ວັນທີ 15 ພຶດສະພາ 2024 ນີ້, ທີມງານ ສະຖາບັນຄົ້ນຄວ້ານິຕິກຳ ສະພາແຫ່ງຊາດ ໄດ້ເຄື່ອນໄຫວ ເກັບກຳຂໍ້ມູນ ແລະ ຊຸກຍູ້ ວຽກງານ ຂອງສະຖາບັນຄົ້ນຄວ້ານິຕິກຳ ສະພາແຫ່ງຊາດ ທີ່ຫ້ອງປະຊຸມຄະນະປະຈຳ ສະພາປະຊາຊົນ ແຂວງຫົວພັນ ນຳໂດຍ ທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳ ສະພາແຫ່ງຊາດ ເຂົ້າຮ່ວມເຮັດວຽກນຳໂດຍ ທ່ານ ຄອນປະພັນ ເລືອງສີຈັນທອງ ຮັກສາການ ປະທານສະພາປະຊາຊົນແຂວງ, ມີບັນດາທ່ານຮອງສະຖາບັນ, ຄະນະສູນ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ, ຕະຫລອດຮອດວິຊາການຂະແໜງການທີ່ກ່ຽວຂ້ອງພາຍໃນ ສພຂ ແລະ ວິຊາການສະຖາບັນນິຕິກຳ ສະພາແຫ່ງຊາດ ເຂົ້າຮ່ວມ.

           ໃນວາລະ ທ່ານ ສຸກມີໄຊ ສິງບຸນເຮືອງ ຮອງເລຂາທິການສະພາປະຊາຊົນແຂວງ ໄດ້ລາຍງານສະພາບ ການຈັດຕັ້ງປະຕິບັດວຽກງານຄົ້ນຄວ້າວິທະຍາສາດ ນິຕິກຳ ແລະ ວຽກງານເຝິກອົບຮົມ ຂໍ້ມູນຂ່າວສານ ແລະ ຫໍສະໝຸດ ໃນໄລຍະຜ່ານມາ ຂອງ ສະພາປະຊາຊົນແຂວງ. ຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດຄຳເຫັນ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເປັນຕົ້ນແມ່ນ ການພິຈາລະນາ, ຮັບຮອງເອົານິຕິກຳທີ່ສຳຄັນຂອງທ້ອງຖິ່ນ; ການໃຫ້ຄຳປຶກສາ ແລະ ຄຳແນະນຳແກ່ພົນລະເມືອງ ກ່ຽວກັບການຍື່ນຄຳຮ້ອງທຸກ ແລະ ບັນຫາຕ່າງໆ ທີ່ຕິດພັນກັບປະໂຫຍດ ຂອງປະຊາຊົນ; ການພົວພັນປະສານງານ ລະຫວ່າງ ສະພາປະຊາຊົນຂັ້ນແຂວງ ກັບ ອົງການປົກຄອງທ້ອງຖິ່ນ; ວຽກງານສະໜອງຂໍ້ມູນ; ວຽກງານຫໍສະໝຸດ; ວຽກງານເຝິກອົບຮົມ. ພ້ອມນີ້, ສະພາປະຊາຊົນແຂວງ ຍັງໄດ້ສະເໜີບາງຫົວຂໍ້ ເພື່ອໃຫ້ສະຖາບັນຄົ້ນຄວ້ານິຕິກຳ ສະພາແຫ່ງຊາດ ເປັນຂໍ້ມູນເຂົ້າໃນການຂຶ້ນແຜນຈັດເຝິກອົບຮົມໃນຕໍ່ໜ້າ.

ພາບ ແລະ ຂ່າວ: ນັກຂ່າວ ສພຂ ຫົວພັນ