ວັນທີ 1 ຕຸລາ 2024 ທ່ານ ຄອນປະພັນ ເລືອງສີຈັນທອງ ຄະນະປະຈໍາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 ປະທານ ສະພາປະຊາຊົນ ແຂວງຫົວພັນ ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງແອດ ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ຢູ່ 2 ຈຸດຂອງເມືອງແອດ ຄື: ຈຸດບ້ານພັກແຟນ ແລະ ຈຸດບ້ານເມືອງແອດ ມີອໍານາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນ ເຂົ້າຮ່ວມທັງໝົດ 390 ຄົນ, ຍິງ 153 ຄົນ.

    

                   ຈຸດປະສົງຂອງການລົງພົບປະຜູ້ມີສິດເລືອກຕັ້ງຄັ້ງນີ້ ກໍເພື່ອນໍາເອົາ ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ລົງຈັດຕັ້ງເຜີຍແຜ່ໃຫ້ພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດ ພ້ອມທັງຮັບຟັງການລາຍງານ ກ່ຽວກັບສະພາບລວມຂອງບ້ານໂດຍຫຍໍ້ ຈາກອໍານາດການປົກຄອງທັງສອງບ້ານ ແລະ ເປີດໂອກາດໃຫ້ຜູ້ເຂົ້າຮ່ວມສະເໜີຂໍ້ຂ້ອງໃຈ ແລະ ບັນຫາຕ່າງໆ ທີ່ຕິດພັນກັບການດໍາລົງຊີວິດ ທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ນໍາໄປປະສານສົມທົບກັບຂະແໜງການກ່ຽວຂ້ອງຄົ້ນຄວ້າ ພິຈາລະນາແກ້ໄຂບັນຫາດັ່ງກ່າວຕາມຄວາມເໝາະສົມ ຈາກນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ອະທິບາຍ, ຊີ້ແຈງບາງຄໍາສະເໜີ ໃຫ້ພໍ່ແມ່ປະຊາຊົນ ໄດ້ຮັບຮູ້ເຂົ້າໃຈ ແລະ ໄດ້ເໜັ້ນໜັກໃຫ້ອໍານາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນພາຍໃນບ້ານ ຈົ່ງພ້ອມກັນຮັກສາມູນເຊື້ອຄວາມສາມັກຄີ, ຄວາມດຸໝັ່ນຂະຫຍັນພຽນ ເອົາໃຈໃສ່ປູກຝັງລ້ຽງສັດ ແລະ ຄ້າຂາຍສິ່ງທີ່ບໍ່ຜິດຕໍ່ລະບຽບກົດໝາຍ ເສີມຂະຫຍາຍສິ່ງທີ່ເປັນທ່າແຮງຂອງບ້ານ ເພື່ອເຮັດໃຫ້ຊີວິດການເປັນຢູ່ນັບມື້ດີຂຶ້ນເລື້ອຍໆ ແລະ ໃນໂອກາດດຽວກັນນັ້ນ ຄະນະທິມງານຍັງໄດ້ນໍາເອົາເຄື່ອງຊ່ວຍເຫຼືອຈໍານວນໜຶ່ງ ມອບໃຫ້ຄອບຄົວທຸກຍາກ ທັງໝົດ 8 ຄອບຄົວ. ໃນນັ້ນ ບ້ານພັກແຟນ 3 ຄອບຄົວ ແລະ ບ້ານເມືອງແອດ 5 ຄອບຄົວ ຕື່ມອີກ.

ພາບ ແລະ ຂ່າວ: ນ. ໃຈ ເພັດວິໄຊ.