ໃນວັນທີ 18 ມັງກອນ 2023 ນີ້. ສະພາປະຊາຊົນແຂວງ (ສພຂ) ອັດຕະປື ໄດ້ເຂົ້າອວຍພອນ ແລະ ມອບກະຕ່າຂອງຂວັນ ໃຫ້ແກ່ຄະນະພັກ-ຄະນະກອງບັນຊາການທະຫານແຂວງ ເນື່ອງໃນໂອກາດວັນສ້າງຕັ້ງ ກອງທັບປະຊາຊົນລາວ ຄົບຮອບ 74 ປີ ( 20 ມັງກອນ 1949 – 20 ມັງກອນ 2023). ນໍາໂດຍ ທ່ານ ສຸກສໍາລານ ໄຊຍະແສງ ຮອງປະທານ ສພຂ ປະທານຄະນະກໍາມະການເສດຖະກິດ,ແຜນການ ແລະ ການເງີນ ພ້ອມດ້ວຍຄະນະ ແລະ ໂດຍໃຫ້ກຽດຕ້ອນຮັບຂອງທ່ານ ພັນເອກ ບຸນຈັນ ສີຫາວົງ ຮອງເລຂາຄະນະພັກ, ຫົວໝ້າການທະຫານກອງບັນຊາການທະຫານແຂວງ ພ້ອມຄະນະ.

ໂອກາດດັ່ງກ່າວ ທ່ານ ສຸກສໍາລານ ໄຊຍະແສງ  ຮອງປະທານ ສພຂ ປະທານຄະນະກໍາມະການເສດຖະກິດ,ແຜນການ ແລະ ການເງີນ ຕາງໜ້າໃຫ້ສະພາປະຊາຊົນແຂວງ ແລະ ປະຊາຊົນລາວຊາວແຂວງ ອັດຕະປື ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ໄດ້ກ່າວສະແດງຊົມເຊີຍ ແລະ ເຊີດຊູນໍ້າໃຈຮັກຊາດ, ນ້ຳໃຈເສຍສະຫລະ ເພື່ອຊາດ ເພື່ອປະຊາຊົນ ແລະ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມສະຫງົບສຸກ, ສີວິໄລ ຂອງບັນດາສະຫາຍນາຍ ແລະ ພົນທະຫານ ທົ່ວກອງທັບປະຊາຊົນປະຕິວັດລາວ ເວົ້າລວມ, ເວົ້າສະເພາະ ພາຍໃນແຂວງອັດຕະປື ທີ່ເຮັດໜ້າທີ່ພາລະກິດປົກປັກຮັກສາເຂດນໍ້າແດນດິນ, ເປັນເສົາຮົ້ວທີ່ແຂງແກ່ນ ໃຫ້ແຂວງ ອັດຕະປື ກໍ່ຄື ໃຫ້ກັບປະເທດຊາດ ຕະຫລອດໄລຍະຜ່ານມາ ແລະ ສໍາລັບສະພາປະຊາຊົນແຂວງ ກໍ່ກະກຽມຈັດກອງປະຊຸມສະໄໝສາມັນເທື່ອທີ 4 ຂອງ ສະພາປະຊາຊົນແຂວງ ຊຸດທີ II ໃນມໍ່ໆນີ້ ເພື່ອຈະໄດ້ຄົ້ນຄວ້າພິຈາລະນາຮັບຮອງເອົາບັນຫາສໍາຄັນພື້ນຖານຂອງທ້ອງຖີ່ນຕາມພາລະບົດບາດທີ່ໄດ້ ກໍານົດໄວ້ໃນລັດຖະທໍາມະນນູນ ແລະ ກົດໝາຍ, ດັ່ງນັ້ນ ອີກເທື່ອໜຶ່ງເນື່ອງໃນໂອກາດຂໍ່ານັບຮັບຕ້ອນ ແລະ ສະເຫຼີມສະຫຼອງ ວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 74 ປີນີ້ ຂໍອວຍພອນໃຫ້ຄະນະພັກ-ຄະນະບັນຊາ ພ້ອມດ້ວຍພະນັກງານ-ນັກຮົບທຸກສະຫາຍ  ຈົ່ງມີສຸຂະພາບແຂງແຮງ, ມີຄວາມເຂັ້ມແຂງ, ພ້ອມກັນສຶບຕໍ່ເຮັດໜ້າທີ່ ທີ່ພັກ-ລັດ ໄດ້ມອບໝາຍໃຫ້ ໃຫ້ສຳເລັດໜ້າທີ່ ຕາມການມອບໝາຍດ້ວຍໝາກຜົນອັນສູງ.

ພາບຂ່າວ:ວິນັດ