ໃນຕອນເຊົ້າຂອງວັນທີ 25 ກັນຍາ 2024 ນີ້, ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ໄດ້ຈັດກອງປະຊຸມ ລະດົມຄໍາຄິດເຫັນ ໃສ່ໂຄງຮ່າງບົດວິທະຍາສາດ ຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ; ໂດຍການເປັນຄະນະປະທານຂອງທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງ ໄດ້ຕ້ອນຮັບການລົງມາເຄື່ອນໄຫວເຮັດວຽກຂອງທ່ານ ບໍ ຫານປະເສີດ ຫົວໜ້າສູນຄົ້ນຄວ້າວິທະຍາສາດ ແລະ ນິຕິກໍາ ສະຖາບັນຄົ້ນຄວ້ານິຕິກໍາສະພາແຫ່ງຊາດ ເຂົ້າຮ່ວມມີບັນດາທ່ານຄະນະປະຈໍາ ສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ, ພ້ອມດ້ວຍຄະນະຕິດຕາມຈາກສະຖາບັນຄົ້ນຄວ້ານິຕິກໍາສະພາແຫ່ງຊາດ;      ໃນການລົງມາຄັ້ງນີ້, ເພື່ອເກັບກໍາຂໍ້ມູນ ແລະ ລະດົມຄໍາຄິດຄໍາເຫັນ ເຂົ້າໃສ່ຫົວຂໍ້, ໂຄງຮ່າງບົດ ຂອງບົດຄົ້ນຄວ້າວິທະຍາສາດ ໃຫ້ມີຄວາມຖືກຕ້ອງ, ສອດຄ່ອງກັບສະພາບການຈັດຕັ້ງປະຕິບັດຕົວຈິງ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ທັງເປັນການສະໜອງຂໍ້ມູນ-ຂ່າວສານ ໃນການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃຫ້ມີປະສິດທິຜົນດີຂຶ້ນກວ່າເກົ່າ; ກອງປະຊຸມໄດ້ຍົກບັນດາຫົວຂໍ້ບົດຄົ້ນຄວ້າວິທະຍາສາດ ດັ່ງນີ້:

1. ໂຄງຮ່າງບົດ ການພົວພັນປະສານງານລະຫວ່າງສະພາປະຊາຊົນຂັ້ນແຂວງ ກັບບັນດາອົງການປົກຄອງຂັ້ນທ້ອງຖິ່ນ;
2. ໂຄງຮ່າງບົດ ກົງຈັກທີ່ເປັນເສນາທິການໃຫ້ແກ່ສະພາປະຊາຊົນຂັ້ນແຂວງ ແລະ ຄະນະປະຈໍາສະພາແຫ່ງຊາດ;
3. ໂຄງຮ່າງບົດ ຄວາມຮູ້ພື້ນຖານໃນການສ້າງມະຕິຂອງກອງປະຊຸມສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ;
4. ໂຄງຮ່າງບົດ ການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ແລະ ຄະນະປະຈໍາສະພາປະຊາຊົນຂັ້ນແຂວງ;
5. ໂຄງຮ່າງບົດ ຈັນຍາບັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.

ຫຼັງຈາກນັ້ນ ກອງປະຊຸມກໍ່ໄດ້ຮັບຟັງການລາຍງານໂດຍຫຍໍ້ຈາກ ບັນດາຄະນະກໍາມະການ ແລະ ເລຂາທິການກ່ຽວກັບການເຄື່ອນໄຫວວຍກງານທີ່ຜ່ານມາ ເຊິ່ງໄດ້ຍົກໃຫ້ເຫັນຈຸດດີ, ຂໍ້ຄົງຄ້າງ ແລະ ວິທີການແກ້ໄຂ ພ້ອມທັງແບບແຜນວິທີການເຮັດວຽກໃນຕໍ່ໜ້າ; ໃນຕອນທ້າຍປະທານກອງປະຊຸມກໍ່ໄດ້ຍ້ອງຍໍຊົມເຊີຍ, ສະຫຼຸບ ບັນດາຂ້ອງຄົງຄ້າງ ແລະ ນໍາສະເໜີບາງບັນຫາເພື່ອໃຫ້ ຄະນະທີ່ລົງມາເຄື່ອນໄຫວນໍາເອົາຂໍ້ມູນໄປລາຍງານໃນຂັ້ນຕໍ່ໄປ.