ໃນຕອນເຊົ້າຂອງວັນທີ 16 ມັງກອນ 2024, ສະມາຊິກ ສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ຊຸດທີ II ໄດ້ສືບຕໍ່ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນນະຄອນຫຼວງ ຊຸດທີ II, ພ້ອມທັງຟັງຄຳຄິດເຫັນ ແລະ ຄຳສະເໜີຂອງປະຊາຊົນ ຢູ່ເມືອງສີສັດຕະນາກ ນະຄອນຫຼວງວຽງຈັນ, ໂດຍໄດ້ແບ່ງອອກເປັນ 02 ໜ່ວຍ. ໜ່ວຍທີ 1 ນຳໂດຍ ທ່ານ ອານຸພາບ ຕຸນາລົມ ປະທານ ຄະນະສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ນວ, ປະທານ ສະພາປະຊາຊົນ ນວ; ທ່ານ ພອນສິນ ສາວະລີ ສສນວ, ຫົວໜ້າ ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ ແລະ ທ່ານ ປະສາດໄຊ ພິລາພັນເດຊ ສສນວ ປະຈຳເຂດເລືອກຕັ້ງ ເມືອງສີສັດຕະນາກ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ຢູ່ທີ່ວັດບ້ານຫາຍໂສກ ເມືອງສີສັດຕະນາກ ນວ ໂດຍມີປະຊາຊົນຈາກ 04 ບ້ານເຂົ້າຮ່ວມ ລວມທັງໝົດ 55 ຄົນ, ຍິງ 23 ຄົນ.
ໜ່ວຍທີ 2 ນຳໂດຍ ທ່ານ ນາງ ລຳພອຍ ສີອັກຄະຈັນ ຄະນະປະຈຳ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ແລະ ທ່ານ ນາງ ຄຳແຫວນ ສິງບັນດິດ ສສນວ ຊຸດທີ II ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ຢູ່ວັດບ້ານວັດສົບ ເມືອງສີສັດຕະນາກ ນວ ໂດຍມີປະຊາຊົນຈາກ 07 ບ້ານ ເຂົ້າຮ່ວມຮັບຟັງ ລວມທັງໝົດ 72 ຄົນ, ຍິງ 23 ຄົນ.
ໃນການດຳເນີນພິທີດັ່ງກ່າວ, ບັນດາທ່ານ ສສຊ ແລະ ສສນວ ກໍໄດ້ຖັດປ່ຽນກັນໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫລວງວຽງຈັນ ຊຸດທີ II ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງກ້ວາງຂວາງ ຕໍ່ກັບບັນດາເນື້ອໃນ ແລະ ວຽກງານທີ່ສຳຄັນຕ່າງໆ. ພ້ອມດຽວກັນນີ້, ບັນດາທ່ານຜູ້ມີສິດເລືອກຕັ້ງ ກໍໄດ້ແລກປ່ຽນ ແລະ ສະເໜີບັນຫາສຳຄັນຕ່າງໆ ຕໍ່ຄະນະລົງເຮັດວຽກ ເປັນຕົ້ນແມ່ນ ບັນຫາໄຟເຍືອງທາງບໍ່ຮຸ່ງ, ຮ່ອງລະບາຍນ້ຳອຸດຕັນ, ການເກັບມ້ຽນຂີ້ເຫຍື້ອຂອງບໍລິສັດຮັບເໝົາ ທີ່ບໍ່ມາເກັບຕາມກຳນົດເວລາ ເຮັດໃຫ້ຂີ້ເຫຍື້ອຕົກຄ້າງເນົ່າເໝັນ, ຄຸນະພາບການສຶກສາຂອງນັກຮຽນລາວ, ບັນຫາການສໍ້ລາດບັງຫຼວງ, ການສົ່ງເສີມການຜະລິດສິນຄ້າພາຍໃນປະເທດ ແລະ ຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກ ແລະ ບັນຫາອື່ນໆອີກຈຳນວນໜຶ່ງ. ຕໍ່ກັບຄຳສະເໜີດັ່ງກ່າວ, ບັນດາທ່ານ ສສຊ, ສສນວ ແລະ ພາກສ່ວນຮັບຜິດຊອບ ກໍໄດ້ອະທິບາຍ, ຊີ້ແຈງ ໃຫ້ປະຊາຊົນໄດ້ຮັບຊາບ ກ່ຽວກັບຂັ້ນຕອນໃນການແກ້ໄຂບັນຫາ ພ້ອມທັງຮັບເອົາບັນດາຄຳສະເໜີດັ່ງກ່າວ ນຳໄປປຶກສາຫາລືກັບບັນດາພາກສ່ວນຮັບຜິດຊອບ ເພື່ອຄົ້ນຄວ້າ ແລະ ແກ້ໄຂ ໃຫ້ທັນເວລາ.
(ພອນທິບ ອິນທິລາດ)