ໃນຕອນບ່າຍຂອງວັນທີ 18 ມັງກອນ 2024, ສະມາຊິກ ສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ຊຸດທີ II ນໍາໂດຍ ທ່ານ ບຸນທາມ ພຸດທະວົງສາ, ກຳມະການພັກ ນະຄອນຫຼວງ, ຮອງປະທານ ຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1, ຮອງປະທານ ສະພາປະຊາຊົນ ນວ ຊຸດທີ II ພ້ອມດ້ວຍຄະນະ ໄດ້ສືບຕໍ່ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນນະຄອນຫຼວງ ຊຸດທີ II, ພ້ອມທັງຟັງຄຳຄິດເຫັນ ແລະ ຄຳສະເໜີຂອງຜູ້ມີສິດເລືອກຕັ້ງ ຢູ່ທີ່ສະໂມສອນຫ້ອງວ່າການເມືອງຈັນທະບູລີ ນວ ໂດຍການຕ້ອນຮັບຂອງ ທ່ານ ດວງຕາ ສຸລິວົງ, ກໍາມະການພັກ ນະຄອນຫຼວງ, ເລຂາພັກເມືອງ, ເຈົ້າເມືອງເມືອງຈັນທະບູລີ ພ້ອມດ້ວຍ ຮອງເລຂາພັກເມືອງ, ຮອງເຈົ້າເມືອງ, ບັນດາທ່ານຄະນະພັກເມືອງ, ພະນັກງານຫຼັກແຫຼ່ງ ແລະ ບັນດາຫ້ອງການອ້ອມຂ້າງເມືອງເຂົ້າຮ່ວມ.
ໃນໂອກາດດັ່ງກ່າວ, ທ່ານ ດວງຕາ ສຸລິວົງ ໄດ້ລາຍງານກ່ຽວກັບສະພາບລວມຂອງເມືອງຈັນທະບູລີ ໂດຍທ່ານໄດ້ກ່າວວ່າ: ໄລຍະຜ່ານມາ, ໄດ້ເອົາໃຈໃສ່ສຶກສາອົບຮົມການເມືອງແນວຄິດ ແລະ ຈັດຕັ້ງເຊື່ອມຊຶມບັນດາມະຕິຂອງສູນກາງພັກ, ມະຕິ, ຄຳສັງ ບັນດານິຕິກຳຂອງອົງຄະນະພັກນະຄອນຫຼວງ ແລະ ອົງຄະນະພັກເມືອງ, ປາຖະກະຖາ ເລົ່າມູນເຊື້ອວັນສຳຄັນຕ່າງໆຂອງພັກ-ລັດ ໃຫ້ແກ່ພະນັກງານ, ສະມະຊິກພັກ ແລະ ປະຊາຊົນບັນດາເຜົ່າ ໄດ້ຈຳນວນ 179 ຄັ້ງ, ມີຜູ້ເຂົ້າຮ່ວມທັງໝົດ 12.425 ຄົນ, ຍິງ 8.941 ຄົນ. ພ້ອມດຽວກັນນີ້, ກໍໄດ້ເອົາໃຈໃສ່ຕິດຕາມ ແລະ ແກ້ໄຂບັນຫາປະກົດການຫຍໍ້ທໍ້ຢ່າງຕັ້ງໜ້າ, ເຊິ່ງສະພາບປະກົດການຫຍໍ້ທໍ້ເກີດຂຶ້ນທຽບໃສ່ປີ 2022 ຫຼຸດລົງ 98 ເລື່ອງ. ໄດ້ນຳພາຊຸກຍູ້ສົ່ງເສີມຜະລິດຕະພັນສີນຄ້າໂອດ໋ອບ (ODOP) ຂອງເມືອງຈັນທະບູລີ ຈຳນວນ 3 ຫົວໜ່ວຍ ເຄື່ອນໄຫວເຂົ້າຮ່ວມງານວາງສະແດງຢູ່ສະຖານທີ່ຕ່າງໆ ລວມ 6 ຄັ້ງ. ນຳພາຊຸກຍູ້ການຜະລິດເຂົ້ານາປີ ປະຈຳປີ 2023 ມີເນື້ອທີ່ທັງໝົດ 145 ເຮັກຕາ, ສົມທົບກັບຂະແໜງຄຸ້ມຄອງ ແລະ ພັດທະນາທີ່ດິນກະສິກຳ ນວ ລົງກວດກາການຫັນປ່ຽນປະເພດດິນກະສິກຳ ໄປເປັນດິນປະເພດອື່ນ 32 ຄັ້ງ, ຈຳນວນ 32 ຕອນ, ເຊິ່ງມີເນື້ອທີ່ທັງໝົດ 208.552 ຕາແມັດ, ຄຸ້ມຄອງເກັບກຳຈຳນວນສັດລ້ຽງໃຫ້ໄດ້ຮັບການສັກຢາກັນພະຍາດເປັນປົກກະຕິ ລວມ 1.696 ເທື່ອໂຕ. ນອກຈາກນີ້, ກໍໄດ້ສຸມໃສ່ວຽກງານການຮຽນ-ການສອນ ໄປຕາມ 3 ລັກສະນະ 5 ຫຼັກມູນ ຂອງການສຶກສາເຮັດໃຫ້ຄຸນນະພາບການຮຽນ-ການສອນແຕ່ລະຊັ້ນຮຽນໃຫ້ມີຄຸນນະພາບດີຂື້ນ, ທົ່ວເມືອງຈັນທະບູລີມີໂຮງຮຽນພາກລັດ ແລະ ເອກະຊົນ ທັງໝົດ 91 ແຫ່ງ.
ພາຍຫຼັງທີ່ໄດ້ຮັບຟັງການລາຍງານສະພາບລວມຂອງເມືອງຈັນທະບູລີ, ບັນດາທ່ານ ສສຊ ແລະ ສສນວ ກໍໄດ້ຖັດປ່ຽນກັນໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫລວງວຽງຈັນ ຊຸດທີ II ໃຫ້ບັນດາທ່ານຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຢ່າງກ້ວາງຂວາງ ຕໍ່ກັບບັນດາເນື້ອໃນ ແລະ ວຽກງານທີ່ສຳຄັນຕ່າງໆ. ພ້ອມດຽວກັນນີ້, ຜູ້ເຂົ້າຮ່ວມກໍໄດ້ແລກປ່ຽນ ແລະ ສະເໜີບັນຫາສຳຄັນຕ່າງໆ ຕໍ່ຄະນະລົງເຮັດວຽກ ເປັນຕົ້ນ ການສຶກສາອົບຮົມ, ເຜີຍແຜ່ນິຕິກຳ, ກົດໝາຍ ໃຫ້ແກ່ປະຊາຊົນຍັງບໍ່ທັນກວ້າງຂວາງ ແລະ ບັນຫາອື່ນໆອີກຈຳນວນໜຶ່ງ. ໃນຕອນທ້າຍ, ບັນດາທ່ານ ສສຊ ແລະ ສສນວ ໄດ້ນຳເອົາບັນດາຄຳສະເໜີທີ່ໄດ້ຮັບຈາກປະຊາຊົນຢູ່ແຕ່ລະບ້ານ ພາຍໃນເມືອງຈັນທະບູລີ ໃນການລົງພົບປະຄັ້ງນີ້ ນຳມາແລກປ່ຽນກັບອົງການປົກຄອງເມືອງ ໂດຍສະເພາະແມ່ນພາກສ່ວນທີ່ຮັບຜິດຊອບ ເປັນຕົ້ນ: ປະຊາຊົນສະເໜີໃຫ້ມີການແກ້ໄຂບັນຫາການສໍ້ລາດບັງຫຼວງ; ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ພາຍໃນປະເທດ; ບັນຫາການຖິ້ມຂີ້ເຫຍື້ອຊະຊາຊາຍຕາມທ້ອງຖະໜົນ, ການປ່ອຍນ້ຳເສຍລົງຮ່ອງນ້ຳສາທາລະນະ; ການປັບປຸງ ແລະ ບູລະນະຮັກສາເສັ້ນທາງຫຼວງ ໂດຍສະເພາະການທາສີເສັ້ນທາງ ແລະ ປ້າຍຈະລາຈອນຕ່າງໆ ເພື່ອປ້ອງກັນອຸບັດຕິເຫດຂອງການສັນຈອນໃນເວລາກາງຄືນ; ບັນຫາໄຟເຍືອງທາງ; ບັນຫາຢາເສບຕິດ ແລະ ບັນຫາອື່ນໆອີກຈຳນວນໜຶ່ງ. ຕໍ່ກັບຄຳສະເໜີດັ່ງກ່າວ, ພາກສ່ວນຮັບຜິດຊອບ ກໍໄດ້ມີຄຳຊີ້ແຈງ, ອະທິບາຍຄຳສະເໜີຈຳນວນໜຶ່ງ ໃຫ້ຄະນະເຮັດວຽກໄດ້ຮັບຊາບ ແລະ ນຳເອົາຄຳສະເໜີດັ່ງກ່າວ ເພື່ອນຳໄປປຶກສາຫາລື ແລະ ຊອກຫາວິທີການແກ້ໄຂຮ່ວມກັນໃນຕໍ່ໜ້າ.
(ພອນທິບ ອິນທິລາດ)
