(ສພຊ) ລະຫວ່າງວັນທີ 27 ກຸມພາ-3 ມີນາ 2023 ຄະນະຜູ້ແທນສະພາແຫ່ງຊາດ ແຫ່ງ ສປປລາວ ນຳໂດຍທ່ານ ປອ. ຢ່າງກູ້ ຢ່າງລືໄຊ ຫົວໜ້າສະຖາບັນຄົ້ນຄວ້ານິຕິກຳ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ ຣາຊະອານາຈັກກຳປູເຈຍ ເພື່ອເປັນການຈັດຕັ້ງຜັນຂະຫຍາຍຜົນການຢ້ຽມຢາມສັນຖະວະໄມຕີຂອງທ່ານ ປະທານສະພາແຫ່ງຊາດ ແຫ່ງ ສປປລາວ ທີ່ຣາຊະອານາຈັກກຳປູເຈຍ, ການປະຕິບັດບົດບັນທຶກຄວາມເຂົ້າໃຈວ່າດ້ວຍການສົ່ງເສີມການຮ່ວມມື ແລະ ການເປັນຄູ່ຮ່ວມລະຫວ່າງ ສະພາແຫ່ງຊາດ ແຫ່ງ ສປປລາວ ກັບສະພາແຫ່ງຊາດ ແຫ່ງຣາຊະອານາຈັກກຳປູເຈຍ ກໍຄືສືບຕໍ່ເສີມຂະຫຍາຍສາຍພົວພັນຮ່ວມມືລະຫວ່າງສະຖາບັນຄົ້ນຄວ້ານິຕິກຳສະພາແຫ່ງຊາດລາວ ກັບພາກສ່ວນທີ່ກ່ຽວຂ້ອງຂອງສະພາແຫ່ງຊາດກຳປູເຈຍ ທີ່ເຄີຍມີການຮ່ວມມືມາກ່ອນແລ້ວ ໃຫ້ຫັນເຂົ້າສູ່ລວງເລິກ ແລະ ມີປະສິດທິຜົນດີກວ່າເກົ່າ.

ໃນການເຄື່ອນໄຫວວຽກງານຄັ້ງນີ້, ຄະນະຜູ້ແທນສະຖາບັນຄົ້ນຄວ້ານິຕິກຳສະພາແຫ່ງຊາດລາວ ໄດ້ພົບປະ ແລະ ເຮັດວຽກກັບທ່ານ ເລງເປງລອງ (Leng Peng Long) ເລຂາທິການໃຫຍ່ສະພາແຫ່ງຊາດກຳປູເຈຍ ພ້ອມດ້ວຍຄະນະ ເຊິ່ງທັງສອງຝ່າຍໄດ້ແຈ້ງສະພາບທີ່ພົ້ນເດັ່ນໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ລວມທັງຜົນສຳເລັດໃນການຈັດຕັ້ງປະຕິບັດວຽກງານວິຊາສະເພາະແຕ່ລະດ້ານຂອງຕົນໃຫ້ກັນ ແລະ ກັນຊາບໂດຍຫຍໍ້ ເພື່ອເພີ່ມທະວີການພົວພັນຮ່ວມມືໃຫ້ຫັນໄປ ສູ່ລວງເລິກ ແລະ ມີປະສິດທິຜົນດີ ທັງສອງຝ່າຍໄດ້ສະເໜີໃຫ້ມີການສືບຕໍ່ແລກປ່ຽນຂໍ້ມູນຂ່າວສານຕ່າງໆທີ່ຕິດພັນກັບການຈັດ ຕັ້ງປະຕິບັດພາລະບົດບາດ, ສິດ ແລະ ໜ້າທີ່ ໃຫ້ເປັນຮູບປະທຳຫຼາຍຂຶ້ນ; ແລກປ່ຽນບົດຮຽນໃນການຄຸ້ມຄອງຖານຂໍ້ມູນຂ່າວ ສານອີເລັກໂທຼນິກ ແລະ ການປັບປຸງຫ້ອງສະໝຸດໃຫ້ທັນສະໄໝ; ສືບຕໍ່ແລກປ່ຽນບົດຮຽນກ່ຽວກັບການສ້າງຄູເຝິກ ແລະ ວິທະ ຍາກອນໃນການເຝິກອົບຮົມຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ; ສະເໜີໃຫ້ມີການຮ່ວມກັນຄົ້ນຄວ້າຫົວຂໍ້ວິທະຍາສາດໃດໜຶ່ງ ເພື່ອຮັບໃຊ້ໃຫ້ແກ່ການຈັດ ຕັ້ງປະຕິບັດພາລະບົດບາດຂອງສະພາແຫ່ງຊາດຂອງສອງປະເທດ.

ຄະນະຜູ້ແທນສະຖາບັນຄົ້ນຄວ້ານິຕິກຳສະພາແຫ່ງຊາດລາວ ຍັງໄດ້ພົບປະ ແລະ ເຮັດວຽກກັບສູນລັດຖະສະພາອາຊີ (ສະຖາບັນລັດຖະສະພາຈັກກຳປູເຈຍ ໃນເມື່ອກ່ອນ) ເຊິ່ງໃນໄລຍະຜ່ານມາ ໄດ້ສະໜັບສະໜູນການຍົກສູງຂີດຄວາມສາມາດດ້ານວິຊາການໃນການຄົ້ນຄວ້ານັບແຕ່ປີ 2015 ເປັນຕົ້ນມາ ໂດຍມີພະນັກງານຈາກສະພາແຫ່ງຊາດລາວ ໄດ້ໄປເຝິກອົບຮົມກ່ຽວກັບການຄົ້ນຄວ້າ ແລະ ຖອດຖອນບົດຮຽນໃນດ້ານຕ່າງໆຢູ່ກຳປູເຈຍ; ພ້ອມກັນນັ້ນ, ສະຖາບັນລັດຖະສະພາກຳປູເຈຍ ຍັງໄດ້ສົ່ງຊ່ຽວຊານມາເປັນວິທະຍາກອນໃນການເຝິກອົບຮົມ, ສຳມະນາ ຢູ່ ສປປລາວ ແລະ ສະໜອງການຄົ້ນຄວ້າຫຼາຍຫົວຂໍ້ຕາມການສະເໜີຂອງ ສະຖາບັນຄົ້ນຄວ້ານິຕິກຳສະພາແຫ່ງຊາດລາວ. ສອງຝ່າຍໄດ້ສະເໜີໃຫ້ມີການສືບຕໍ່ດຳເນີນການຍົກລະດັບຂີດຄວາມສາມາດໃນການຄົ້ນຄວ້າຫົວຂໍ້ວິທະຍາສາດ, ການສ້າງຫຼັກສູດ ແລະ ປຶ້ມຄູ່ມືຕ່າງໆ ລວມທັງການຄົ້ນຄວ້າ, ວິເຄາະ ແລະຄັດຫຍໍ້ກົດໝາຍ ດ້ວຍວິທີການສົ່ງພະນັກງານຂອງຝ່າຍລາວເຂົ້າຮ່ວມເຝິກອົບຮົມຢູ່ສູນລັດຖະສະພາອາຊີ ຫຼື ສົ່ງຊ່ຽວຊານມາເປັນວິທະຍາກອນໃນການເຝິກອົບຮົມຢູ່ປະເທດລາວ.

ການໄປຢ້ຽມຢາມ ແລະ ເຮັດວຽກຢູ່ ຣາຊະອານາຈັກກຳປູເຈຍ ໃນຄັ້ງນີ້, ຄະນະຜູ້ແທນສະຖາບັນຄົ້ນຄວ້ານິຕິກຳສະພາແຫ່ງຊາດລາວ ຍັງໄດ້ໄປຢ້ຽມຊົມພື້ນຖານເສດຖະກິດ ແລະ ວັດທະນະທຳຈຳນວນໜຶ່ງ ເປັນຕົ້ນ ພະຣາຊະວັງ ແລະ ຫໍພິພິທະພັນແຫ່ງຊາດ ທີ່ນະຄອນຫຼວງພະນົມເປນ, ທ່າເຮືອສີຫານຸວິນ ແລະ ເຂດເສດຖະກິດພິເສດ ທີ່ນະຄອນສີຫານຸວິນ.