຂດຮ່ວມມືເສດຖະກິດບໍ່ເຕ່ນ ສປປ ລາວ – ບໍ່ຫານ ສປ ຈີນ ມີເນື້ອທີ່ສຳປະທານ 1.640 ເຮັກຕາ, ປັດຈຸບັນສໍາເລັດ 11 ກິດຈະກຳ ພວມ ສືບຕໍ່ກໍ່ສ້າງຕຶກອາຄານ ແລະ ພື້ນຖານໂຄງລ່າງຕ່າງໆ ແມ່ນສໍາເລັດໂດຍພື້ນຖານ ນອກນັ້ນ ໄດ້ຮັບຟັງ ຂໍ້ສະດວກ, ຂໍ້ຫຍຸ້ງຍາກ, ການຈັດຕັ້ງປະຕິບັດທາງດ້ານເສດຖະກິດ, ຜົນກະທົບຕໍ່ສິ່ງແວດລ້ອມສັງຄົມ ແລະ ອື່ນໆ ໃນການຈັດຕັ້ງປະຕິບັດໂຄງການໃນໄລຍະຜ່ານມາເຖິງປັດຈຸບັນ ແລະ ຍັງໄດ້ສະເໜີບັນຫາທີ່ພົບຄວາມຫຍຸ້ງຍາກໃນການຈັດຕັ້ງປະຕິບັດວຽກງານ ເພື່ອໃຫ້ສະພາປະຊາຊົນນຳສະເໜີຫາພາກສ່ວນທີ່ກ່ຽວຂ້ອງແກ້ໄຂ, ວາລະດຽວກັນ ຜູ້ແທນເຂົ້າຮ່ວມກອງປະຊຸມຍັງໄດ້ແລກປ່ຽນປະກອບຄຳຄິດເຫັນຕໍ່ກັບການຈັດຕັ້ງປະຕິບັດວຽກງານໃນໄລຍະຜ່ານມາ, ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງບໍລິສັດພັດທະນາເຂດເສດຖະກິດພິເສດບໍ່ເຕ່ນແດນງາມລາວຈຳກັດ ໄດ້ຈັດຕັ້ງປະຕິບັດວຽກງານມີຄວາມສະດວກ, ສຳເລັດຕາມລະດັບຄາດໝາຍ.
ຕອນທ້າຍທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ມີຄຳເຫັນຕໍ່ກອງປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບການຈັດຕັ້ງປະຕິບັດວຽກງານຂອງບໍລິສັດພັດທະນາເຂດເສດຖະກິດພິເສດບໍ່ເຕ່ນແດນງາມລາວຈໍາກັດ ພ້ອມທັງຮຽກຮ້ອງໃຫ້ເອົາໃຈໃສ່ຕື່ມຕໍ່ການແກ້ໄຂຜົນກະທົບຕໍ່ສິ່ງແວດລ້ອມ, ສັງຄົມເພື່ອບໍ່ໃຫ້ມີຜົນກະທົບໃນຕໍ່ໜ້າ ແລະ ໃນການລົງຕິດຕາມກວດກາ, ຊູກຍູ້ ຄັ້ງນີ້ຍັງຈະນຳເອົາຂໍ້ສະເໜີຕ່າງໆ ໄປສັງລວມລາຍງານໃນກອງປະຊຸມສະພາແຫ່ງຊາດ ແລະ ບັນດາກະຊວງທີ່ກ່ຽວຂ້ອງ, ບັນຫາໃດທີ່ຕິດພັນກັບພະແນກການຂອງແຂວງ ແມ່ນໃຫ້ຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ຮີບຮ້ອນປະສານສົບທົບພາກສ່ວນທີ່ກ່ຽວຂ້ອງແກ້ໄຂ ແລ້ວລາຍງານໃຫ້ຄະນະປະຈຳສະພາປະຊາຊົນແຂວງ ທັງນີ້ກໍເພື່ອເຮັດໃຫ້ບໍລິສັດດັ່ງກ່າວ ໄດ້ຮັບການພັດທະນາສຳເລັດຕາມລະດັບຄາດໝາຍທີ່ວາງໄວ້
ພ້ອມດຽວກັນ ຍັງໄດ້ລົງກວດກາ ພື້ນທີ່ຕົວຈິງ 23ແຜນຜັງ ຕາມມະຕິກອງປະຊຸມສະພາປະຊາຊົນແຂວງ ຮັບຮອງ ແລະ 11 ກິດຈະກຳ ທີ່ໄດ້ຈັດຕັ້ງປະຕິບັດ ສຳເລດໂດຍພື້ນຖານ.
