ໃນລະຫວ່າງວັນທີ 22 ຫາ 23 ກັນຍາ 2023 ທີ່ຜ່ານມານີ້  ສະມະຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ ແລະ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງອາດສະພອນ ເຊິ່ງນຳໂດຍ ທ່ານ ສັນຍາ ປະເສີດ ຄະນະປະຈຳສະພາແຫ່ງຊາດ, ປະທານກໍາມາທິການ ການຕ່າງປະເທດ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ທ່ານ ບຸນລັດ ລໍບານເຢັນ ຮອງເລຂາພັກເມືອງ ປະທານອົງການກວດກາພັກ-ລັດເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງອາດສະພອນ, ທ່ານ ນາງ ອິນປອນ ພອນວິໄລ ກຳມະການພັກເມືອງ ປະທານສະຫະພັນແມ່ຍິງເມືອງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງອາດສະພອນ, ໄດ້ນຳເອົາເນື້ອໃນ ຈິດໃຈ, ຜົນສຳເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ແລະ ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ລົງມາເຜີຍແຜ່ໃຫ້ແກ່ບັນດາຜູ້ມີສິດເລືອກຕັ້ງຢູ່ເມືອງອາດສະພອນ.

ໃນການລົງເຄື່ອນໄຫວວຽກງານຂອງບັນດາທ່ານ ສສຊ, ສສຂ ໃນຄັ້ງນີ້ ແມ່ນໄດ້ກຳນົດເອົາ 3 ຈຸດ ຄື: ຈຸດທີ1 ຢູ່ສະໂມສອນຂອງເມືອງ, ຈຸດທີ2 ຢູ່ບ້ານນາເຂົ້າໝີ້ນ, ຈຸດທີ3 ຢູ່ບ້ານນາຮັງນ້ອຍ ມີບັນດາທ່ານໃນຄະນະພັກເມືອງ, ທະຫານ-ຕຳຫຼວດ, ພະນັກງານ-ລັດຖະກອນ, ພໍ່ແມ່ປະຊາຊົນກໍຄືຜູ້ມີສິດເລືອກຕັ້ງເຂົ້າຮ່ວມຮັບຟັງທັງໝົດ 490 ຄົນ, ຍິງ 232ຄົນ, ເຊິ່ງບັນດາທ່ານ ສສຊ, ສສຂ ກໍ່ໄດ້ຮັບຟັງການລາຍງານ ການນຳພາ-ຊີ້ນຳວຽກງານຂອງອົງຄະນະພັກເມືອງ ແລະ ອົງການປົກຄອງບ້ານທັງ2ບ້ານໂດຍສັງເຂບ ພ້ອມທັງຄໍາສະເໜີຄວາມຮຽກຮ້ອງຕ້ອງການໃນການຕອບສະໜອງດ້ານການພັດທະນາພື້ນຖານໂຄງລ່າງຂອງເມືອງ, ບ້ານ ຕາມຈຸດພົບປະແຕ່ລະຈຸດ ຈາກນັ້ນ, ທ່ານ ສັນຍາ ປະເສີດ ສະມາຊິກສະພາແຫ່ງຊາດ ປະຈໍາເຂດເລືອກທີ 13 ໄດ້ໂອ້ລົມຜູ້ມີສິດເລືອກຕັ້ງຫຼາຍບັນຫາທີ່ສຳຄັນ ຕໍ່ກັບການສ້າງສາພັດທະນາຕົນເອງ, ພັດທະນາຄອບຄົວ ແລະ ພັດທະນາປະເທດຊາດ ພ້ອມທັງໄດ້ເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX, ຕໍ່ມາທ່ານ ບຸນລັດ ລໍບານເຢັນ ແລະ ທ່ານ ນາງ ອິນປອນ ພອນວິໄລ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງອາດສະພອນ ກໍ່ໄດ້ຜັດປ່ຽນກັນໂອ້ລົມຕໍ່ບັນດາຜູ້ມີສິດເລືອກຕັ້ງ, ພ້ອມທັງເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ໃຫ້ແກ່ຜູ້ມີສິດເລືອກຕັ້ງໄດ້ຮັບຮູ້ ເຂົ້າໃຈ, ເຊິ່ງໄດ້ຍົກໃຫ້ເຫັນເຖິງບັນດາເນື້ອໃນ ແລະ ຈິດໃຈກອງປະຊຸມ ທີ່ໄດ້ຮັບຮອງເອົາບັນດາມະຕິຕ່າງໆ ຂອງສະພາປະຊາຊົນແຂວງ ເພື່ອນຳໄປຈັດຕັ້ງປະຕິບັດ ໃຫ້ຖືກຕ້ອງສອດຄ່ອງໃນແຜນພັດທະນາເສດຖະກິດ-ສັງຄົມໃນໄລຍະປະຈຸບັນ ເຮັດໃຫ້ປະເທດຊາດມີຄວາມຮັ່ງມີ, ແຂງແຮງຂື້ນໃນທຸກດ້ານ ແລະ ມີຄວາມສີວິໄລຂຶ້ນເທື່ອລະກ້າວ. ໂອກາດລົງພົບປະປະຊາຊົນໃນຄັ້ງນີ້ ທ່ານ ສັນຍາ ປະເສີດ ຍັງໄດ້ນຳເອົາເຂົ້າສານໜຽວ ຈຳນວນ 1 ໂຕນ ມອບໃຫ້ກັບເມືອງ ເພື່ອນຳໄປມອບໃຫ້ອໍານາດການປົກຄອງບ້ານ ແຈກຢາຍຕໍ່ໃຫ້ພໍ່ແມ່ປະຊາຊົນທີ່ຂາດເຂີນ ແລະ ໄດ້ຮັບຜົນກະທົບຈາກໄພນໍ້າຖ້ວມຂອງເມືອງ, ພ້ອມນີ້ຍັງໄດ້ນຳເອົາອຸປະກອນການແພດຈຳນວນຫຼາຍລາຍການ ມອບໃຫ້ກັບໂຮງໝໍຊຸມຊົນຂອງເມືອງ ເພື່ອນຳໃຊ້ເຂົ້າໃນວຽກງານປິ່ນປົວຄົນເຈັບທີ່ມາໃຊ້ບໍລິການພາຍໃນໂຮງໝໍ ແລະ ນອກຈາກນີ້ບັນດາທ່ານ ສສຊ, ສສຂ ຍັງໄດ້ລົງເຄື່ອນໄຫວສຳຫຼວດຫົນທາງຈຸດທີ່ຈະຕ້ອງມີການແກ້ໄຂ ຈາກຜົນກະທົບໄພນໍ້າຖ້ວມໃນແຕ່ລະປີ ລະຫວ່າງ ບ້ານທາດດອກແກ້ວ ຫາ ບ້ານຜັກຂະຫຍ່າ, ພ້ອມກັນນັ້ນໄດ້ໄປຢ້ຽມຊົມການຜະລິດກະສິກຳຂອງຄອບຄົວຕົວແບບໃນການປູກ, ການລ້ຽງຂອງປະຊາຊົນບ້ານວັງໄຮ ແລະ ໄດ້ນຳເອົາເຂົ້າສານ  ໜຽວຈຳນວນໜຶ່ງລົງມອບໃຫ້ອໍານາດການປົກຄອງບ້ານ ກໍຄືພໍ່ແມ່ປະຊາຊົນບ້ານນາເຂົ້າໝີ້ນ, ບ້ານນາຮັງນ້ອຍ ແລະບ້ານວັງໄຮ ເພື່ອມອບຕໍ່ໃຫ້ຄອບຄົວທີ່ຂາດເຂີນພາຍໃນບ້ານຕື່ມອີກ./