ໃນວັນທີ 2 ຫາ 6 ມີນາ 2023 ທີ່ຜ່ານມານີ້ ທ່ານ ບຸນສອນ ເພັດດາວັນ ຮອງເລຂາພັກແຂວງ, ປະທານສະມາຊິກສະພາແຫ່ງຊາດ ຊຸດທີ IX, ປະທານສະພາປະຊາຊົນແຂວງວຽງຈັນ ສົມທົບກັບຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງວຽງຄໍາ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ, ພໍ່ຄ້າຊາວຂາຍ ແລະ ປະຊາຊົນລາວບັນດາເຜົ່າຢູ່ເມືອງວຽງຄໍາ, ແຂວງວຽງຈັນ ໄດ້ລົງເຄື່ອນໄຫວຢູ່ 5 ຈຸດ ຄື: ບ້ານ ໂພນຊອງ, ສໍານັກງານປົກຄອງເມືອງວຽງຄໍາ, ບ້ານ ນາເຄືອ, ບ້ານ ປາກກະຍຸງ ແລະ ບ້ານ ຫາດຊາຍຄູນ.

ໂອກາດດັ່ງກ່າວ ປະທ່ານສະພາປະຊາຊົນແຂວງ ກໍ່ໄດ້ນໍາເອົາເນື້ອໃນຜົນສໍາເລັດກອງປະຊຸມສະໄໜສາມັນເທື່ອ 4 ຂອງສະພາແຫ່ງຊາດ ຊຸດທີ IX ສະພາປະຊາຊົນແຂວງວຽງຈັນ ຊຸດທີ II ເປັນຕົ້ນແມ່ນ: ການຄຸ້ມຄອງບໍ່ລິຫານລັດ, ການພັດທະນາເສດຖະກິດ-ສັງຄົມ, ຜົນກະທົບຈາກໂຄງການກໍ່ສ້າງ ແລະ ຫາງສຽງຂອງສັງຄົມທີຕິດພັນກັບແຂວງວຽງຈັນ.

ການລົງພົບປະໃນຄັ້ງນີ້, ກໍ່ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຂອງເມືອງ ແລະ ບ້ານ ເປັນຕົ້ນແມ່ນ: ອາຊີບຂອງພໍ່ແມ່ປະຊາຊົນສ່ວນຫຼາຍແມ່ນຖືເອົາການ ເຮັດນາ, ປູກຟັງ, ລ້ຽງສັດ ເປັນຫຼັກ ແລະ ໃນໂອກາດດັ່ງກ່າວ ບັນດາທານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ຮັບຟັງຄໍາຄິດ ແລະ ຄໍາສະເໜີຂອງປະຊາຊົນ ເພື່ອນໍາໄປຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂ ເຊິ່ງບັນຫາສວນໃຫ່ຍແມ່ນຕິດພັນກັບສະພາບເສດຖະກິດຊິວິດການເປັນຢູ່ຂອງປະຊາຊົນໃນປັດຈຸບັນ

ຂ່າວໂດຍ: ນາງ ບູລາຕີ ແສນທະວົງ